പാലാരിവട്ടം പാലം അഴിമതിക്കേസില് മുന് മന്ത്രി വി കെ ഇബ്രാഹിംകുഞ്ഞിനെ വീണ്ടും ചോദ്യം ചെയ്യണമെന്ന് സര്ക്കാര് ഹൈക്കോടതിയില്.
ഇബ്രാഹിംകുഞ്ഞിന്റെ ജമ്യാപേക്ഷ പരിഗണിക്കവെയാണ് സര്ക്കാര് ഇക്കാര്യം അറിയിച്ചത്. ജാമ്യാപേക്ഷയില് ഹൈക്കോടതി സര്ക്കാരിന്റെ നിലപാട് തേടി. വിശദമായ സത്യവാങ്ങ്മൂലം സമര്പ്പിക്കാന് നിര്ദേശിച്ച ഹൈക്കോടതി ജാമ്യാപേക്ഷ പരിഗണിക്കുന്നത് ഈ മാസം 11ലേക്ക് മാറ്റി.
മൂവാറ്റുപുഴ വിജിലന്സ് കോടതി ജാമ്യാപേക്ഷ തള്ളിയതിനെത്തുടര്ന്നാണ് വി കെ ഇബ്രാഹിംകുഞ്ഞ് ജാമ്യം തേടി ഹൈക്കോടതിയെ സമീപിച്ചത്.അന്വേഷണവുമായി താന് സഹകരിക്കുന്നുണ്ടെന്ന് ജാമ്യാപേക്ഷയില് ഇബ്രാഹിംകുഞ്ഞ് ചൂണ്ടിക്കാട്ടിയിരുന്നു.
ഗുരുതരമായ ആരോഗ്യപ്രശ്നങ്ങളുള്ളതിനാല് മികച്ച ചികിത്സ ആവശ്യമാണെന്നും ജാമ്യാപേക്ഷയില് പറയുന്നുണ്ട്.എന്നാല് ഇബ്രാഹിംകുഞ്ഞിനെ വീണ്ടും ചോദ്യം ചെയ്യേണ്ടതുണ്ടെന്ന് സര്ക്കാര് ഹൈക്കോടതിയെ അറിയിച്ചു.
നാല് ദിവസം കസ്റ്റഡിയില് വിട്ടു നല്കണമെന്ന് അന്വേഷണ സംഘം നേരത്തെ വിജിലന്സ്കോടതിയില് ആവശ്യപ്പെട്ടിരുന്നെങ്കിലും ഒരു ദിവസം മാത്രം ആശുപത്രിയില് എത്തി ചോദ്യം ചെയ്യാനാണ് കോടതി അനുമതി നല്കിയത്. അതിനാല് വീണ്ടും ചോദ്യം ചെയ്യണമെന്ന് സര്ക്കാര് ഹൈക്കോടതിയെ അറിയിച്ചു.
ഈ സാഹചര്യത്തില് വിശദമായ സത്യവാങ്ങ്മൂലം സമര്പ്പിക്കാന് കോടതി സര്ക്കാരിനോട് നിര്ദേശിച്ചു.കസ്റ്റഡിയില് ചോദ്യം ചെയ്യേണ്ടതിന്റെ ആവശ്യകതയെ സംബന്ധിച്ചും കേസിന്റെ അന്വേഷണ പുരോഗതിയെക്കുറിച്ചും സത്യവാങ്ങ്മൂലത്തില് വ്യക്തമാക്കണമെന്നും കോടതി നിര്ദേശിച്ചു.തുടര്ന്ന് ജാമ്യാപേക്ഷ പരിഗണിക്കുന്നത് കോടതി ഈ മാസം 11ലേക്ക് മാറ്റുകയായിരുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here