കൊടകര കുഴല്പ്പണക്കേസില് ബിജെപി സംസ്ഥാന അധ്യക്ഷന് കെ സുരേന്ദ്രന്റെ സെക്രട്ടറിയേയും ഡ്രൈവറേയും ചോദ്യം ചെയ്ത് വിട്ടയച്ചു. സെക്രട്ടറി ദിപിനേയും ഡ്രൈവര് ലെബീഷിനേയുമാണ് ചോദ്യം ചെയ്ത് വിട്ടയച്ചത്. തൃശൂര് പോലീസ് ക്ലബ്ബിലായിരുന്നു ചോദ്യം ചെയ്യല്. 3 മണിക്കൂര് ചോദ്യം ചെയ്യല് നീണ്ടു.
നിയമസഭാ തെരഞ്ഞെടുപ്പില് കെ. സുരേന്ദ്രന് മത്സരിച്ച കോന്നിയില് നിന്ന് അന്വേഷണ സംഘം കഴിഞ്ഞ ദിവസം വിവരങ്ങള് ശേഖരിച്ചിരുന്നു.
ബി.ജെ.പി നേതാക്കള് താമസിച്ച ഹോട്ടലിലെത്തി രേഖകള് പരിശോധിച്ചു. ഹോട്ടല് രജിസ്റ്ററിലെ വിവരങ്ങളും എത്ര പണം നല്കി തുടങ്ങിയ വിവരങ്ങളുമാണ് ശേഖരിച്ചത്.
അതേസമയം കൊടകര കുഴല്പ്പണ കവര്ച്ചാക്കേസിലെ പ്രതികള് തൃശൂര് ബി.ജെ.പി. ഓഫീസില് എത്തിയെന്നാണ് അന്വേഷണ സംഘം വ്യക്തമാക്കുന്നത്. പ്രതികളായ ദീപക്, രഞ്ജിത്ത് എന്നിവരാണ് തൃശൂര് പാര്ട്ടി ഓഫീസില് എത്തിയതെന്നും റിപ്പോര്ട്ടുകള് ഉണ്ടായിരുന്നു.
അതേസമയം കേസില് എന്ഫോഴ്സ്മെന്റ് ഡയറക്ടറേറ്റ് പ്രാഥമിക അന്വേഷണം തുടങ്ങി. പൊലീസ് എഫ്ഐആര് ശേഖരിച്ച ഇഡി അന്വേഷണ സംഘത്തിന്റെ കണ്ടെത്തലുകളും പരിശോധിച്ചു. കേസ് ഏറ്റെടുക്കുന്നത് സംബന്ധിച്ച് 10 ദിവസത്തിനകം നിലപാട് അറിയിക്കാന് ഹൈക്കോടതിയും ഇഡിയ്ക്ക് നിര്ദ്ദേശം നല്കിയിട്ടുണ്ട്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here