തിരുവനന്തപുരം: തലമുറകളായി വിതുരയിലെ യുവതയുടെ കായിക സ്വപ്നങ്ങള്‍ക്ക് ആശ്രയമായ പി.ടി.ഉഷ സ്റ്റേഡിയത്തിന്റെ നവീകരണ പ്രവര്‍ത്തനങ്ങള്‍ക്ക് തുടക്കമായി. തിരുവനന്തപുരം ജില്ലാ പഞ്ചായത്തിന്റെ 2020-21 വര്‍ഷത്തെ വാര്‍ഷിക പദ്ധതിയില്‍ ഉള്‍പ്പെടുത്തി 1.48 കോടി രൂപ വകയിരുത്തിയിട്ടുള്ള സ്റ്റേഡിയത്തിന്റെ നിര്‍മ്മാണ ഉദ്ഘാടനം ജില്ലാ പഞ്ചായത്ത് പ്രസിഡന്റ് വികെ മധു നിര്‍വ്വഹിച്ചു.
തിരുവനന്തപുരം ജില്ലാ പഞ്ചായത്തിന്റെ കീഴിലുള്ള വിതുര ഗവ. എച്ച്.എസിന്റെ ഭാഗമായ പി.ടി. ഉഷ സ്റ്റേഡിയത്തില്‍ ആധുനിക സൗകര്യങ്ങളാണ് ഒരുക്കുക.
കായിക കേരളത്തിന് അഭിമാനമായ പി.ടി.ഉഷയുടെ നാമധേയത്തില്‍ ഉള്ള സ്റ്റേഡിയം 1987 ല്‍ അന്നത്തെ മുഖ്യമന്ത്രി ഇ.കെ. നായനാരാണ് സ്റ്റേഡിയം ഉദ്ഘാടനം ചെയ്തത്. പി.ടി. ഉഷയുടെ സാന്നിദ്ധ്യത്തിലായിരുന്നു ചടങ്ങ്. തുടര്‍ന്നുള്ള മൂന്ന് പതിറ്റാണ്ടുകാലം ഹൈസ്‌കൂള്‍ വിദ്യാര്‍ത്ഥികളുടെ മാത്രമല്ല വിതുരയിലെ യുവജനങ്ങളുടെയാകെ മുഖ്യ കായിക കേന്ദ്രമായി മാറി ഈ സ്റ്റേഡിയം.
സമീപകാലത്ത് അറ്റകുറ്റപ്പണികള്‍ നടത്താതെ സ്റ്റേഡിയം ശോചനീയാവസ്ഥയിലായ സാഹചര്യത്തിലാണ് ജില്ലാ പഞ്ചായത്ത് നവീകരണ പ്രവര്‍ത്തനങ്ങള്‍ ഏറ്റെടുത്തിരിക്കുന്നത്. എട്ട് കോടി രൂപയോളം ചെലവഴിച്ച് വിതുര വി.എച്ച്.എസ്.എസില്‍ ജില്ലാ പഞ്ചായത്ത് പൂര്‍ത്തീകരിച്ച പദ്ധതികളുടെ ഉദ്ഘാടനത്തിനിടെയാണ് സ്റ്റേഡിയത്തിന്റെ ശോചനീയാവസ്ഥ സംബന്ധിച്ച് വിതുരയിലെ കായിക പ്രേമികള്‍ നിവേദനം സമര്‍പ്പിച്ചത്.
ഇതിനെത്തുടര്‍ന്ന് അടുത്ത ബഡ്ജറ്റില്‍ തന്നെ സ്റ്റേഡിയം നവീകരിക്കുന്നതിനായി ജില്ലാ പഞ്ചായത്ത് ഫണ്ട് വകയിരുത്തി. തീര്‍ത്തും ആധുനികമായ സൗകര്യങ്ങള്‍ ഒരുക്കിക്കൊണ്ട് സ്റ്റേഡിയത്തിന്റെ മുഖഛായ തന്നെ മാറ്റാനാണ് ജില്ലാ പഞ്ചായത്ത് ലക്ഷ്യമിടുന്നത്. പദ്ധതിയുടെ ഭാഗമായി ഗ്രൗണ്ട് ഗാലറി, 100 മീറ്റര്‍ ട്രാക്ക്, മിനി ജിംനേഷ്യം, ഓഫീസ് ബ്ലോക്ക്, കായിക താരങ്ങള്‍ക്കുള്ള വിശ്രമ മുറികളും, ടോയിലറ്റുകളും എന്നിവ ഉള്‍പ്പെടെ വിപുലമായ സജ്ജീകരണങ്ങളാണ് ഒരുക്കിയിട്ടുള്ളത്.
