ആലപ്പുഴ: സിയാദ് വധക്കേസില്‍ ഗൂഢാലോചനയടക്കം സമഗ്രമായ അന്വേഷണം ആരംഭിച്ചു.
പിടിയിലായ ക്വട്ടേഷന്‍ സംഘങ്ങളുടെ മൊബൈല്‍ ഫോണ്‍ കോളുകളെക്കുറിച്ചും അന്വേഷിക്കും. പൊലീസ് സൈബര്‍ സെല്ലിന്റെ സഹായവും തേടി. ജില്ലാ പൊലീസ് മേധാവി എസ് സാബു സ്ഥലം സന്ദര്‍ശിച്ച് തെളിവുകള്‍ ശേഖരിച്ചു. ക്രിമിനല്‍ സംഘങ്ങളുടെ ഫോണ്‍ പൊലീസ് ശേഖരിച്ചു.
ക്വാറന്റൈന്‍ കേന്ദ്രത്തില്‍ ഭക്ഷണം നല്‍കിയ ശേഷം കൂട്ടുകാരനുമൊത്ത് വീട്ടിലേക്ക് മടങ്ങുമ്പോഴാണ് ബൈക്കില്‍ എത്തിയ ക്രിമിനല്‍ സംഘം സിയാദിനെ കുത്തിക്കൊലപ്പെടുത്തിയത്.
കോയിക്കപ്പടി ജങ്ഷനില്‍ എത്തിയ ക്രിമിനല്‍ സംഘം അവിടെയും ആക്രമണം നടത്തി. മുഖ്യപ്രതി വെറ്റമുജീബ്, നഗരസഭാ കൗണ്‍സിലറും കോണ്‍ഗ്രസ് ഐ നേതാവുമായ കാവില്‍ നിസാം, ഷെഫീക്ക് എന്നിവരെയും കോയിക്കപ്പടിയിലെ ആക്രമണത്തിന് വിഠോബ ഫൈസല്‍ എന്നിവരെയും അറസ്റ്റ് ചെയ്തു.
കൊലക്കേസിലെ ഒന്നാം പ്രതിയായ വെറ്റ മുജീബിനെ രക്ഷപ്പെടുത്തി ഒളിവില്‍ പോകാന്‍ സൗകര്യമൊരുക്കിയത് കോണ്‍ഗ്രസ് ഐ നേതാവായ കാവില്‍ നിസാമാണ്. തെളിവുകള്‍ നശിപ്പിക്കാനും ഇയാള്‍ ശ്രമിച്ചു.
കൊല ചെയ്യപ്പെട്ട സിയാദുമായി പ്രതികള്‍ക്ക് മുന്‍വൈരാഗ്യമില്ലായിരുന്നു എന്ന് അന്വേഷണത്തില്‍ പൊലീസ് കണ്ടെത്തിയിട്ടുണ്ട്. അതുകൊണ്ടാണ് ഗൂഢാലോചന പൊലീസ് സംശയിക്കുന്നത്.
നിരവധി കൊലപാതക കേസുകളില്‍ അടക്കം പ്രതിയായ വെറ്റ മുജീബ് കോണ്‍ഗ്രസ് പ്രവര്‍ത്തകനുമാണ്. ക്രിമിനല്‍ സംഘങ്ങള്‍ക്ക് എല്ലാ സഹായങ്ങളും ചെയ്ത് കൊടുക്കുന്നതും കോണ്‍ഗ്രസ് നേതാക്കളാണ്.
Related Posts
Get real time update about this post categories directly on your device, subscribe now.
