കൊച്ചി ഫ്ളാറ്റില് യുവതിയെ പീഡിപ്പിച്ച കേസിലെ പ്രതി മാര്ട്ടിന് ജോസഫിനെ കോടതി റിമാന്ഡ് ചെയ്തു. ഈ മാസം 23 വരെയാണ് മാര്ട്ടിനെ കോടതി റിമാന്ഡ് ചെയ്തത്. പ്രതിക്കായി പൊലീസ് പിന്നീട് കസ്റ്റഡി അപേക്ഷ നല്കും.
മാര്ട്ടിന് ജോസഫിന്റെ ജാമ്യാപേക്ഷ ഹൈക്കോടതി തള്ളിയിരുന്നു. മുന്കൂര് ജാമ്യപേക്ഷ നിലനില്ക്കേ പ്രതിയെ അറസ്റ്റ് ചെയ്ത പൊലീസ് നടപടിയില് തെറ്റില്ലെന്നും കോടതി വ്യക്തമാക്കി.
ഇന്നലെ രാത്രിയാണ് തൃശൂരിലെ വനമേഖലയില് നിന്നും മാര്ട്ടിന് അന്വേഷണ സംഘത്തിന്റെ പിടിയിലാകുന്നത്. തൃശൂര് മുണ്ടൂരിനടുത്തുള്ള പ്രദേശത്ത് നിന്നാണ് ഇയാളെ പൊലീസ് പിടികൂടിയത്. പ്രദേശ വാസികളുടെ അടക്കം സഹായത്തോടെയാണ് ഒളിവില് കഴിയുകയായിരുന്ന മാര്ട്ടിന് ജോസഫിനെ കണ്ടെത്തിയത്.
മുണ്ടൂരില് നിന്ന് കഴിഞ്ഞ ദിവസം മാര്ട്ടിന് ജോസഫിന്റെ സുഹൃത്തിനെ പൊലീസ് പിടികൂടിയിരുന്നു. ആ സമയത്ത് മാര്ട്ടിനും ഇതേ പരിസരത്തുണ്ടായിരുന്നു എന്നാണ് അന്വേഷണ സംഘത്തിന് ലഭിച്ച വിവരം. ഇതിന്റെ അടിസ്ഥാനത്തിലാണ് മുണ്ടൂര് മേഖല കേന്ദ്രീകരിച്ച് അന്വേഷണം നടത്തിയത്.
കൊച്ചി മറൈന് ഡ്രൈവിലെ ഫ്ളാറ്റില് വച്ച് കണ്ണൂര് സ്വദേശിനിയായ യുവതിക്കാണ് പ്രതി മാര്ട്ടിന് ജോസഫ് പുലിക്കോട്ടിലില് നിന്ന് ക്രൂരപീഡനം നേരിടേണ്ടിവന്നത്. എറണാകുളത്ത് ജോലി ചെയ്യുമ്പോഴാണ് ഇരുവരും പരിചയപ്പെടുന്നത്. കഴിഞ്ഞ വര്ഷം ലോക്ഡൗണ് സമയത്ത് കൊച്ചിയില് കുടുങ്ങിയപ്പോഴാണ് സുഹൃത്തായ മാര്ട്ടിനൊപ്പം യുവതി താമസിക്കാന് തുടങ്ങിയത്. മാര്ട്ടിന്റെ കൊച്ചി മറൈന് ഡ്രൈവിലെ ഫ്ളാറ്റിലായിരുന്നു താമസം. കഴിഞ്ഞ ഫെബ്രുവരി മുതല് മുറിയില് പൂട്ടിയിട്ട് മാര്ട്ടിന് അതിക്രൂരമായി പീഡിപ്പിക്കുകയായിരുന്നുവെന്ന് യുവതിയുടെ പരാതിയില് പറയുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here