ചിരഞ്ജീവി സര്‍ജയുടെ വിയോഗത്തിന്‍റെ ഞെട്ടലിലായിരുന്ന കുടുംബത്തിനും അദ്ദേഹത്തിന്‍റെ സുഹൃത്തുക്കള്‍ക്കും ആരാധകര്‍ക്കും ആശ്വാസ വാര്‍ത്തയായിരുന്നു ചിരുവിനും മേഘ്നയ്ക്കും പിറന്ന ആണ്‍കുഞ്ഞ്. കുഞ്ഞിന്‍റെ ജനനം കുടുംബത്തോടൊപ്പം സുഹൃത്തുക്കളും ആരാധകരും ഏറ്റെടുക്കുകയും ചെയ്തു.
കുടുംബത്തിലെ പുതിയ അതിഥി തങ്ങളെ എത്രത്തോളം ആനന്ദിപ്പിക്കുന്നുവെന്ന് പറയുകയാണ് കുഞ്ഞിന്‍റെ മുത്തച്ഛനും മേഘ്നയുടെ അച്ഛനുമായ സുന്ദര്‍ രാജ്. കുഞ്ഞിന് ഇട്ടിരിക്കുന്ന ചെല്ലപ്പേരിനെക്കുറിച്ചും മാധ്യമപ്രവര്‍ത്തകരോട് സുന്ദര്‍രാജ് പറഞ്ഞു.
“ചിന്തു എന്നാണ് ഞാനവനെ വിളിക്കുന്നത്. ചിരുവിന്‍റെ മകന്‍ ചിന്തു. ഞങ്ങളുടെ ചിന്തകളെ, ദു:ഖങ്ങളെ ഒക്കെ മാറ്റാനായി എത്തിയിരിക്കുന്നവനാണ് അവന്‍. അതിനാലാണ് ചിന്തു എന്ന് വിളിക്കുന്നത്. അവന്‍റെ വരവില്‍ ഏറെ സന്തുഷ്ടരാണ് കുടുംബം. ദൈവത്തിലുള്ള ഞങ്ങളുടെ വിശ്വാസം കൂട്ടിയിരിക്കുകയാണ് ചെറുമകന്‍റെ പിറവി. ഓരോ തവണയും അവനെ നോക്കുമ്പോള്‍ ചിരുവിന്‍റെ സാന്നിധ്യമാണ് അനുഭവപ്പെടുന്നത്”-സുന്ദര്‍രാജ് പറഞ്ഞു.
അമ്മയെയും കുഞ്ഞിനെയും കഴിഞ്ഞ ദിവസം ആശുപത്രിയില്‍ നിന്ന് മേഘ്നയുടെ വീട്ടിലേക്ക് മാറ്റിയിരുന്നു. ചെറുമകന്‍റെ പേരിടല്‍ ചടങ്ങ് ആഘോഷമായി നടത്താനാണ് തീരുമാനിച്ചിരിക്കുന്നതെന്നും സുന്ദര്‍രാജ് പറഞ്ഞു.
“എല്ലാ ആചാരങ്ങളോടെയും പരമ്പരാഗതമായ രീതിയില്‍ ഞങ്ങളുടെ ചെറുമകന്‍റെ പേര് പ്രഖ്യാപിക്കണമെന്നാണ് തീരുമാനിച്ചിരിക്കുന്നത്”, സുന്ദര്‍ രാജ് പറയുന്നു. കഠിനമായ അനുഭവങ്ങളിലും വീഴാതെ നിന്ന മകള്‍ മേഘ്നയെക്കുറിച്ച് തനിക്ക് അഭിമാനമുണ്ടെന്നും സുന്ദര്‍രാജ് പറയുന്നു. “അവളാണ് ഞങ്ങളുടെ കുടുംബത്തിന്‍റെ യഥാര്‍ഥ കരുത്ത്”. സുന്ദര്‍രാജ് പറഞ്ഞു.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
