റിയാദില്‍ ഹോട്ടലിന്റെ പാരപ്പറ്റ് തകര്‍ന്ന് മലയാളിയും തമിഴ്നാട്ടുകാരനും ഉള്‍പ്പെടെ രണ്ടു പേര്‍ മരിച്ചു. ആലപ്പുഴ കായംകുളം കീരിക്കാട് കോളങ്ങരേത് കോയക്കുട്ടിയുടെ മകന്‍ അബ്ദുല്‍ അസീസ് ആണ് മരിച്ച മലയാളി. അല്‍ ജസീറ ഫോഡ് കമ്പനിയില്‍ ഡ്രൈവറാണ് മരിച്ച അബ്ദുല്‍ അസീസ്.
തമിഴ്‌നാട് സ്വദേശിയുടെ കൂടുതല്‍ വിവരങ്ങള്‍ ലഭ്യമല്ല. കൊച്ചി സ്വദേശി സലിം, ഓച്ചിറ പ്രയാര്‍ സ്വദേശി അജയന്‍ എന്നിവര്‍ക്ക് പരിക്കേറ്റു. രാവിലെ ഒന്‍പതിനാണ് സംഭവം. പ്രിന്‍സ് ബന്ദര്‍ ബിന്‍ അബ്ദുല്‍ അസീസ് റോഡില്‍ എക്സിറ്റ് 30ല്‍ ഖലീജിലുളള മലാസ് ഹോട്ടലിന്റെ മുന്‍ ഭാഗത്തെ കോണ്‍ക്രീറ്റ് പാരപ്പെറ്റ് തകര്‍ന്നാണ് അപകടം.
ഹോട്ടലിന്പുറത്ത് സംസാരിച്ചു നിന്നവരാണ് അപകടത്തില്‍പെട്ടത്. ഹോട്ടലിന്റെ ബോര്‍ഡ് ഉള്‍പ്പെടെ പാരപ്പറ്റിന്റെ കോണ്‍ക്രീറ്റ് പാളികള്‍ തകര്‍ന്നു വീണാണ് അപകടം ഉണ്ടായത്. സംഭവ സമയം ഹോട്ടലിനകത്ത് ഉണ്ടായവര്‍ക്ക് പരിക്കില്ല. അപകട സ്ഥലം പൊലീസ് നിയന്ത്രണത്തിലാണ്. കേളി സാംസ്‌കാരിക വേദി ബഗ്ളഫ് ഏരിയ പ്രവര്‍ത്തകനാണ് അബ്ദുല്‍ അസീസ്.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
