ക്രിക്കറ്റ് മൈതാനങ്ങളിലേക്ക് തിരിച്ചെത്തി കരിയറിന്‍റെ ഇന്നിംഗ്സിന് ഓപ്പണിംഗ് നല്‍കാന്‍ ഇന്ത്യന്‍ പേസറായ മലയാളി എസ് ശ്രീശാന്ത്. ഐപിഎല്ലിലെ ഒത്തുകളി വിവാദവും വിലക്കും ചേര്‍ന്ന് ഏ‍ഴുവര്‍ഷങ്ങള്‍ക്ക് മുമ്പാണ് ശ്രീശാന്തിന്‍റെ ക്രിക്കറ്റ് കരിയറില്‍ ഇടവേള വീണത്.
കൊവിഡിന് ശേഷം നടക്കുന്ന ആദ്യ ആഭ്യന്തര ടൂര്‍ണമെന്‍റായ സെയ്ദ് മുഷ്താഖ് അലി ട്വന്റി-20 ട്രോഫിയിലൂടെയാണ് ശ്രീയുടെ തിരിച്ചുവരവ്. ഇന്നലെ ആറു വേദികളിലായി ആരംഭിച്ച ടൂര്‍ണമെന്റില്‍ ഇന്ന് പുതുച്ചേരിയാണ് കേരളത്തിന്റെ എതിരാളികള്‍.
ഇന്ത്യന്‍ ടീമിനൊപ്പം ആസ്ട്രേലിയന്‍ പര്യടനം കഴിഞ്ഞ് തിരിച്ചെത്തിയ സഞ്ജു സാംസണാണ് കേരളത്തെ നയിക്കുന്നത്. സച്ചിന്‍ ബേബിയാണ് വൈസ് ക്യാപ്റ്റന്‍. വത്സല്‍ ഗോവിന്ദ്,ശ്രീരൂപ്,പി.കെ മിഥുന്‍,രോജിത്ത് എന്നിങ്ങനെ നാലുപുതുമുഖങ്ങളെയും ടീമിലെടുത്തിട്ടുണ്ട്.
ഐപിഎല്ലില്‍ രാജസ്ഥാന് വേണ്ടി കളിക്കുമ്പോള്‍ 2013 ലാണ് സ്പോട്ട് ഫിക്സിംഗില്‍ കുടുങ്ങി ശ്രീശാന്തിന് ആജീവനാന്ത വിലക്ക് ലഭിക്കുന്നത്.ഡല്‍ഹി പൊലീസിന്‍റെ നടപടിക്കെതിരെ കോടതിയില്‍ പോരാടി കുറ്റവിമുക്തനാക്കപ്പെട്ട ശ്രീശാന്ത് ബി.സി.സി.ഐ ഓംബുഡ്സ്മാന് അപ്പീല്‍ നല്‍കിയാണ് വിലക്ക് ഏഴുവര്‍ഷമായി കുറപ്പിച്ചത്. കഴിഞ്ഞ സെപ്തംബറിലാണ് ഈ കാലാവധി അവസാനിച്ചത്.
ടീമിലെ മറ്റ് അംഗങ്ങള്‍ :
റോബിന്‍ ഉത്തപ്പ,ജലജ് സക്സേന,വിഷ്ണു വിനോദ്,സല്‍മാന്‍ നിസാര്‍,ബേസില്‍ തമ്ബി,നിതീഷ് എം.ഡി,കെ.എം ആസിഫ്,അക്ഷയ് ചന്ദ്രന്‍,അഭിഷേക് മോഹന്‍,വിനൂപ് മനോഹരന്‍, മുഹമ്മദ് അസ്ഹറുദ്ദീന്‍,രോഹന്‍ കുന്നുമ്മല്‍,എസ്. മിഥുന്‍. കോച്ച്‌ : ടിനു യോഹന്നാന്‍
ലോക്ക്ഡൗണിന് ശേഷം നടത്താനൊരുങ്ങുന്ന ആദ്യ ആഭ്യന്തര ക്രിക്കറ്റ് ടൂര്‍ണമെന്റാണ് മുഷ്താഖ് അലി ട്രോഫി. മുംബയ്(ജനുവരി 13),ഡല്‍ഹി(15),ആന്ധ്ര(17),ഹരിയാന(19) എന്നിവര്‍ക്കെതിരെയാണ് കേരളത്തിന്റെ മറ്റ് മത്സരങ്ങള്‍.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
