വിജയ് പി നായര്‍ എന്ന യൂട്യൂബറെ അറിയില്ലെന്ന് കലാസംവിധായകന്‍ പ്രേമചന്ദ്രന്‍. അങ്ങനെയൊരു വ്യക്തിയെ കണ്ടിട്ടില്ല,കേള്‍ക്കുകയോ നേരത്തേ അറിയുകയോ ചെയ്തിട്ടില്ലെന്നും പ്രേമചന്ദ്രന്‍ മാതൃഭൂമി ന്യൂസിനോട് പറഞ്ഞു. ഒരിക്കല്‍ പോലും ചിന്തിച്ചിട്ടില്ലാത്ത കാര്യങ്ങളാണ് അദ്ദേഹം മെനഞ്ഞുണ്ടാക്കിയത്. സംഭവവുമായി തനിക്ക് ഒരു ബന്ധവുമില്ലെന്ന കാര്യം ജനങ്ങളുടെ മുന്നില്‍ തെളിയിക്കണമെന്നും അദ്ദേഹം പറഞ്ഞു.
പ്രമുഖ വ്യക്തികള്‍ക്കെതിരെ മോശമായ കാര്യങ്ങള്‍ കലാസംവിധായകന്‍ പ്രേമചന്ദ്രനാണ് തന്നോട് പറഞ്ഞതെന്ന വിജയ് നായരുടെ ആരോപണം നിഷേധിച്ച് രംഗത്തെത്തുകയായിരുന്നു അദ്ദേഹം. വിട്രിക്‌സ് സീന്‍ എന്ന തന്റെ യൂട്യൂബ് ചാനലിലൂടെ മുന്‍ വനിതാ കമ്മീഷന്‍ അദ്ധ്യക്ഷയ്ക്കും പ്രമുഖ ഡബ്ബിംഗ് ആര്‍ട്ടിസ്റ്റിനുമെതിരെ വിജയ് പി നായര്‍ അപകീര്‍ത്തികരമായ പരാമര്‍ശങ്ങള്‍ നടത്തിയിരുന്നു. ഇവയെല്ലാം കലാസംവിധായകന്‍ പ്രേമചന്ദ്രന്‍ തന്നോട് പറഞ്ഞതാണെന്നായിരുന്നു ഇയാള്‍ വീഡിയോയില്‍ അവകാശപ്പെട്ടിരുന്നത്.
സ്ത്രീകള്‍ക്കെതിരെ അശ്ലീല പരാമര്‍ശങ്ങള്‍ നടത്തിയതിനെതിരെ ഡബ്ബിങ് ആര്‍ട്ടിസ്റ്റ് ഭാഗ്യലക്ഷ്മി, ദിയ സന, ശ്രീലക്ഷ്മി അറയ്ക്കല്‍ എന്നിവര്‍ ഇയാളെ കയ്യേറ്റം ചെയ്തിരുന്നു. തിരുവനന്തപുരത്ത് ഇയാള്‍ താമസിക്കുന്ന ലോഡ്ജിലെത്തി മഷിയൊഴിക്കുകയും അടിക്കുകയും മാപ്പ് പറയിക്കുകയും ചെയ്തു. അവകാശപ്പെട്ട പോലെ ഇയാള്‍ക്ക് ഡോക്ടറേറ്റ് ഇല്ലെന്ന് പിന്നീട് വ്യക്തമായി.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
