വന്‍തോക്കുകളെ എങ്ങനെ വീഴ്ത്തണമെന്ന് പുരുഷകേസരികള്‍ കാട്ടിയ വഴിയേ ബാറ്റുവീശി കേരളത്തിന്‍റെ വനിതാ ക്രിക്കറ്റ് ടീമും. വനിതാ സീനിയര്‍ ഏകദിന ടൂര്‍ണമെന്‍റില്‍ കരുത്തരായ മുംബൈയെ ടി. ഷാനിയും സംഘവും തകര്‍ത്തുവിട്ടത് 47 റണ്‍സിന്. ആദ്യം ബാറ്റുചെയ്ത കേരളം സെഞ്ച്വറി നേടിയ ജിന്‍സി ജോര്‍ജിന്‍റെയും (107 നോട്ടൗട്ട്) മിന്നുമണിയുടെയും (56) മിടുക്കില്‍ നിശ്ചിത 50 ഓവറില്‍ അഞ്ചു വിക്കറ്റിന് 233 റണ്‍സെടുത്തപ്പോള്‍ മുംബൈക്ക് ഒമ്ബതു വിക്കറ്റ് നഷ്ടത്തില്‍ 186 റണ്‍സെടുക്കാനേ കഴിഞ്ഞുള്ളൂ.
ഇന്ദോര്‍ എസ്.എസ് ക്രിക്കറ്റ് ഗ്രൗണ്ടില്‍ നടന്ന മത്സരത്തില്‍ ടോസ് നേടിയ മുംബൈ കേരളത്തെ ബാറ്റിങ്ങിനയക്കുകയായിരുന്നു. ഒമ്ബതു റണ്‍സെടുത്ത ഭൂമികയും 21 റണ്‍സുമായി ക്യാപ്റ്റന്‍ ഷാനിയും പുറത്തായപ്പോള്‍ കേരളം രണ്ടിന് 51. 11 റണ്‍സുമായി അക്ഷയയും തിരിച്ചുകയറിയതോടെ 15ാം ഓവറില്‍ മൂന്നുവിക്കറ്റിന് 66 റണ്‍സെന്ന നിലയിലായിരുന്നു കേരളം. ഈ ഘട്ടത്തില്‍ ഒത്തുചേര്‍ന്ന ജിന്‍സിയും മിന്നുമണിയും സെഞ്ച്വറി കൂട്ടുകെട്ടുമായി ടീമിനെ മുന്നോട്ടു നയിക്കുകയായിരുന്നു. 77പന്തില്‍ എട്ടു ഫോറടക്കം 56ലെത്തിയ മിന്നുമണി പുറത്താകുേമ്ബാള്‍ കേരളം 186 റണ്‍സിലെത്തിയിരുന്നു. ഐ.വി. ദൃശ്യ 12 റണ്‍സെടുത്ത് പുറത്തായശേഷം എസ്. സജന ഏഴു റണ്‍സുമായി ജിന്‍സിക്ക് കൂട്ടുനിന്നു. 143 പന്തില്‍ 13 ഫോറുകളടങ്ങുന്നതാണ് ജിന്‍സിയുടെ ഇന്നിങ്സ്.
മറുപടി ബാറ്റിങ്ങില്‍ മുംബൈക്കുവേണ്ടി വൃശാലി ഭഗത് (52) മാത്രമേ തിളങ്ങിയുള്ളൂ. മിന്നുമണിയും അക്ഷയയും രണ്ടു വിക്കറ്റ് വീതം നേടിയപ്പോള്‍ സജന, മൃദുല, ജിപ്സ വി. ജോസഫ്, ഭൂമിക എന്നിവര്‍ ഓരോ വിക്കറ്റ് വീഴ്ത്തി. ജയത്തോടെ കേരളത്തിന് നാലു പോയന്‍റ് സ്വന്തമായി. പുരുഷ വിഭാഗം ട്വന്‍റി20 ടൂര്‍ണമെന്‍റില്‍ മുഹമ്മദ് അസ്ഹറുദ്ദീന്‍റെ സെഞ്ച്വറിയുടെ മികവില്‍ ഈ സീസണില്‍ കേരളം മുംബൈക്കെതിരെ തകര്‍പ്പന്‍ ജയം നേടിയിരുന്നു.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
