നരേന്റെ കരിയറിലെ ഏറ്റവും പ്രധാനപ്പെട്ട ചിത്രങ്ങളിലൊന്നാണ് ലോകേഷ് കനകരാജ് സംവിധാനം ചെയ്ത കൈതി. കൈതി എന്ന ചിത്രത്തിന് ശേഷം ലോകേഷ് കനകരാജ് സംവിധാനം ചെയ്യുന്ന പുതിയ ചിത്രത്തില്‍ അഭിനയിക്കുന്ന സന്തോഷം പങ്കുവച്ച് രംഗത്തെത്തിയിരിയ്ക്കുകയാണിപ്പോള്‍ നരേന്. കമല്‍ ഹസന്‍ നായകനാകുന്ന വിക്രം എന്ന ചിത്രത്തെ സംബന്ധിച്ച വാര്‍ത്തകള്‍ നേരത്തെ തന്നെ പുറത്ത് വന്നതാണ്.
കമല്‍ ഹസനൊപ്പം വിജയ് സേതുപതിയും ഫഹദ് ഫാസിലും പ്രധാന വേഷത്തിലെത്തുന്നു എന്ന വാര്‍ത്ത മലയാളികളും ആഘോഷിച്ചതാണ് . ഈ ചിത്രത്തിലേക്കാണ് ഇപ്പോള്‍ നരേനും അവസരം ലഭിച്ചിരിയ്ക്കുന്നത്. ചിത്രത്തിന്റെ ടൈറ്റില്‍ ടീസര്‍ കണ്ടപ്പോള്‍ ലോകേഷിനെ വിളിക്കുകയും, വിക്രം എന്ന ചിത്രത്തില്‍ അഭിനയിക്കാന്‍ താത്പര്യമുണ്ട് എന്നും നരേന് പറയുകയും ചെയ്തിരുന്നുവത്രെ. അപ്പോഴാണ് നരേന് ഈ ചിത്രത്തില്‍ ഒരു റോള്‍ ഉണ്ടെന്ന് സംവിധായകന്‍ പറഞ്ഞത്.
പുതിയ ചിത്രത്തിന്റെ ഷൂട്ടിങുമായി ബന്ധപ്പെട്ട് ദുബായില്‍ ആയിരുന്നു ഞാന്‍ ആ സമയത്ത്. നാട്ടില്‍ തിരിച്ചെത്തിയപ്പോള്‍ തിരക്കഥ കിട്ടി. ചിത്രത്തിലെ എന്റെ കഥാപാത്രത്തിന് വളരെ അധികം പ്രാധാന്യം ഉണ്ട്. കമല്‍ ഹസന്‍ സാറിനൊപ്പം അഭിനയിക്കുക എന്നത് എന്റെ സ്വപ്ന സാഫല്യമാണ്. ഞാന്‍ സിനിമ അഭിനയിക്കാന്‍ ആഗ്രഹിച്ചത് തന്നെ കമല്‍ സാറിനെയൊക്കെ കണ്ടിട്ടാണ്. അതും ലോകേഷിന്റെ ചിത്രത്തില്‍ അഭിനയിക്കുക എന്നാല്‍ അത് ഇരട്ടി മധുരമാണ്- നരേന് പറഞ്ഞു.
തന്റെ കരിയറിലെ നാഴിക കല്ലായിരിയ്ക്കും ഈ ചിത്രമെന്നും നരേന് പറയുന്നു. കൈതി എന്ന ചിത്രത്തെക്കാള്‍ വലിയൊരു സ്‌കെയിലില്‍ ചെയ്യുന്ന ചിത്രമാണ് വിക്രം. ചിത്രത്തിന് വേണ്ടി പ്രത്യേകിച്ച് ഗെറ്റപ്പുകള്‍ ഒന്നും സ്വീകരിക്കുന്നില്ല. സാധാരണമാണ്. ചിത്രത്തിലെ എന്റെ പോര്‍ഷന്‍ ആഗസ്റ്റ് മാസം ഷൂട്ട് ചെയ്യും. കൈതി എന്ന ചിത്രത്തിന് ശേഷം എനിക്ക് തമിഴില്‍ നിന്നും ധാരാളം അവസരങ്ങള്‍ വന്നിരുന്നു. എന്നാല്‍ ഭൂരിഭാഗവും പൊലീസ് വേഷങ്ങളായിരുന്നു. ടൈപ്പ് കാസ്റ്റ് ചെയ്യപ്പെടാന്‍ താത്പര്യമില്ലാത്തത് കൊണ്ടാണ് ആ സിനിമകള്‍ നിഷേധിച്ചത്- നരേന് വ്യക്തമാക്കി.
ഒത്തയ്ക്ക് ഒത്തൈ എന്ന ചിത്രത്തില്‍ അഭിനയിച്ചുകൊണ്ടിരിയ്ക്കുകയായിരുന്നു നരേന്. ലോക്ക് ഡൗണ്‍ കാരണം ചിത്രീകരണം നിര്‍ത്തി വച്ചിരിയ്ക്കുകയാണ്. അടുത്ത തമിഴ് ചിത്രത്തിന്റെ ചര്‍ച്ചകള്‍ നടന്നുകൊണ്ടിരിക്കുകയാണെന്നും, വൈകാതെ ഔദ്യോഗിക പ്രഖ്യാപനം ഉണ്ടാവും എന്നും നരേന് പറഞ്ഞു.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ് ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
