വീട്ടുമുറ്റത്തെ ഒരു മാവും അതിലെ മാങ്ങകളും സംരക്ഷിക്കാന്‍ നിങ്ങള്‍ എന്തൊക്കെ ചെയ്യും? എന്തായാലും കാവല്‍ക്കാരെ നിയോഗിക്കില്ല. എന്നാല്‍, മധ്യപ്രദേശിലെ ദമ്പതികള്‍ തങ്ങളുടെ പൂന്തോട്ടത്തിലെ രണ്ടു മാവും അതിലെ മാങ്ങകളും സംരക്ഷിക്കാന്‍ നിയോഗിച്ചത് നാലു കാവല്‍ക്കാരെയും ആറു നായ്ക്കളെയും.
കാരണം മറ്റൊന്നല്ല, ഇവരുടെ പൂന്തോട്ടത്തിലുണ്ടായത് ലോകത്തിലെ ഏറ്റവും വിലകൂടിയ മാങ്ങകളായതാണ് അതിന്‍റെ കാരണം. ലോകത്തിലെ ഏറ്റവും വില കൂടിയതാണ് ജപ്പാനിലെ മിയാസക്കി മാങ്ങകള്‍. ഇന്ത്യയില്‍ അപൂര്‍വമായി മാത്രം ലഭ്യമാകുന്ന ഈ മാങ്ങകള്‍ക്ക് ലക്ഷങ്ങള്‍ വരെ വിലവരും.
ജബല്‍പുര്‍ സ്വദേശിയായ സങ്കല്‍പ്പ് പരിഹാസിന് ചെന്നൈയിലെ ഒരു ട്രെയിന്‍ യാത്രക്കിടെ ഒരാള്‍ നല്‍കിയതാണ് ഈ മാവിന്‍ തൈകള്‍.
അദ്ദേഹവും ഭാര്യ റാണിയും ചേര്‍ന്ന് വീട്ടുമുറ്റത്തെ പൂന്തോട്ടത്തില്‍ മാവിന്‍ തൈകള്‍ നട്ട് സംരക്ഷിച്ചുപോന്നു. സാധാരണ മാങ്ങകളാണെന്നായിരുന്നു ഇവരുടെ വിചാരം.
എന്നാല്‍, മരം വളര്‍ന്നതോടെ സാധാരണപോലെയായിരുന്നില്ല ഇലകള്‍. അതിലുണ്ടായ മാങ്ങകളാകട്ടെ പല പ്രത്യേകതകള്‍ നിറഞ്ഞതും. തുടര്‍ന്ന് ദമ്പതികള്‍ ഈ മാങ്ങയെക്കുറിച്ച്‌ ഗവേഷണം ആരംഭിച്ചു. എന്നാല്‍, ഗവേഷണത്തിന് ശേഷം മധുരമുള്ള സമ്മാനമാണ് ലഭിച്ചിരിക്കുന്നതെന്ന് ദമ്പതികള്‍ തിരിച്ചറിയുകയായിരുന്നു.
ലോകത്തിലെ തന്നെ ഏറ്റവും വിലകൂടിയ മാങ്ങകളിലൊന്നാണ് മിയാസക്കി മാങ്ങകള്‍. അന്താരാഷ്ട്ര വിപണിയിലാണ് ഇവക്ക് ആവശ്യക്കാരേറെ. കഴിഞ്ഞവര്‍ഷം അന്താരാഷ്ട്ര വിപണിയില്‍ 2.70 ലക്ഷം രൂപക്കാണ് ഇവര്‍ മാങ്ങകള്‍ വിറ്റത്.
മുന്‍ വര്‍ഷം നിരവധി മാങ്ങകള്‍ ഇവിടെ മോഷണം പോയിരുന്നു. അത്യപൂര്‍വമായ മാങ്ങയാണെന്ന വിവരം പ്രദേശത്ത് പരന്നതോടെയായിരുന്നു സംഭവം.
മാങ്ങകള്‍ മോഷണം പോകുന്നത് പതിവായതോടെയാണ് മാങ്ങകളുടെ സംരക്ഷണത്തിനായി നാലു കാവല്‍ക്കാരെയും ആറു നായ്ക്കളെയും ദമ്പതികള്‍ നിയോഗിച്ചത്.
ഈ സീസണില്‍ മാവുകള്‍ പൂവിട്ടു തുടങ്ങിയതോടെ തന്നെ ദമ്ബതികള്‍ക്ക് ഓര്‍ഡറുകളും ലഭിച്ചിരുന്നു. ഗുജറാത്ത് ആസ്ഥാനമായ ബിസനിസുകാരന്‍ ഒരു മാങ്ങക്ക് 21,000 രൂപ വീതം നല്‍കാമെന്ന് ദമ്പതികള്‍ക്ക് വാഗ്ദാനം ചെയ്തതായി പ്രാദേശിക മാധ്യമം റിപ്പോര്‍ട്ട് ചെയ്യുന്നു.
ഉയര്‍ന്നതോതില്‍ ബീറ്റാ കരോട്ടിന്‍, ഫോളിക് ആസിഡ്, ആന്‍റി ഓക്സിഡന്‍റുകള്‍ തുടങ്ങിയവ അടങ്ങിയിരിക്കുന്ന മാമ്പഴമാണ് മിയാസക്കി. കാഴ്ച ശക്തി വര്‍ധിപ്പിക്കാന്‍ ഉത്തമമാണെന്നാണ് നിഗമനം. ജപ്പാനിലെ മിയാസക്കി നഗരത്തിലാണ് ആദ്യം ഈ മാങ്ങകളുണ്ടായത്. അതിനാലാണ് മിയാസക്കി എന്ന് മാമ്പഴത്തിന് പേരിട്ടതും.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
