എല്ലാവരും ശ്വാസം അടക്കിപിടിച്ച നിമിഷങ്ങൾ; ചീറി പാഞ്ഞെത്തിയ ട്രെയിനിന്റെ മുന്നിലേക്ക് ചാടിയ പ്രതിയെ സാഹസികമായി രക്ഷപെടുത്തി പൊലീസുക്കാരൻ

മുംബൈ: മോഷണക്കേസിൽ കസ്റ്റഡിയിലെടുത്ത മുപ്പത്തിയെട്ടുക്കാരി രക്ഷപ്പെടാൻ ചാടിയത്​ അതിവേഗതയിൽ കുതിച്ചെത്തിയ ട്രെയിനിനുമുന്നിൽ. ട്രെയിൻ വരും മുമ്പ്​ ട്രാക്ക്​ കടന്ന്​ ഓടി രക്ഷപ്പെടാം എന്നുകരുതിയാണ്​ റിത സിങ് (38) എന്ന പ്രതി ഈ സാഹസത്തിന്​ മുതിർന്നത്​. എന്നാൽ, വെപ്രാളപ്പെട്ട്​ ചാടുന്നതിനിടെ കാൽ തെന്നി ട്രാക്കിൽ കമഴ്​ന്നടിച്ചു വീണു. കണ്ടുനിന്നവർ എന്തുചെയ്യണമെന്നറിയാതെ ശ്വാസമടക്കിപ്പിടിച്ച്​ നിൽക്കവെ, അസി.പൊലീസ് ഇൻസ്പെക്ടർ അർജുൻ ഗൻവത് ട്രാക്കിലേക്ക്​ എടുത്തുചാടി യുവതിയെ കോരിയെടുത്തു.

ഈ സമയം രണ്ടുപേരെയും ശ്രദ്ധയിൽപെട്ട ട്രെയിനിന്‍റെ ലോക്കോ പൈലറ്റ്​ വേഗത നിയന്ത്രിച്ച്​ ബ്രേക്കിടുകയും തൊട്ടുതൊട്ടില്ല എന്നമട്ടിൽ ട്രെയിൻ നിർത്തുകയും ചെയ്​തു. സ​മയോചിത ഇടപെടലിലൂടെ ജീവൻ തിരിച്ചുകിട്ടിയതിന്‍റെ ആശ്വാസത്തിലാണ്​ റിത സിങ്ങും പൊലീസുകാരും. സംഭവത്തിൽ ഗൻവതിനും റിത്തക്കും നിസ്സാര പരിക്കുകളേറ്റിട്ടുണ്ട്​.

ദാദർ സ്റ്റേഷൻ പരിധിയി​ൽ വിവിധ തട്ടിപ്പുകേസുകളിൽ പ്രതിയായ റിത സിങ്ങിന്‍റെ ഭർത്താവ്​ സന്തോഷ് കുമാർ സിംഗ് എന്ന ബബ്ലു താക്കൂറിനെ വ്യാഴാഴ്ച ദാദർ പൊലീസ് അറസ്റ്റ്​ ചെയ്​തിരുന്നു. വ്യാപാരികളെ അടക്കം കൊള്ളയടിച്ച ഇയാൾ നഗരത്തിൽ 10 ഇടങ്ങളിൽ സ്വത്തുക്കളും ടൊയോട്ട ഫോർച്യൂണർ ഉൾപ്പെടെ നിരവധി വാഹനങ്ങളും 1.5 കിലോ സ്വർണവും സ്വന്തമാക്കിയിരുന്നു. ആളുകൾക്ക്​ ​കൊള്ളപ്പലിശക്ക്​ പണം കൊടുകുന്ന ഇടപാടും ഇയാൾക്കുണ്ട്​. ദാദർ, ശിവാജി പാർക്ക് പൊലീസ് സ്റ്റേഷനുകളിലും ദാദർ ജിആർപി സ്റ്റേഷനിലും സിങ്ങിനെതിരെ നിരവധി കേസുകളുണ്ട്​. ഇതിന്‍റെ അന്വേഷണത്തിനിടയിലാണ്​ ഈ കുറ്റകൃത്യങ്ങളിൽ ഭാര്യ റിത സിങ്ങും (38) പങ്കാളിയാണെന്ന് പൊലീസിന്​ തെളിവ്​ ലഭിച്ചത്​. തുടർന്ന്​ റിതയെ നവി മുംബൈയിൽ നിന്ന് അറസ്റ്റ് ചെയ്യുകയായിരുന്നു.

തുടർന്ന്​ വെള്ളിയാഴ്ച ദാദറിലെ ജി‌ആർ‌പി പോലീസ് സ്റ്റേഷനിലേക്ക് കൊണ്ടുവരുമ്പോഴാണ്​ ലോക്കൽ ട്രെയിനിന്​ മുന്നിൽ ചാടിയത്​. രക്ഷാപ്രവർത്തനം നടത്തിയ അസി.പോലീസ് ഇൻസ്പെക്ടർ അർജുൻ ഗൻവതിനെ പൊലീസുദ്യോഗസ്​ഥർക്കുള്ള പാരിതോഷികത്തിന്​ ശുപാർശ ചെയ്യുമെന്ന്​ ദാദർ ജിആർപി പൊലീസ് സ്റ്റേഷനിലെ സീനിയർ പൊലീസ് ഇൻസ്പെക്ടർ ധാന്യേശ്വർ കട്കർ പറഞ്ഞു.

“പ്രതി ഓടിപ്പോകുകയോ ട്രെയിനിനടിയിൽ കുടുങ്ങി മരിക്കുകയോ ചെയ്യുമെന്ന് ഞാൻ ഭയപ്പെട്ടു. രണ്ടായാലും അവൾ ഞങ്ങളുടെ കസ്റ്റഡിയിലായതിനാൽ ഞങ്ങളെയാണ്​ എല്ലാവരും കുറ്റപ്പെടുത്തുക. അതിനാൽ, എന്ത് വില കൊടുത്തും അവളെ രക്ഷിക്കേണ്ടത്​ ഞങ്ങളുടെ കടമയായിരുന്നു” -സാഹസിക രക്ഷാപ്രവർത്തനത്തെ കുറിച്ച്​ ഗൻവത് പറഞ്ഞു.