സ്വകാര്യ ആശുപത്രികള്ക്കുള്ള കൊവിഡ് ചികിത്സാ നിരക്കും മാര്ഗനിര്ദേശങ്ങളും ആരോഗ്യവകുപ്പ് പുറത്തിറക്കി.
ചികിത്സക്കും പരിശോധനയ്ക്കും ഏകീകൃത നിരക്ക് ഏര്പ്പെടുത്തി. കൊവിഡ് ചികിത്സ ലഭ്യമാക്കുന്ന എല്ലാ സ്വകാര്യ ആശുപത്രികളിലും ഏകീകൃത ചികിത്സാ നിരക്ക് മാത്രമേ ഈടാക്കാന് പാടുള്ളൂവെന്നും ആരോഗ്യമന്ത്രി കെ.കെ ശൈലജ പറഞ്ഞു.
കാരുണ്യ ആരോഗ്യ സുരക്ഷ പദ്ധതിക്ക് കീഴിലുള്ള എം പാനല് ചെയ്ത സ്വകാര്യ ആശുപത്രികള് സര്ക്കാര് സംവിധാനത്തില് നിന്നും ചികിത്സക്കായി റെഫര് ചെയ്യപ്പെടുന്ന സ്വകാര്യ ആശുപത്രികള് എന്നിവിടങ്ങളിലെ കൊവിഡ് ചികിത്സാ നിരക്കുകള് നിശ്ചയിച്ച് കൊണ്ടുള്ള ഉത്തരവും മാര്ഗ നിര്ദേശങ്ങളുമാണ് ആരോഗ്യ വകുപ്പ് പുറത്തിറക്കിയത്.
ജനറല് വാര്ഡ് 2300 രൂപ, എച്ച്ഡിയു 3300 രൂപ, ഐസിയൂ 6500 രൂപ, ഐസിയൂ വെന്റിലേറ്റര് ഉപയോഗിക്കുകയാണെങ്കില് 11,500 രൂപ എന്നിങ്ങനെയാണ് പ്രതിദിന ചികിത്സാ നിരക്കുകള്. ഇതിന് പുറമേ പിപിഇ കിറ്റിനുള്ള ചാര്ജും ഈടാക്കും. ആര്ടിപിസിആര് ഓപ്പണ് 2750 രൂപ, ആന്റിജന് ടെസ്റ്റ് 625 രൂപ, എക്സ്പേര്ട്ട് നാറ്റ് 3000 രൂപ, ട്രൂ നാറ്റ് 1500 രൂപ എന്നിങ്ങനെയാണ് നിരക്ക്.
കൊവിഡ് ചികിത്സ ലഭ്യമാക്കുന്ന എല്ലാ സ്വകാര്യ ആശുപത്രികളിലും നിശ്ചയിച്ച ഏകീകൃത ചികിത്സാ നിരക്ക് മാത്രമേ ഈടാക്കാന് പാടുള്ളൂവെന്ന് ആരോഗ്യമന്ത്രി കെ.കെ ശൈലജ വ്യക്തമാക്കി.
കൊവിഡ് ഉള്പ്പെടെയുള്ള ഏതൊരു ആരോഗ്യ പ്രശ്നങ്ങള്ക്കും രോഗിയുടെ ഇഷ്ടപ്രകാരം സര്ക്കാര് ആശുപത്രിയിലോ സ്വകാര്യ ആശുപത്രിയിലോ ചികിത്സ തേടാവുന്നതാണ്. 28 സര്ക്കാര് ആശുപത്രികള് നേരത്തെ കൊവിഡ് ചികിത്സയ്ക്ക് വേണ്ടി സജ്ജമാക്കിയിരുന്നു. കൂടാതെ എല്ലാ സര്ക്കാര്, സ്വകാര്യ ആശുപത്രികളിലും ട്രയാജ് സംവിധാനവും ആവശ്യാനുസരണം അര്ഹരായവര്ക്ക് സ്രവം ശേഖരിക്കുന്നതിനുള്ള പരിശോധനാ സംവിധാനവും സജ്ജമാക്കി.
കാരുണ്യ ആരോഗ്യ സുരക്ഷാ പദ്ധതി അംഗങ്ങളുടെ കൊവിഡ് ചികിത്സ ചെലവ് പൂര്ണമായും സ്റ്റേറ്റ് ഹെല്ത്ത് ഏജന്സി വഹിക്കും. പദ്ധതിയില് ഉള്പ്പെടാത്ത സര്ക്കാര് സംവിധാനം റഫര് ചെയ്യുന്ന കോവിഡ് രോഗികളുടെ ചികിത്സാ ചെലവും സര്ക്കാര് വഹിക്കും.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here