രാഷ്ട്രീയം മൂല്യങ്ങളെ മുന്‍നിര്‍ത്തുന്ന ഒരു സാംസ്‌കാരിക പ്രവര്‍ത്തനമാകണം; വെഞ്ഞാറമൂട് ഇരട്ടക്കൊലയില്‍ പ്രതിഷേധവുമായി സാംസ്‌കാരിക പ്രവര്‍ത്തകര്‍

തിരുവനന്തപുരം: വെഞ്ഞാറമൂട് ഇരട്ടക്കൊലയില്‍ പ്രതിഷേധവുമായി രാഷ്ട്രീയം മൂല്യങ്ങളെ മുന്‍നിര്‍ത്തുന്ന ഒരു സാംസ്‌കാരിക പ്രവര്‍ത്തനമാകണം; വെഞ്ഞാറമൂട് ഇരട്ടക്കൊലയില്‍ പ്രതിഷേധവുമായി സാംസ്‌കാരിക പ്രവര്‍ത്തകര്‍ പ്രവര്‍ത്തകര്‍.

മനുഷ്യവംശമൊന്നാകെ ഒരു ഒരു മഹാവ്യാധിക്കു മുന്നില്‍ പകച്ചു നില്‍ക്കുന്ന ഒരു കാലമാണിത്. കേരളവും വലിയ ആശങ്കയിലാണ്. ഈ സന്ദര്‍ഭത്തില്‍ തിരുവനന്തപുരത്തെ വെഞ്ഞാറമ്മൂടില്‍ ഡി.വൈ.എഫ്.ഐ. പ്രവര്‍ത്തകരായ രണ്ട് യുവാക്കള്‍ രാഷ്ട്രീയ എതിരാളികളുടെ കൊലക്കത്തിക്ക് ഇരയായി എന്നത് അത്യധികം വ്യസനമുണ്ടാക്കുന്നു.

രോഗവ്യാപനത്തിന്റേയും പ്രതിരോധത്തിന്റെയും സവിശേഷ സന്ദര്‍ഭത്തില്‍ ആണെങ്കിലും മലയാളി തിരുവോണം ആഘോഷിക്കാന്‍ തയ്യാറെടുക്കുമ്പോഴാണ് ആ പൊന്നോണത്തിന്റെ നെറുകയിലേക്ക് യുവാക്കളുടെ ചോര തെറിച്ചു വീണത്. വീടിനും നാടിനും വേണ്ടപ്പെട്ടവരായിരുന്നു നഷ്ടപ്പെട്ട ആ യുവാക്കള്‍.

കേസന്വേഷണത്തിന്റെ ഭാഗമായി ഏതാനും പേര്‍ അറസ്റ്റ് ചെയ്യപ്പെട്ടിട്ടുണ്ട്. അവരെല്ലാം കോണ്‍ഗ്രസ് പാര്‍ടിയുമായി ബന്ധപ്പെട്ടവരാണ് എന്നു കാണുന്നു. രാഷ്ട്രീയാഭിമുഖ്യത്തിന്റെ പേരില്‍ പ്രതികളെ പിന്തുണക്കാനും സംരക്ഷിക്കാനും ശ്രമമുണ്ട്. ഇത് വലിയ ആപത് സൂചനയാണ് കാണിക്കുന്നത്. പ്രധാനപ്പെട്ട രാഷ്ട്രീയ പാര്‍ടികള്‍ ആശയത്തിനു പകരം ആയുധം എടുക്കാന്‍ തുടങ്ങിയാല്‍ രാജ്യത്ത് മനുഷ്യജീവിതം അസാധ്യമായിത്തീരും.

ആശയമോ അഭിപ്രായമോ മുന്നോട്ടു വെക്കാനില്ലാതാവുമ്പോഴാണ് ആയുധങ്ങള്‍ പുറത്തുവരുന്നത്. ആഭിപ്രായ ഭിന്നതകളുടെ പേരില്‍ കൊലക്കത്തിയുയരുന്ന പ്രവണതയെ ഒരു കാരണവശാലും അംഗീകരിക്കാനാവില്ല.

രാഷ്ട്രീയപ്രവര്‍ത്തനം മൂല്യങ്ങളെ മുന്‍നിര്‍ത്തിയുള്ള സാംസ്‌കാരിക പ്രവര്‍ത്തനം കൂടി ആകേണ്ടതുണ്ടെന്ന് ഞങ്ങള്‍ ഓര്‍മ്മിപ്പിക്കുന്നു. അന്വേഷണം ഊര്‍ജ്ജിതപ്പെടുത്തി കൊലപാതകികളെ നിയമത്തിന്റെ മുന്നില്‍ കൊണ്ടുവരണമെന്ന് സര്‍ക്കാരിനോട് ഞങ്ങള്‍ അഭ്യര്‍ത്ഥിക്കുന്നു.