പകരം വെക്കാനില്ലാത്ത പച്ച :കലാമണ്ഡലം ഗോപിയാശാന്റെ ശതാഭിഷേക ദിനമാണിന്ന് 

 1937ൽ  സാധാരണ കുടുംബത്തിൽ, വടക്കെ മണാളത്, എം. വി. ഗോവിന്ദൻ എന്നു വീട്ടുകാർ പേരിട്ട കൂട്ടി .പേരിട്ടത് ഗോവിന്ദൻ എന്നാണെങ്കിലും ഗോപി എന്ന വിളിപ്പേര് സ്വന്തമാക്കി മാറ്റിയ കുട്ടി നാറേരി മനയ്ക്കലെകളരിയിൽ തേക്കുംകാട്ടിൽ രാവുണ്ണിനായർക്കു ശിഷ്യപ്പെട്ടു കഥകളിചുവടുകൾ സ്വായത്തമാക്കി. കഥകളി ഭ്രാന്ത് മൂത്ത് കലാമണ്ഡലത്തിലെത്തി.നേരെ മഹാകവിയുടെ മുമ്പിൽ ചെന്നു പെട്ടു. ആരെയും വേഷം കെട്ടിച്ചു ചുവട് നോക്കി മാത്രം പ്രവേശനം നൽകുന്ന വള്ളത്തോൾ മഹാകവി ഒറ്റ നോട്ടത്തിൽ തന്നെ  കഥകളി പഠിക്കാൻ അനുമതി നൽകി.

നളന്റെയും, ബാഹുകന്റെയും, രുഗ്മാഗതന്റയും കർണ്ണന്റെയുമൊക്കെ ഒപ്പം ഗോപി എന്ന കഥകളി നടന്റെ പ്രയാണമാരംഭിച്ചു.നടന വിസ്മയങ്ങൾ അരങ്ങിൽ ഇടതടവില്ലാതെ തുദർന്നു .1958ൽ അവിടെ തന്നെ അദ്ധ്യാപകനുമായതോടെ ഗോപിയാശാനുമായി.രാവണൻ, കീചകൻ, ദുര്യോധനൻ തുടങ്ങിയ കത്തിവേഷങ്ങളും, സന്താന ഗോപാലത്തിലെ ബ്രാഹ്മണനുമൊക്കെ നന്നായി ഇണങ്ങുമെങ്കിലും പച്ചയായ് പകരുമ്പോഴാണ് ആ അഭിനയ മികവ് പൂർണ്ണതയിലെത്തുന്നത് എന്ന് കഥകളി കമ്പക്കാർ പറയും .

നളനായും, കർണ്ണനായും, രുഗ്മാങ്‌ഗതനാ യുമൊക്ക നിറഞ്ഞാടുമ്പോഴാണ് കഥകളി പ്രേമികളുടെ മനം നിറയുന്നത്. അർജുനൻ സുഭദ്രയെ പാണിഗ്രഹണം ചെയ്യുന്ന അപൂർവ സുന്ദരനിമിഷങ്ങൾ, അല്ലെങ്കിൽ നളദമയന്തി പുന:സ്സമാഗമത്തിന്റ സാഫല്യ നിമിഷങ്ങൾ ഇവയൊക്കെ ഗോപിആശാനിലൂടെ പൂർണ്ണത നേടുന്നത് കാണാൻ കാത്തിരിക്കുന്ന ആസ്വാദകർ.കഴിഞ്ഞ ഒരുവർഷമായി അരങ്ങിൽ എത്താൻ കഴിഞ്ഞിട്ടില്ല.കൊവിഡ് കാലം നൽകിയ ഇടവേള കവിതഎഴുതാൻ വിനിയോഗിക്കുകയാണ്.

ഭാരതസർക്കാർ  പത്മശ്രീ നൽകി ആദരിച്ചു. കേന്ദ്ര സംഗീതനാടക അക്കാദമി അവാർഡ്‌, കേരള സംഗീത അക്കാദമി അവാർഡ്‌, കേരള കലാമണ്ഡലം അവാർഡ്‌ എന്നിവയും ലഭിച്ചിട്ടുണ്ട്‌.

ചില സിനിമകളിലും കലാമണ്ഡലം ഗോപി വേഷമിട്ടിട്ടുണ്ട്‌. ഷാജി എൻ കരുണിന്റെ വാനപ്രസ്ഥം, ജയരാജിന്റെ ശാന്തം, ലൗഡ്‌സ്‌പീക്കർ എന്നിവയിൽ ശ്രദ്ധേയമായ വേഷമായിരുന്നു ഇദ്ദേഹം കൈകാര്യം ചെയ്തത്. ചന്ദ്രികയാണ് പത്നി. ജയരാജ്,രഘുരാജ് എന്നി മക്കൾ.