അഭിനയത്തില്‍ അഞ്ച് പതിറ്റാണ്ട് പിന്നിടുന്ന മമ്മൂട്ടിക്ക് ആശംസയറിയിച്ച് ജോൺ ബ്രിട്ടാസ് എം പി

മമ്മൂക്കയെ(മമ്മൂട്ടി) കുറിച്ച് ഞാനെന്തെങ്കിലും എഴുതിയാൽ അതിൽ ഒരുപാട് അനൗചിത്യമുണ്ടാകും. ദിവസേനയെന്നോണം ബന്ധപ്പെടുന്ന ഒരു വ്യക്തിയെക്കുറിച്ച് എഴുതുക എന്നത് വളരെ പ്രയാസമുള്ള കാര്യം കൂടിയാണ്. കഴിഞ്ഞ രണ്ടു പതിറ്റാണ്ടായി എനിക്ക് മമ്മൂക്കയെ നന്നായി അറിയാം. സൂര്യന് താഴെയുള്ള എല്ലാ കാര്യങ്ങളും സംസാരിക്കാറുമുണ്ട്. അദ്ദേഹത്തിന്റെ അഭിനയകലയുടെ അഞ്ച് പതിറ്റാണ്ട് പൂർത്തിയാകുമ്പോൾ എന്താണ് എഴുതേണ്ടതെന്ന് എനിക്ക് നിശ്ചയമില്ല എന്നതാണ് യാഥാർഥ്യം.

മമ്മൂക്ക എന്ന നടനെകുറിച്ച് സമസ്ത പ്രതലങ്ങളിൽ നിന്നുമുള്ള ആഖ്യാനങ്ങളും വ്യാഖ്യാനങ്ങളും ദിവസേന എന്നോണം പ്രവഹിക്കുന്നുണ്ട്. ആ മേഖലയിൽ എന്നേക്കാൾ എത്രയോ ഗ്രാഹ്യമുള്ള വ്യക്തികളാണ് ഈ വിഷയത്തെ സമ്പുഷ്ടമാക്കുന്നത്.