പവർ സ്റ്റാറിൽ ബോക്സിങ് ഇതിഹാസം റോബർട് പർഹാമും

ഒമർ ലുലു സംവിധാനം ചെയ്യുന്ന ആക്ഷൻ സിനിമ ‘പവർ സ്റ്റാറി’ൽ അമേരിക്കൻ ബോക്സിങ് ഇതിഹാസമായ റോബർട് പർഹാമും.! കിക്ക് ബോക്സിങിൽ അഞ്ചു തവണ ലോകചാമ്പ്യനും, നാല് തവണ സപോർട്-കരാട്ടെ ചാമ്പ്യനുമായ റോബർട്ട് പർഹാം അമേരിക്കയിലെ തിരക്കേറിയ നടനും, സംവിധായകനും, എഴുത്തുകാരനും, നിർമ്മാതാവും കൂടെയാണ്.

അൽ പസിനോ, റസ്സൽ ക്രോ എന്നിവരുടെ കൂടെയെല്ലാം സിനിമ ചെയ്തിട്ടുള്ള റോബർട് പർഹാം ജോയിൻ ചെയ്യുമ്പോൾ നല്ലൊരു ഇന്റർനാഷണൽ അപ്പീൽ തന്നെ പവർ സ്റ്റാറിന് നൽകുവാൻ സാധിക്കുമെന്നതിൽ സംശയമില്ല. നേരത്തെ ഹോളീവുഡ് സൂപ്പർ താരം ലൂയിസ് മാന്റിലോർ കൂടെ പവർ സ്റ്റാറിലേക്ക് ജോയിൻ ചെയ്തിരുന്നു. ചിത്രത്തിൽ ‘Power Star’ ആയി പ്രത്യക്ഷപ്പെടുന്ന ബാബു ആന്റണി തന്നെയാണ്‌ തന്റെ അമേരിക്കൻ സിനിമയിലെ ബന്ധങ്ങൾ ഉപയോഗപ്പെടുത്തി രണ്ടു പേരെയും കൊണ്ടുവരുന്നത്.

വിർച്വൽ ഫിലിംസിന്റെ ബാനറിൽ രതീഷ് ആനേടത്ത് ആണ് പവർ സ്റ്റാർ പ്രൊഡ്യുസ് ചെയ്യുന്നത്.മലയാളം കണ്ട ഏറ്റവും മികച്ച തിരക്കഥാകൃതുക്കളിൽ ഒരാളായ ഡെന്നിസ് ജോസഫ് നീണ്ട ഇടവേളയ്ക്ക് ശേഷം തിരക്കഥ ഒരുക്കുന്ന പവർ സ്റ്റാർ ഒമർ ലുലുവിന്റെ ആദ്യ ആക്ഷൻ സിനിമ കൂടെയാണ് .വിശാഖ് പിവി കാസ്റ്റിംഗ് ഡയറക്ടർ ആയെത്തുന്ന ഈ ആക്ഷൻ സിനിമക്ക് ക്യാമറ ഒരുക്കുന്നത് സിനു സിദ്ധാർഥ് ആണ്.

ചിത്രത്തിൽ മറ്റു പ്രധാന വേഷങ്ങളിൽ എത്തുന്ന റിയാസ് ഖാൻ,അബു സലീം,ബാബുരാജ് എന്നിവർ സിനിമക്ക് വേണ്ടി തങ്ങളുടെ ബോഡി ബിൽഡ് ചെയ്ത വാർത്തകളും വർക്ഔട്ട് വീഡിയോസും ഇതിനകം തന്നെ സോഷ്യൽ മീഡിയയിൽ ഒരുപാട് ചർച്ച ചെയ്യപ്പെട്ടിരുന്നു.

മലയാളത്തിന്റെ ആക്ഷൻ കിംഗ്‌ ബാബു ആന്റണിക്കൊപ്പം ഈ രണ്ടു ഹോളീവുഡ് മാർഷ്യൽ ആർട്‌സ് താരങ്ങൾ കൂടെ വന്നുചേരുമ്പോൾ ഒരു ഗംഭീര ആക്ഷൻ വിരുന്നുതന്നെ പവർ സ്റ്റാറിൽ പ്രതീക്ഷിക്കാം.!