അടച്ചിട്ട മുറികളിലാണ് ഏറ്റവും എളുപ്പത്തില് കൊവിഡ് വ്യാപിക്കുക എന്നും എല്ലാ തൊഴില് സ്ഥാപനങ്ങളും വലിയ ശ്രദ്ധ ഇക്കാര്യത്തില് പുലര്ത്തണമെന്നും മുഖ്യമന്ത്രി പിണറായി വിജയന്. എ സി സ്ഥാപിക്കുന്നതിനു വേണ്ടി തയ്യാറാക്കപ്പെട്ട മുറികളില് പലപ്പോഴും ആവശ്യത്തിന് വായു സഞ്ചാരമുണ്ടാകില്ല. അതുകൊണ്ട് എസി പ്രവര്ത്തിപ്പിക്കാതെ ഇരുന്നതുകൊണ്ട് മാത്രം കാര്യമുണ്ടാകില്ല. അതോടൊപ്പം ഫാനുകളും വായു പുറന്തള്ളാന് സഹായിക്കുന്ന എക്സ്ഹോസ്റ്റ് ഫാനുകളും ഉപയോഗിക്കേണ്ടതുണ്ടെന്നും മുഖ്യമന്ത്രി വാര്ത്താ സമ്മേളനത്തില് പറഞ്ഞു.
ലോക്ക്ഡൗണ് കാലത്തൊക്കെ പ്രവര്ത്തിക്കേണ്ടിവരുന്ന, വര്ക്ക് ഫ്രം ഹോം സംവിധാനങ്ങള് പ്രായോഗികമല്ലാത്ത മാധ്യമസ്ഥാപനങ്ങള് പോലുള്ളവ ഇക്കാര്യം പ്രത്യേകം ശ്രദ്ധിക്കണമെന്ന് അഭ്യര്ത്ഥിക്കുന്നുവെന്നും മുഖ്യമന്ത്രി വ്യക്തമാക്കി.
കണ്ടെയിന്മെന്റ് സോണുകളില് നിര്മാണപ്രവര്ത്തനങ്ങള് നടത്തുന്നതിന് ഇപ്പോള് തടസ്സമില്ല. നിര്മാണസാമഗ്രികള് വില്ക്കുന്ന കടകള്ക്കും പ്രവര്ത്തനാനുമതി നല്കിയിട്ടുണ്ട്. അതിഥിത്തൊഴിലാളികള്ക്ക് ജോലിയും വരുമാനവും ഉറപ്പാക്കാന് ഇത് സഹായിക്കും.
കൊവിഡ് ബാധിച്ച് വീടുകളില് കഴിയുന്നവര് പറത്തുപോകാതെ നോക്കുന്നതിന് നിരീക്ഷണം ശക്തിപ്പെടുത്തിയിട്ടുണ്ട്. ഇങ്ങനെ കഴിയുന്നവര് വീടുകളില് തന്നെ ഉണ്ടോയെന്ന് ഉറപ്പാക്കുന്നതിനായി പൊലീസ് കണ്ട്രോള് റൂമില് നിന്ന് ഫോണ് ചെയ്ത് വിവരം അന്വേഷിക്കുന്ന സംവിധാനം നടപ്പാക്കാന് പൊലീസിന് നിര്ദ്ദേശം നല്കിയെന്നും മുഖ്യമന്ത്രി പറഞ്ഞു.
ലോക്ക്ഡൗണ് സമയത്ത് ജീവന്രക്ഷാ മരുന്നുകള് ഒരു ജില്ലയില് നിന്ന് മറ്റൊരു ജില്ലയില് എത്തിക്കുന്നതിന് പൊതുജനങ്ങള്ക്ക് ബുദ്ധിമുട്ട് അനുഭവപ്പെടുന്നുണ്ട്. ജീവന്രക്ഷാ മരുന്നുകള് വിവിധ സ്ഥലങ്ങളില് നിന്ന് ശേഖരിച്ച് നിര്ദ്ദിഷ്ട സ്ഥലങ്ങളില് എത്തിച്ചു നല്കുന്നതിന് പൊലീസ് ഏര്പ്പെടുത്തിയ സംവിധാനം വളരെ വിജയകരമായി പ്രവര്ത്തിച്ചുവരുന്നു.
പൊലീസ് ആസ്ഥാനത്തെ ഹൈവേ അലര്ട്ട് സെല്ലിന്റെ നേരിട്ടുള്ള നിയന്ത്രണത്തിലാണ് ഹൈവേ പട്രോള് വാഹനങ്ങള് മുഖേന ഒരു ജില്ലയില്നിന്ന് മറ്റൊരു ജില്ലയിലേയ്ക്ക് മരുന്ന് എത്തിക്കുന്നത്. കോവിഡിന്റെ രണ്ടാം വ്യാപനഘട്ടത്തില് വീണ്ടും ആരംഭിച്ച ഈ പദ്ധതിയിലൂടെ രണ്ടാഴ്ചകൊണ്ട് 910 പേര്ക്ക് മരുന്ന് എത്തിച്ചു.
കോവിഡ് കാലത്ത് ഒറ്റയ്ക്കു കഴിയുന്ന വയോജനങ്ങള് മാനസികമായി ഏറെ സമ്മര്ദ്ദം അനുഭവിക്കുന്നവരാണ്. ഇങ്ങനെ ഒറ്റയ്ക്ക് കഴിയുന്നവര്ക്ക് ആശ്വാസം നല്കാനായി
‘പ്രശാന്തി’ എന്ന ഹെല്പ്പ്ലൈന് സംവിധാനം പൊലീസിന്റെ നേതൃത്വത്തില് 24 മണിക്കൂറും പ്രവര്ത്തിക്കുന്നുണ്ട്. അതുപോലെതന്നെ കുട്ടികള്ക്ക് മാനസിക ഉല്ലാസം പകര്ന്നുനല്കാനായി ‘ചിരി’ എന്ന ഹെല്പ്പ്ലൈന് സംവിധാനം മുഖേനയും പൊലീസ് വളരെ കൃത്യമായി ഇടപെടല് നടത്തിവരുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here