കുരുന്നുകള്‍ക്ക് വര്‍ണ്ണക്കടലാസുകളില്‍ പൊതിഞ്ഞ ഡിവൈഎഫ്‌ഐയുടെ ‘സ്‌നേഹമധുരം’

ലോക്ഡൗണ്‍ കാലത്ത് ഭക്ഷണം മാത്രമല്ല കുട്ടികള്‍ക്ക് മധുരങ്ങളും പലഹാരങ്ങളും എത്തിച്ചു നല്‍കുകയാണ് ഡിവൈഎഫ്ഐ പ്രവര്‍ത്തകര്‍. സ്നേഹമധുരം എന്ന പേരിലാണ് വര്‍ണ്ണക്കടലാസുകളില്‍ പൊതിഞ്ഞ ബേക്കറി കിറ്റുകള്‍ കുഞ്ഞുകരങ്ങളിലേക്കെത്തിയത്. കോട്ടയം ജില്ലയിലെ പൊന്‍കുന്നത്താണ് ഡിവൈഎഫ്ഐയുടെ ഈ വ്യത്യസ്തമായ പ്രവര്‍ത്തനം.

പതിനൊന്ന് ഇനങ്ങളടങ്ങിയ ബേക്കറി പലഹാരങ്ങളാണ് ഈ വര്‍ണ്ണക്കടലാസുകള്‍ക്കുള്ളില്‍. ലോക്ക്ഡൗണില്‍ വീടുകളില്‍ അകപ്പെട്ടു പോയ കുഞ്ഞുമക്കള്‍ക്ക് കരുതലിന്റെ മധുരം നല്‍കുന്നത് പൊന്‍കുന്നം അട്ടിക്കല്‍ പ്രദേശത്തെ ഡിവൈഎഫ്ഐ-സിപിഐഎം പ്രവര്‍ത്തകരാണ്. മേഖലയിലെ 90 വീടുകളിലേക്കാണ് ഈ മധുരപ്പൊതികളെത്തുന്നത്. നാട്ടിലെ ചെറുകിട സ്ഥാപനങ്ങളും ആളുകളുമൊക്കെ സഹകരിച്ചപ്പോഴാണ് കുട്ടികള്‍ക്കായുള്ള കിറ്റുകളൊരുങ്ങിയത്.

സ്നേഹമധുരത്തിന്റെ വിതരണോദ്ഘാടനം സിപിഐഎം ജില്ലാ കമ്മറ്റിയംഗം അഡ്വ.ഗിരീഷ് നിര്‍വ്വഹിച്ചു. മേഖലയില്‍ അഞ്ചു ഘട്ടങ്ങളിലായി ഭക്ഷ്യക്കിറ്റുകളും മരുന്നുകളും എത്തിച്ചു നല്‍കിയതിനു ശേഷമാണ് കുട്ടികള്‍ക്കായുള്ള പലഹാരങ്ങളുടെ വിതരണവും നടത്തിയത്. മുപ്പതോളം വരുന്ന ഡിവൈഎഫ്ഐ പ്രവര്‍ത്തകര്‍ വിവിധ സംഘങ്ങളായി തിരിഞ്ഞാണ് എല്ലാ വീടുകളിലും സ്നേഹപ്പൊതികളെത്തിച്ചത്.

whatsapp

കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക

Click Here