മോഹന്‍ലാല്‍ -സുചിത്ര വിവാഹം 33 ലേക്ക്

മലയാളികളുടെ അഭിമാന താരം മോഹന്‍ലാലും സുചിത്രയും വിവാഹിതരായിട്ട് 33 വര്‍ഷം. പതിവ് തെറ്റിക്കാതെ ലാലേട്ടനും ചേച്ചിക്കും ആശംസകള്‍ അറിയിച്ച് ആരാധകരെത്തിയിട്ടുണ്ട്. മോഹന്‍ലാല്‍ ഇതേക്കുറിച്ച് ഒന്നും പോസ്റ്റ് ചെയ്തില്ലെങ്കിലും ആരാധകര്‍ ഇത് ആഘോഷമാക്കി മാറ്റിയിരിക്കുകയാണ്. 1988 ഏപ്രില്‍ 28ന് ആറ്റുകാല്‍ ഭഗവതി ക്ഷേത്രത്തില്‍ വെച്ചായിരുന്നു വിവാഹം. മമ്മൂട്ടിയും സുരേഷ് ഗോപിയുമുള്‍പ്പടെ സിനിമാലോകം ഒന്നടങ്കം മോഹന്‍ലാലിന്റെ വിവാഹ വിരുന്നില്‍ പങ്കെടുത്തിരുന്നു. വിവാഹ വീഡിയോ അടുത്തിടെയും വൈറലായി മാറിയിരുന്നു. മോഹന്‍ലാല്‍-സുചിത്ര വിവാഹത്തിനിടയിലെ രസകരമായ വിശേഷങ്ങളിലൂടെ തുടര്‍ന്നുവായിക്കാം.
പ്രണയവിവാഹമായിരുന്നു.

മോഹന്‍ലാലിന്റേത് പ്രണയവിവാഹമായിരുന്നു. അധികമാര്‍ക്കും അറിയാത്ത പ്രണയകഥയാണ് ഇവരുടേത്. മോഹന്‍ലാല്‍ അഭിനയിച്ച സിനിമകള്‍ കണ്ട് സുചിത്രയ്ക്ക് അറിയാതെയൊരു ഇഷ്ടം മനസ്സില്‍ തോന്നിയിരുന്നു. കത്തുകളിലൂടെ ആ ഇഷ്ടം പ്രകടിപ്പിച്ചിരുന്നു. തുടക്കത്തിലൊന്നും ഈ ഇഷ്ടം മനസ്സിലായെങ്കിലും പിന്നീട് സുചിയുടെ പ്രണയം അറിഞ്ഞിരുന്നുവെന്ന് മുന്‍പ് സുരേഷ് ബാലാജി പറഞ്ഞിരുന്നു.

വിവാഹം വീട്ടുകാര്‍ ആലോച്ചിച്ച് ഉറപ്പിച്ചതായിരുന്നുവെങ്കിലും അതിനിടയില്‍ കടുത്ത പ്രതിസന്ധികളുമുണ്ടായിരുന്നു. കത്തുകളിലൂടെ ഹൃദയം കൈമാറിയ ഇവര്‍ ഒരുമിച്ച് ജീവിക്കാനായി തീരുമാനിച്ചതോടെയാണ് ജാതകം പരിശോധിപ്പിച്ചത്. ഇവരുടെ ജാതകങ്ങള്‍ തമ്മില്‍ ചേര്‍ച്ചയില്ലെന്നായിരുന്നു ആദ്യ പ്രവചനം. മറ്റൊരു ജ്യോത്സനെ കണ്ടതോടെ ഈ ആശയക്കുഴപ്പം പരിഹരിക്കുകയായിരുന്നു. വിവാഹത്തിനായുള്ള ഒരുക്കങ്ങള്‍ക്കിടയിലായിരുന്നു ഇത്.

കുട്ടിക്കാലം മുതലേ തന്നെ സിനിമയെക്കുറിച്ച് അറിഞ്ഞാണ് സുചിത്ര വളര്‍ന്നത്. അച്ഛനും ചേട്ടനും സിനിമാരംഗത്ത് സജീവമായിരുന്നു. മോഹന്‍ലാലിനോടുള്ള ഇഷ്ടത്തെക്കുറിച്ച് ആദ്യം പറഞ്ഞത് സുകുമാരിയോടായിരുന്നു. കാര്യങ്ങള്‍ നീക്കാനായി സഹായിച്ചതും സുകുമാരിയായിരുന്നു. ചെന്നൈയിലെ ഒരു വിവാഹ ചടങ്ങില്‍ വെച്ചായിരുന്നു മോഹന്‍ലാലും സുചിത്രയും ആദ്യമായി നേരില്‍ കണ്ടത്. നേരില്‍ കണ്ടതോടെ സുചിത്രയുടെ ഇഷ്ടം കൂടുകയായിരുന്നു.

മോഹന്‍ലാലിന്റെ പ്രണയം പരസ്യമായി മാറിയത് തിക്കുറിശ്ശിയുടെ വാക്കുകളിലൂടെയായിരുന്നു. മോഹന്‍ലാല്‍-സുചിത്ര പ്രണയ വിവാഹത്തിലെ ബ്രോക്കറായും അദ്ദേഹത്തെ വിശേഷിപ്പിച്ചിരുന്നു. സുരേഷ് കുമാറിനോടും പ്രിയദര്‍ശനോടും മോഹന്‍ലാലിന്റെ പ്രണയത്തെക്കുറിച്ച് മാധ്യമപ്രവര്‍ത്തകന്‍ ചോദിച്ചിരുന്നു. ഇരുവരും ചേര്‍ന്ന് അയാളെ തിക്കുറിശ്ശിയുടെ അരികിലേക്ക് വിടുകയായിരുന്നു. അവര്‍ ഇഷ്ടത്തിലാണെന്നും അതേക്കുറിച്ച് വീട്ടുകാരുമായി സംസാരിച്ചുവെന്നുമായിരുന്നു തിക്കുറിശ്ശിയുടെ മറുപടി.

വിവാഹ ശേഷം മോഹന്‍ലാല്‍ പട്ടണപ്രവേശത്തിന്റെ സെറ്റിലായിരുന്നു ജോയിന്‍ ചെയ്തത്. വിവാഹത്തിന് മുന്‍പ് അംബിക അഭിനയിച്ച അവസാനത്തെ സിനിമ കൂടിയായിരുന്നു അത്. മോഹന്‍ലാല്‍-ശ്രീനിവാസന്‍-സത്യന്‍ അന്തിക്കാട് കോംപോയിലെ എക്കാലത്തേയും മികച്ച സിനിമ കൂടിയായിരുന്നു ഇത്. തിരക്കുകള്‍ക്കിടയിലും കുടുംബത്തെ ചേര്‍ത്തുപിടിക്കാറുണ്ട് മോഹന്‍ലാല്‍. മക്കളുടെ കാര്യങ്ങളും ബിസിനസിലുമെല്ലാം സഹായിച്ച് കൂടെത്തന്നെയുണ്ട് സുചിത്രയും.

whatsapp

കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക

Click Here