ഓസ്കാർ നേടുന്ന ആദ്യ ഏഷ്യൻ വനിത; ചരിത്രമായി ക്ലോയ് ഷാവോ

ഒരു നൂറ്റാണ്ടോളം പഴക്കമുള്ള സിനിമാ ചരിത്രത്തിൽ ആദ്യമായി മികച്ച സംവിധായകയ്ക്കുള്ള പുരസ്കാരം ഒരു ഏഷ്യൻ വനിത നേടി. ചരിത്രത്തിൽ തന്നെ ഇത്തരമൊരു പുരസ്കാരം നേടുന്ന രണ്ടാമത്തെ വനിതയാണ് ക്ലോയ് ഷാവോ. നൊമാഡ്ലാൻഡിലൂടെ ഓസ്കാർ ലഭിച്ച ക്ലോയ് സിനിമാരം​ഗത്ത് ശക്തമായൊരു സ്ത്രീ സാന്നിധ്യമാണ്.സിനിമാ മേഖലയിലേക്ക് സ്ത്രീകൾ കടന്നുവരേണ്ടതിന്റെ ആവശ്യകതയും അടിവരയിടുക കൂടി ചെയ്തു.

1982ൽ ചൈനയിലെ ബെയ്ജിം​ഗിൽ പിറന്ന ക്ലോയ് 14 -ാം വയസിലാണ് ലണ്ടണിലെ ബോർഡിം​ഗ് സ്കൂളിലേക്ക് പോകുന്നത്. തുടർന്ന് ലോസ് ഏഞ്ചൽസിലേക്ക് താമസം മാറി. അവിടെ നിന്നാണ് ക്ലോയ് തന്റെ പ്രാഥമിക വിദ്യാഭ്യാസം പൂർത്തിയാക്കുന്നത്. ശേഷം ന്യൂയോർക്കിലെ ഫിലിം സ്കൂളിൽ പഠനം.

2015ലാണ് ക്ലോയിയുടെ സംവിധാനത്തിലുള്ള ആദ്യ ചിത്രം പുറത്തിറങ്ങുന്നത്. സോം​ഗ് മൈ ബ്രദേഴ്സ് ടോട്ട് മി എന്ന ഫീച്ചർ സിനിമയായിരുന്നു അത്. സൺഡാൻസ് ഫിലിം ഫെസ്റ്റിവൽ, കാൻസ് ചലച്ചിത്ര മേള എന്നിവിടങ്ങളിലെല്ലാം പ്രദർശിക്കപ്പെട്ട ആദ്യ ചിത്രം തന്നെ ക്ലോയിക്ക് മികച്ച സംവിധായകയെന്ന ഖ്യാതി നേടിക്കൊടുത്തു. ബെസ്റ്റ് ഫസ്റ്റ് ഫീച്ചർ വിഭാ​ഗത്തിലേക്ക് ചിത്രം നാമനിർദേശം ചെയ്യപ്പെട്ടിരുന്നു.

പിന്നീട് 2017ൽ ദ റൈഡർ, 2020 ൽ നൊമാഡ്ലാൻഡ്, 2021 ൽ എറ്റേണൽസ് എന്നീ ചിത്രങ്ങളും സംവിധാനം ചെയ്തു. 93-ാം ഓസ്കാർ ചടങ്ങിൽ മികച്ച ചിത്രത്തിനുള്ള പുരസ്കാരവും 39-കാരിയായ ക്ലോയ് ഷാവോ സംവിധാനം നൊമാഡ്ലാൻഡ് എന്ന ചിത്രത്തിനാണ് ലഭിച്ചത്.

നൊമാഡ്ലാൻഡിലൂടെ മികച്ച സംവിധായകയ്ക്കുള്ള ​ഗോൾഡൻ ​ഗ്ലോബ് പുരസ്കാരവും ക്ലോയിക്ക് ലഭിച്ചിട്ടുണ്ട്. 1984 ൽ ബാർബറ സ്ട്രെയ്സാൻഡിന് ശേഷം ​ഗോൾഡൻ ​ഗ്ലോബ് ലഭിക്കുന്ന ഏക വനിതയാണ് ക്ലോയ് ഷാവോ.

എന്നാൽ ജന്മ​ദേശമായ ചൈനയിൽ നൊമാഡ്ലാൻഡിന് അത്ര നല്ല സ്വീകരണമല്ല ലഭിച്ചത്. ചൈനയെ അപകീർത്തിപ്പെടുത്തി എന്ന കാരണത്താൽ ഓസ്കാർ ചടങ്ങ് ചൈനയിൽ പ്രദർശിപ്പിക്കില്ല.