വാക്സിന് ലഭ്യത ഉറപ്പാക്കാന് കേന്ദ്രം ആഗോള ടെണ്ടര് വിളിക്കണം: മുഖ്യമന്ത്രി വാക്സിന് എല്ലാ ജനങ്ങള്ക്കും ലഭ്യമാക്കാന് കേന്ദ്ര സര്ക്കാര് ആഗോള ടെണ്ടറിലൂടെ നടപടി സ്വീകരിക്കണമെന്ന് ആവശ്യപ്പെട്ട് പ്രധാനമന്ത്രിക്ക് കത്തയച്ചിട്ടുണ്ടെന്നും വാക്സിന് ലഭ്യമാക്കാന് കേന്ദ്രസര്ക്കാരിനുമേല് കേരളം നിരന്തരം സമ്മര്ദ്ദം ചെലുത്തുന്നുണ്ടെന്നും മുഖ്യമന്ത്രി പിണറായി വിജയന് നിയമസഭയെ അറിയിച്ചു.
ഒരു കോടി കോവിഡ് വാക്സീനു സംസ്ഥാന സര്ക്കാര് ഓര്ഡര് നല്കിയിട്ടുണ്ടെന്നും 28,44,000 വാക്സിന് ഡോസുകള് ഈ മാസം ലഭ്യമാവുമെന്നും മുഖ്യമന്ത്രി നിയമസഭയെ അറിയിച്ചു. നിയമസഭാംഗം പി നന്ദകുമാറിന്റെ ശ്രദ്ധക്ഷണിക്കലിന് മറുപടി പറയുകയായിരുന്നു മുഖ്യമന്ത്രി.
കോവിഡ് പ്രതിരോധ വാക്സിന് എല്ലാവര്ക്കും സൗജന്യമായി ലഭ്യമാക്കണമെന്നാണ് സംസ്ഥാന സര്ക്കാരിന്റെ അഭിപ്രായം. ഈ നയം ഒന്നിലധികം തവണ വ്യക്തമാക്കിയിട്ടുള്ളതുമാണ്. കേന്ദ്രസര്ക്കാരിനെ ഈ അഭിപ്രായം വളരെ ശക്തമായിത്തന്നെ അറിയിച്ചിട്ടുള്ളതുമാണ്.
പൊതുജനങ്ങളുമായി കൂടുതല് സമ്ബര്ക്കം പുലര്ത്തേണ്ടിവരുന്ന ജനവിഭാഗങ്ങള്ക്ക് വാക്സിന് നല്കുന്നതിന് മുന്ഗണന നല്കുന്നുണ്ടെന്നും മുഖ്യമന്ത്രി പറഞ്ഞു. സംസ്ഥാനത്ത് ലഭിച്ച വാക്സിന് ഒട്ടും പാഴാക്കാതെ (സീറോ വേസ്റ്റേജ്) ഉപയോഗപ്പെടുത്തിയത് കേന്ദ്രസര്ക്കാര് പ്രത്യേകമായി പരാമര്ശിച്ചിട്ടുണ്ട്.
സംസ്ഥാനം 70 ലക്ഷം കോവിഷീല്ഡ് വാക്സിനും 30 ലക്ഷം കോവാക്സിന് വാക്സിനും കേരള മെഡിക്കല് സര്വീസ് കോര്പ്പറേഷന് വഴി ഓര്ഡര് നല്കിയിട്ടുണ്ട്. വാക്സിന് ലഭ്യമാക്കാന് ആഗോള ടെണ്ടര് വിളിക്കുന്ന കാര്യത്തിലും നടപടി സ്വീകരിച്ചിട്ടുണ്ട്.
കൂടാതെ പൊതുനന്മയെക്കരുതി വാക്സീന് എല്ലാവര്ക്കും ലഭ്യമാക്കാനുള്ള നടപടികള് സ്വീകരിക്കണമെന്ന് പ്രധാനമന്ത്രിയോട് കത്തെഴുതി ആവശ്യപ്പെടുകയും ചെയ്തിട്ടുണ്ട്’, മുഖ്യമന്ത്രി അറിയിച്ചു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here