പ്രതിപക്ഷ നേതൃസ്ഥാനത്തേയ്ക്ക് വി ഡി സതീശനെ പിന്തുണച്ച് കോൺഗ്രസിലെ ഭൂരിഭാഗം എം എൽ എ മാരും

പ്രതിപക്ഷ നേതൃസ്ഥാനത്തേക്ക് വി ഡി സതീശനെ പിന്തുണച്ച് കോൺഗ്രസിലെ ഭൂരിഭാഗം എം എൽ എ മാരും. ആകെയുള്ള 21 എം എൽ എ മാരിൽ 12 പേർ വി ഡി സതീശനെ പിന്തുണയ്ക്കുന്നു. രമേശ് ചെന്നിത്തലയ്ക്ക് അദ്ദേഹത്തിൻ്റെത് അടക്കം 7 പേരുടെ പിന്തുണ .തിരുവഞ്ചൂരും , പി റ്റി തോമസും അവരെ പ്രതിപക്ഷ നേതാവ് ആക്കണം എന്ന് ആവശ്യപ്പെട്ടു. ഹൈക്കമാൻഡ് നിരീക്ഷകരോട് ആണ് എം എൽ എ മാർ തങ്ങളുടെ അഭിപ്രായം വെളിപ്പെടുത്തിയത്.

പുതിയ നിയമസഭാ കക്ഷി നേതാവിനെ തിരഞ്ഞെടുക്കുന്നതിന് മുന്നോടിയായി എം എൽ എ മാരുടെ മനസ് അറിയാൻ എത്തിയ ഹൈക്കമാൻഡ് പ്രതിനിധികളോടാണ് എം എല്‍ എ മാർ മനസ് അറിയിച്ചത്.എം എല്‍ എമാരെ ഒറ്റക്ക് ഒറ്റക്ക് കണ്ട ഹൈക്കമാൻഡ് പ്രതിനിധികൾ ആയ മല്ലിഖാർജുന ഖാർഗേ ,വൈദ്യലിംഗം എന്നിവർക്ക് മുന്നിലാണ് ഗ്രൂപ്പ് വ്യത്യാസം ഇല്ലാതെ കോൺഗ്രസ് എം എൽ എ മാർ അഭിപ്രായം തുറന്നടിച്ചത്.

ആകെയുള്ള 21 എം എൽ എ മാരിൽ പതിനൊന്ന് പേർ സതീശനെ പിന്തുണച്ചു .ഒരാൾ സതീശൻ വരുന്നതിൽ എതിർപ്പ് ഇല്ലെങ്കിലും , താൻ രമേശ് ചെന്നിത്തലയെ ആണ് നേതാവ് ആയി കാണുന്നത് എന്ന് പറഞ്ഞു. രമേശ് ചെന്നിത്തലയ്ക്ക് അദ്ദേഹത്തിൻ്റെ അടക്കം 7 പേരുടെ പിന്തുണയാണ് ലഭിച്ചത് .

ഉമ്മൻ ചാണ്ടി രമേശ് ചെന്നിത്തലയുടെ പേരിനെ പിൻതാങ്ങി. തിരുവഞ്ചൂർ , പി റ്റി തോമസ് എന്നിവർ പ്രതിപക്ഷ നേതൃസ്ഥാനത്തേക്ക് സ്വന്തം പേര് നിർദ്ദേശിച്ചു .പ്രതിപക്ഷ നേതാവിനെ സംബന്ധിച്ച എം എൽ എ മാരുടെ അഭിപ്രായം രേഖപ്പെടുത്തിയ റിപ്പോർട്ട് മല്ലിയാർജുന ഖാർഗേ , വൈദ്യലിംഗം എന്നിവർ സോണിയാ ഗാന്ധിക്ക് കൈമാറി.

എ ഗ്രൂപ്പിലെയും ,ഐ ഗ്രൂപ്പിലേയും എം എൽ എ മാർ വി.ഡി. സതീശൻ്റെ പേര് പറഞ്ഞത് ഇരു ഗ്രൂപ്പുകളെയും ഞെട്ടിച്ചിട്ടുണ്ട്. സ്വന്തം ആളുകൾ എന്ന് കരുതിയ ചിലർ സതീശൻ്റെ പേര് പറഞ്ഞത് ഐ ഗ്രൂപ്പിൽ വലിയ ആഘാതം ആണ് ഉണ്ടാക്കിയിരിക്കുന്നത്.

ഉമ്മൻ ചാണ്ടിയുടെ വിശ്വസ്തരായ ചിലർ എ ഗ്രൂപ്പ് നിർദ്ദേശം അവഗണിച്ച് സതീശൻ്റെ പേര് പറഞ്ഞത് എ ഗ്രൂപ്പ് വൃത്തങ്ങളിലും ചലനങ്ങൾ ഉണ്ടാക്കിട്ടുണ്ട്.  സതീശന് വേണ്ടി ചരട് വലി നടത്തിയത് കെ.സി വേണുഗോപാലും , കെ സുധാകരനും ചേർന്നാണെന്നാണ് കോൺഗ്രസ് വൃത്തങ്ങൾ നൽകുന്ന സൂചന.

കേരളത്തിലെ ഗ്രൂപ്പ് സമവായങ്ങളെ പരിപൂർണ്ണമായും അട്ടിമറിക്കുന്ന നിർണ്ണായക നീക്കം രമേശ് ചെന്നിത്തലയ്ക്ക് തിരിച്ചടിയാവും. എം എൽ എ മാരുടെ ഭൂരിപക്ഷ അഭിപ്രായം മാനിക്കാതെ ഹൈക്കമാൻഡ് രമേശ് ചെന്നിത്തലയെ പാർട്ടി നേതാവ് ആയി അടിച്ചേൽപ്പിച്ചാൽ ആ തീരുമാനത്തോട് പുതിയ കൂറ് മുന്നണി എങ്ങനെ പ്രതികരിക്കും എന്നത് നിർണ്ണായകമായ ചോദ്യം ആണ്. പ്രതിപക്ഷ നേതാവിനെ തിരഞ്ഞെടുക്കൽ ഹൈക്കമാൻഡിനും അത്രയെളുപ്പം ആവില്ലെന്ന സൂചനയാണ് കോൺഗ്രസ് ക്യാമ്പ് നൽകുന്നത്.