തദ്ദേശ തെരഞ്ഞെടുപ്പിന്റെ വോട്ടെണ്ണല് നാളെ നടക്കും. വോട്ടെണ്ണലിനായി വിപുലമായ ക്രമീകരണങ്ങളാണ് ജില്ലാ ആസ്ഥാനങ്ങളില് ഒരുക്കിയിരിക്കുന്നത്. മൂന്ന്ഘട്ടങ്ങളായി നടന്ന തെരഞ്ഞെടുപ്പില് 76.04 ശതമാനമാണ് പോളിങ് രേഖപ്പെടുത്തിയത്.
നാളെ രാവിലെ എട്ടു മണിക്ക് വോട്ടെണ്ണല് ആരംഭിക്കും. കോവിഡ് ബാധിതര്ക്കുള്ള സ്പെഷ്യല് തപാല്വോട്ടുകള് ഉള്പ്പെടെയുള്ള പോസ്റ്റല് വോട്ടുകളാണ് ആദ്യം എണ്ണുക. തപാല് വോട്ടുകള് ബുധന് രാവിലെ എട്ട് വരെ എത്തിക്കാന് സമയമുണ്ട്. ആകെ 244 വോട്ടെണ്ണല് കേന്ദ്രങ്ങളാണ് സജ്ജമാക്കിയിട്ടുള്ളത്.
ത്രിതല പഞ്ചായത്തുകളിലെ വോട്ടെണ്ണല്, ബ്ലോക്ക് തലത്തിലും മുനിസിപ്പാലിറ്റികളിലേയും കോര്പ്പറേഷനുകളിലേയും വോട്ടിങ് യന്ത്രം സൂക്ഷിച്ചിരിക്കുന്ന കേന്ദ്രങ്ങളിലും എണ്ണും. എട്ട് ബൂത്തിന് ഒരു ടേബിള് എന്ന നിലയിലാണ് ക്രമീകരണം.
വോട്ടെണ്ണല് കേന്ദ്രങ്ങളില് കോവിഡ് സുരക്ഷ കര്ശനമാക്കി. കൗണ്ടിങ് ഓഫീസര്മാര്ക്ക് കയ്യുറയും മാസ്കും ഫേസ് ഷീല്ഡും നിര്ബന്ധമാണ്. ഫലം തത്സമയം ജനങ്ങളിലെത്തിക്കാന് തിരഞ്ഞെടുപ്പ് കമ്മീഷന്റ ട്രെന്ഡ് വെബ്സൈറ്റും സജ്ജമായികഴിഞ്ഞു. ഒന്നാംഘട്ടത്തില് 73 ശതമാനവും രണ്ടാംഘട്ടത്തില് 76.78 ശതമാനവും മൂന്നാം ഘട്ടത്തില് 78.64 ശതമാനവുമായിരുന്നു പോളിങ്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here