ആദ്യഘട്ടത്തില്‍ വോട്ടെണ്ണിയ 12 മണ്ഡലങ്ങളിലെ ഫലം പുറത്തുവന്നപ്പോള്‍ ബിജെപി സഖ്യം എട്ട് സീറ്റുകളില്‍ മുന്നിലാണ്. കോണ്‍ഗ്രസ്-ഡി എം കെ സഖ്യം നാലിടത്ത് മുന്നിലാണ്. ഇപ്പോള്‍ രണ്ടാം ഘട്ടത്തിലെ 10 മണ്ഡലങ്ങളിലെ വോട്ടെണ്ണല്‍ പുരോഗമിക്കുകയാണ്. എന്‍ ഡി എ സഖ്യത്തെ നയിക്കുന്ന രംഗസ്വാമി നേതൃത്വം നല്‍കുന്ന എ ഐ എന്‍ ആര്‍ സി അഞ്ച് സീറ്റുകളിലും ബി ജെ പി മൂന്ന് സീറ്റുകളിലും മുന്നിലാണ്.
ബി ജെ പി സഖ്യത്തിന്റെ മുഖ്യമന്ത്രി സ്ഥാനാര്‍ത്ഥി നമശിവായം മണ്ണാടിപേട്ടില്‍ മുന്നിലാണ്. കാമരാജ് നഗറില്‍ ബിജെപിയുടെ എ ജോണ്‍കുമാര്‍ മുന്നിലാണ്. ജോണ്‍ കുമാറിന്റെ മകന്‍ റിച്ചാര്‍ഡ് ജോണ്‍കുമാര്‍ നെല്ലിതോപ്പില്‍ മുന്നിട്ട് നില്‍ക്കുന്നു. തട്ടാന്‍ചാവഡിയില്‍ എ ഐ എന്‍ ആര്‍ സി സ്ഥാപകനും നേതാവും മുന്‍മുഖ്യമന്ത്രിയുമായ എന്‍ രംഗസ്വാമി മുന്നിലാണ്.മംഗലം മണ്ഡലത്തില്‍ എ ഐ എന്‍ ആ ര്‍ സിയുടെ ഡിജികുമാര്‍ മുന്നിലാണ്. കതിര്‍ഗമത്തില്‍ എ ഐ എന്‍ ആര്‍ സിയുടെ കെഎസ്പി എന്നറിയപ്പെടുന്ന രമേഷ് മുന്നിട്ടു നില്‍ക്കുന്നു. എ ഐ എന്‍ ആ ര്‍ സിയുടെ ചന്ദിര പ്രിയങ്ക നെടുങ്ങാടും യു ലക്ഷ്മികാന്തന്‍ എമ്ബലത്തും പിആര്‍എന്‍ തിരുമുരുകന്‍ കാരൈക്കല്‍ നോര്‍ത്തിലും ലീഡ് ചെയ്യുന്നു.
കോണ്‍ഗ്രസ്-ഡിഎംകെ സഖ്യത്തില്‍ ഡിഎംകെ ഒരു സീറ്റിലും കോണ്‍ഗ്രസ് രണ്ട് സീറ്റുകളിലും മുന്നിട്ട് നില്‍ക്കുന്നു. കോണ്‍ഗ്രസ് സ്ഥാനാര്‍ത്ഥി എം വൈദ്യനാഥം ലോസ്പേട്ടിലും ഡി എം കെ നേതാവ് അന്നിബാല്‍ കെന്നഡി ഔപാലത്തും മുന്നിട്ട് നില്‍ക്കുന്നു. മാഹിയില്‍ കോണ്‍ഗ്രസ് സ്വതന്ത്രന്‍ രമേഷ് പറമ്ബത്താണ് ലീഡ് ചെയ്യുന്നത്.
പുതുച്ചേരിയില്‍ ആകെ 30 സീറ്റുകളിലേക്കാണ് തെരഞ്ഞെടുപ്പ്. കേവല ഭൂരിപക്ഷം നേടാന്‍ 16 സീറ്റുകള്‍ ജയിച്ചാല്‍ മതി. മൂന്ന് ഘട്ടങ്ങളിലായാണ് ഇവിടെ വോട്ടുകള്‍ എണ്ണുക. ആദ്യഘട്ടത്തില്‍ 12 മണ്ഡലങ്ങളില്‍ വോട്ടെണ്ണും. രണ്ടാം ഘട്ടത്തില്‍ പത്ത് മണ്ഡലങ്ങളിലും അത് കഴിഞ്ഞാല്‍ അവസാനം എട്ട് മണ്ഡലങ്ങളിലേയും വോട്ടുകള്‍ എണ്ണും.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
