അർണബ് ഗോസ്വാമിക്കെതിരെ മുംബൈയിൽ പ്രതിഷേധ പ്രകടനം

അർണബ് ഗോസ്വാമിക്കുനേരെ രാജ്യദ്രോഹത്തിന് കേസെടുക്കണമെന്ന ആവശ്യവുമായി മുംബൈയിൽ പ്രതിഷേധ പ്രകടനം

മുംബൈയിൽ കോൺഗ്രസ് പ്രവർത്തകരുടെ നേതൃത്വത്തിലാണ് റിപ്പബ്ലിക് ടി.വി. എഡിറ്റർ ഇൻ ചീഫ് അർണബ് ഗോസ്വാമിക്കുനേരെ പ്രതിഷേധ റാലി സംഘടിപ്പിച്ചത്. ബ്രോഡ്കാസ്റ്റ് ഓഡിയൻസ് റിസർച്ച് കൗൺസിൽ (ബാർക്ക് ) സി.ഇ.ഒ.

പാർഥോ ദാസ്ഗുപ്തയുമായി അർണബ് നടത്തിയ വാട്‌സാപ്പ് ചാറ്റുകളിൽ ദേശീയ വിരുദ്ധ പ്രസ്താവനകളും പ്രവർത്തനങ്ങളും ചൂണ്ടിക്കാട്ടിയായിരുന്നു പ്രതിഷേധം ഉയർന്നത്. കോൺഗ്രസ് നേതാവ് ഭായ് ജഗതപിന്റെ നേതൃത്വത്തിൽ നടന്ന പ്രതിഷേധത്തിൽ പാർട്ടി എം.എൽ.എ.മാരും എം.പി.മാരും കോർപ്പറേറ്റർമാരുമടക്കം നൂറു കണക്കിനാളുകൾ പങ്കെടുത്തു.

രാജ്യത്ത് പാക്കിസ്ഥാൻ നടത്തിയ പുൽവാമ ആക്രമണത്തിൽ സന്തോഷം പ്രകടിപ്പിച്ച അർണബിനെതിരേ നടപടി കൈക്കൊള്ളണമെന്നും രാജ്യസുരക്ഷയ്ക്ക് ഭീഷണിയാകുന്ന വിധത്തിൽ പല രഹസ്യങ്ങളും വാട്‌സാപ്പ് ചാറ്റിലൂടെ ദാസ്ഗുപ്തയ്ക്ക് കൈമാറിയത് ശരിയല്ലെന്നും പാർട്ടി നേതാക്കൾ അഭിപ്രായപ്പെട്ടു.

മുംബൈയിൽ, ലോവർ പരേലിലെ റിപ്പബ്ലിക് ടിവിയുടെ ഓഫീസിന് പുറത്താണ് പ്രതിഷേധം നടന്നത്. ഈ വിഷയത്തിൽ രാജ്യവ്യാപകമായി നടന്ന പ്രക്ഷോഭത്തിന്റെ ഭാഗമായി ജില്ലാ പ്രസിഡന്റുമാർ ഉൾപ്പെടെയുള്ള പ്രധാന പാർട്ടി നേതാക്കൾ അതത് ജില്ലകളിൽ പ്രതിഷേധ മാർച്ചുകൾക്ക് നേതൃത്വം നൽകി.

ബാലകോട്ട് വ്യോമാക്രമണത്തെക്കുറിച്ച് ഗോസ്വാമിക്ക് മൂന്ന് ദിവസം മുമ്പേ അറിയാമായിരുന്നുവെന്നും ബിജെപിയുടെ ഉന്നത നേതാക്കൾ വിവരങ്ങൾ ചോർത്തി കൊടുത്തുവെന്നുമാണ് കോൺഗ്രസ് ആരോപണം. അർണബ് രാജ്യദ്രോഹിയാണെന്നും രാജ്യദ്രോഹത്തിനെതിരെ കേസുണ്ടാക്കണമെന്നും പാർട്ടി നേതാക്കൾ ആവശ്യപ്പെട്ടു.

ദേശീയ സുരക്ഷയിൽ വിട്ടുവീഴ്ച ചെയ്തുകൊണ്ട് ബിജെപി നേതാക്കൾ അദ്ദേഹത്തെ രാഷ്ട്രീയ താൽപ്പര്യത്തിനായി സംരക്ഷിക്കുകയാണെന്നും കോൺഗ്രസ് കുറ്റപ്പെടുത്തി. പുൽവാമ ആക്രമണത്തിൽ രക്തസാക്ഷിത്വം വരിച്ച സിആർ‌പി‌എഫ് (സെൻ‌ട്രൽ റിസർവ് പോലീസ് ഫോഴ്‌സ്) ജവാൻമാരുടെ ത്യാഗം സാമ്പത്തിക നേട്ടങ്ങൾക്കായി ഗോസ്വാമി തന്റെ ചാനലിന്റെ ടിആർപി (ടെലിവിഷൻ റേറ്റിംഗ് പോയിന്റുകൾ) ഉയർത്താൻ ഉപയോഗിക്കുകയായിരുന്നുവെന്നും മുംബൈ കോൺഗ്രസ് മേധാവി ഭായ് ജഗ്താപ് ആരോപിച്ചു.

വ്യാഴാഴ്ച എൻ.സി.പി.യും അർണബിനെതിരേ നടപടിവേണമെന്നാവശ്യപ്പെട്ട് പ്രതിഷേധപ്രകടനം നടത്തിയിരുന്നു.

ടി.ആർ.പി. തട്ടിപ്പുകേസിൽ മുംബൈ പോലീസ് അർണബിനെതിരേ അന്വേഷണം നടത്തിവരുകയാണ്. അതിനിടയിലാണ് അർണബിന്റെ വാട്‌സാപ്പ് ചാറ്റുകൾ സാമൂഹികമാധ്യമങ്ങളിലും മറ്റും പ്രത്യക്ഷപ്പെടുന്നത്.

Attachments area