നഗര പ്രദേശങ്ങളില്‍ മാത്രം ഒതുങ്ങിയിരുന്ന സ്പോര്‍ട്സ് പരിശീലനത്തിന്റെ ആധുനിക സൗകര്യങ്ങള്‍ ഗ്രാമീണ മേഖലയിലേക്കും വ്യാപിപ്പിക്കുക എന്നതാണ് ഇതിലൂടെ ജില്ലാ പഞ്ചായത്ത് ലക്ഷ്യമിടുന്നത്. ജില്ലയിലെ ഗ്രാമീണ മേഖലയില്‍ പൂര്‍ത്തിയാവുന്ന വിവിധ കായിക പദ്ധതികളും ഇതേ കാഴ്ചപ്പാടോടെയാണ് ആവിഷ്‌കരിച്ചിട്ടുള്ളത്. ജില്ലയിലെ വോളിബോളിന്റെ ഈറ്റില്ലമായ പള്ളിക്കലില്‍ 2 കോടി രൂപയുടെ ഇന്‍ഡോര്‍ സ്റ്റേഡിയം നിര്‍മ്മാണം പൂര്‍ത്തിയാകുന്നു.
പെരിങ്ങമ്മലയില്‍ സ്ഥാപിക്കുന്ന അന്താരാഷ്ട്ര നിലവാരത്തിലുള്ള മള്‍ട്ടി പര്‍പ്പസ് ഇന്‍ഡോര്‍ സ്റ്റേഡിയത്തിന്റെ നിര്‍മ്മാണവും അന്തിമഘട്ടത്തിലാണ്. ഉഴമലയ്ക്കലിലെ കുളപ്പടയില്‍ സ്ഥാപിക്കുന്ന ഇന്‍ഡോര്‍ സ്റ്റേഡിയത്തിന്റെ നിര്‍മ്മാണം നടന്നു വരുന്നു. ഇളവട്ടം ജംഗ്ഷനിലെ മിനി സ്റ്റേഡിയവും നിര്‍മ്മാണ ഘട്ടത്തിലാണ്, പ്ലാമൂട്ട്കടയില്‍ നിര്‍മ്മാണം പൂര്‍ത്തിയാക്കിയ ഇന്‍ഡോര്‍ സ്റ്റേഡിയം എന്നിവയുടെ നിര്‍മ്മാണവും പുരോഗമിക്കുന്നു. കായിക രംഗത്ത് തിരുവനന്തപുരം ജില്ലയുടെ മുന്നേറ്റത്തിന് ഈ വികസന പ്രവര്‍ത്തനങ്ങള്‍ മുതല്‍ക്കൂട്ടാകുമെന്നാണ് കരുതുന്നത്.
പി.ടി.ഉഷ സ്റ്റേഡിയം നിര്‍മ്മാണ ഉദ്ഘാടന ചടങ്ങില്‍ ജില്ലാ പഞ്ചായത്ത് അംഗം ശ്രീ. വിജു മോഹന്‍, വിതുര ഗ്രാമപഞ്ചായത്ത് പ്രസിഡന്റ് ശ്രീമതി. എസ്. എല്‍. കൃഷ്ണകുമാരി, വെള്ളനാട് ബ്ലോക്ക് പഞ്ചായത്ത് ആരോഗ്യ സ്റ്റാന്റിംഗ് കമ്മിറ്റി ചെയര്‍മാന്‍ ശ്രീ. ജെ. വേലപ്പന്‍, വിതുര ഗ്രാമപഞ്ചായത്ത് ക്ഷേമകാര്യ സ്റ്റാന്റിംഗ് കമ്മിറ്റി ചെയര്‍മാന്‍ ശ്രീ. ഷാഹുല്‍നാഥ് അലിഖാന്‍, പി.ടി.എ. പ്രസിഡന്റ് ശ്രീ. സുരേന്ദ്രന്‍, പ്രിന്‍സിപ്പല്‍മാരായ ഡോ.ഷീജ, മറിയാമ്മ, എച്ച്.എം. ദീപ ടീച്ചര്‍, വിവിധ ജനപ്രതിനിധികള്‍, രാഷ്ട്രീയ സാംസ്‌കാരിക രംഗത്തെ പ്രമുഖരും പങ്കെടുത്തിരുന്നു.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ താഴെ ലിങ്കില്‍ ക്ലിക്ക് ചെയ്യുക.
Click Here
