നടന് രാജന് പി ദേവിന്റെ മകനായ സിനിമ, സീരിയല് താരം ഉണ്ണി പി ദേവിന്റെ ഭാര്യ പ്രിയങ്ക ജീവനൊടുക്കിയ കേസില് അന്വേഷണം ആരംഭിച്ചതായി പൊലീസ്. കൊവിഡ് പരിശോധന ഫലം ലഭിക്കാത്തതിനാല് പ്രിയങ്കയുടെ ഇന്ക്വസ്റ്റ് നടപടികള് പൂര്ത്തിയാക്കായിട്ടില്ലെന്നും ഉണ്ണി പി ദേവിനെക്കുറിച്ചുള്ള വിവരങ്ങള് അങ്കമാലി പൊലീസിന് കൈമാറിയിട്ടുണ്ടെന്നും വട്ടപ്പാറ പൊലീസ് പറഞ്ഞു. ഉടന്തന്നെ ഇയാളെ കസ്റ്റഡിയിലെടുത്ത് ചോദ്യംചെയ്യാനാണ് പോലീസിന്റെ നീക്കം.
കഴിഞ്ഞദിവസമാണ് തിരുവനന്തപുരം വെമ്പായം കരിക്കകം വിഷ്ണു ഭവനില് ജെ പ്രിയങ്കയെ(25) വീടിനുള്ളില് തൂങ്ങിമരിച്ചനിലയില് കണ്ടെത്തിയത്. അങ്കമാലി വില്ലേജ് ഓഫ് ഇന്റര്നാഷണല് സ്കൂളിലെ കായിക അധ്യാപികയായിരുന്നു. ജീവനൊടുക്കുന്നതിന് തലേദിവസം നടനും ഭര്ത്താവുമായ ഉണ്ണിക്കെതിരേ പ്രിയങ്ക വട്ടപ്പാറ പോലീസില് പരാതി നല്കിയിരുന്നു. ഗാര്ഹിക പീഡനത്തിനിരയായെന്നും ഉണ്ണി നിരന്തരം ഉപദ്രവിച്ചെന്നും ചൂണ്ടിക്കാട്ടിയാണ് പ്രിയങ്ക പരാതി നല്കിയത്.
അങ്കമാലിയില് ഉണ്ണിയുടെ വീട്ടിലാണ് പ്രിയങ്കയും താമസിച്ചിരുന്നത്. തിങ്കളാഴ്ച പ്രിയങ്കയെ ഉപദ്രവിച്ച ശേഷം ഉണ്ണി വീട്ടില്നിന്ന് ഇറക്കിവിട്ടു. തുടര്ന്ന് പ്രിയങ്ക സഹോദരന് വിഷ്ണുവിനെ വിളിച്ചുവരുത്തി സ്വന്തം വീട്ടിലേക്ക് വരികയായിരുന്നു. ഇതിനുപിന്നാലെയാണ് പോലീസ് സ്റ്റേഷനില് പരാതി നല്കിയത്. എന്നാല്, കഴിഞ്ഞ ദിവസം പ്രിയങ്ക വീടിനുള്ളില് തൂങ്ങിമരിക്കുകയായിരുന്നു.
ഇതിനിടെ, വീട്ടില്നിന്ന് പുറത്താക്കിയ ശേഷം ഉണ്ണി പ്രിയങ്കയെ അസഭ്യം പറയുന്ന വീഡിയോ ദൃശ്യങ്ങള് ബന്ധുക്കള് പുറത്തുവിട്ടിരുന്നു. പ്രിയങ്ക സ്വന്തം മൊബൈല് ഫോണില് റെക്കോഡ് ചെയ്ത ദൃശ്യങ്ങളായിരുന്നു ഇത്. കേട്ടാലറയ്ക്കുന്ന ഭാഷയിലാണ് ഉണ്ണി ഭാര്യയെ തെറിവിളിക്കുന്നത്. ഇതെല്ലാം കേട്ട് പ്രിയങ്ക കരയുകയായിരുന്നു. ഇതിനൊപ്പം ഉണ്ണിയുടെ ആക്രമണത്തില് പരിക്കേറ്റതിന്റെ പാടുകളും പ്രിയങ്ക ഫോണില് റെക്കോഡ് ചെയ്തിരുന്നു. ഇതും ബന്ധുക്കള് കഴിഞ്ഞദിവസം പുറത്തുവിട്ടു.
ഇനി മുതല് കൈരളി ന്യൂസ് ഓണ്ലൈന് വാര്ത്തകള് വാട്സ്ആപ് ഗ്രൂപ്പിലും ലഭ്യമാണ്. വാര്ത്തകള്ക്കായി ഈ ലിങ്ക് അമര്ത്തൂ.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here