പ്രശസ്ത ഛായാഗ്രാഹകനും സംവിധായകനുമായ പി എസ് നിവാസ് (പി ശ്രീനിവാസ്‌) അന്തരിച്ചു. 1970കളിൽ തുടങ്ങി മൂന്നു പതിറ്റാണ്ടോളം മലയാളം, തമിഴ്, തെലുങ്ക്, ഹിന്ദി ഭാഷകളിലായി നിരവധി സിനിമകളിൽ പ്രവർത്തിച്ചു.
ഭാരതിരാജയുടെ സ്ഥിരം ക്യാമറാമാനായിരുന്നു. ശ്രീകുമാരന്‍തമ്പി സംവിധാനം ചെയ്‌ത ‘മോഹിനിയാട്ടം’ (1977) എന്ന ചിത്രത്തിലെ ഛായാഗ്രഹണത്തിന് ദേശീയ അവാര്‍ഡ് നേടി. ആന്ധ്രാപ്രദേശ് സംസ്ഥാന സർക്കാരിന്റെ നന്ദി പുരസ്‌കാരവും 1979ൽ ലഭിച്ചു. കോഴിക്കോട്‌ മെഡിക്കൽ കോളേജിനു സമീപം പെയിൻ ആന്റ്‌ പാലിയേറ്റീവ്‌ കെയറിലായിരുന്നു അന്ത്യം.
കോഴിക്കോട്‌ ദേവഗിരി കോളജിൽനിന്ന് ബിരുദം നേടിയതിനുശേഷം മദ്രാസിലെ അഡയാർ ഫിലിം ഇൻസ്റ്റിറ്റ്യൂട്ടിൽനിന്ന് മോഷൻ പിക്ചർ ഫോട്ടോഗ്രഫിയിൽ ഡിപ്ലോമ നേടി. സംവിധായകൻ പി.എൻ. മേനോന്റെ കുട്ട്യേടത്തി എന്ന ചിത്രത്തിലൂടെ തുടക്കം.
പ്രശസ്ത കാമറാമാനായിരുന്ന അശോക് കുമാറിന്‍റെ കീഴിൽ ഓപ്പറേറ്റീവ് കാമറാമാനായി പ്രവർത്തിച്ചുകൊണ്ടായിരുന്നു ഇത്. ബാബു നന്ദൻകോടിന്റെ സത്യത്തിന്റെ നിഴലിൽ എന്ന ചിത്രത്തിലൂടെയാണ് സ്വതന്ത്ര ഛായാഗ്രാഹകനാകുന്നത്.
കോഴിക്കോട്ടുകാരനായ പി എസ് നിവാസ് ‘ഭാഗ്യരാജും ചിരഞ്ജീവിയും നായകന്‍മാരായി അരങ്ങേറിയ ചിത്രങ്ങളുടെ ഛായാഗ്രാഹകനും നിവാസ് ആയിരുന്നു. തമിഴിലെ ലാന്റ്മാർക്ക് സിനിമകളായ ’16 വയതിനിലേ’, ‘കിഴക്കേ പോകും റയില്‍’, ‘സികപ്പു റോജാക്കള്‍’, തെലുങ്കിലെ ‘സാഗര സംഗമം’ തുടങ്ങി നിരവധി സിനിമകളുടെ ഛായാഗ്രഹണം നിര്‍വ്വഹിച്ചതും നിവാസ് ആയിരുന്നു.
മലയാളത്തില്‍ ‘സത്യത്തിന്റെ നിഴലില്‍’, ‘ശംഖുപുഷ്പം’, ‘സര്‍പ്പം’, ‘ലിസ’ തുടങ്ങിയ സിനിമകളുടെ ക്യാമറാമാനായിരുന്നു.. ഭാരതിരാജ ആദ്യമായി അഭിനയിച്ച ‘കല്ലുക്കുള്‍ ഈരം’ എന്ന സിനിമ സംവിധാനം ചെയ്തതും പി എസ് നിവാസ് ആയിരുന്നു.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
