കര്ണ്ണാടക ചാമുണ്ഡി ഹില്സിന് സമീപം എം.ബി.എ. വിദ്യാര്ഥിനിയെ കൂട്ടബലാത്സംഗം ചെയ്ത കേസില് അഞ്ച് പ്രതികള് അറസ്റ്റില്. തമിഴ്നാട് തിരുപ്പൂര് സ്വദേശികളാണ് പിടിയിലായത്. ഇവരിലൊരാള് പ്രായപൂര്ത്തിയാകാത്ത ആളാണെന്നാണ് പുറത്തുവരുന്ന റിപ്പോര്ട്ട്.
കര്ണാടക ഡി.ജി. പ്രവീണ് സൂദ് വിളിച്ചുചേര്ത്ത വാര്ത്താസമ്മേളനത്തിലാണ് അഞ്ച് പ്രതികളും അറസ്റ്റിലായെന്ന വിവരം സ്ഥിരീകരിച്ചത്. നിര്മാണ തൊഴിലാളികളായ പ്രതികള് തമിഴ്നാട്ടില്നിന്ന് മൈസൂരുവില് ജോലിക്കെത്തിയതാണ്. ഇവര് സംഭവത്തിനുശേഷം രക്ഷപ്പെടുകയായിരുന്നുവെന്നും കര്ണാടക ഡി.ജി. പറഞ്ഞു. അതേസമയം, പ്രതികളെ കുറിച്ചുള്ള ഒരു വിവരവും പുറത്തു വിട്ടിട്ടില്ല.
ചൊവ്വാഴ്ച രാത്രിയാണ് മൈസൂരു ചാമുണ്ഡിഹില്സിന് സമീപത്തെ വിജനമായസ്ഥലത്തുവെച്ച് എം.ബി.എ. വിദ്യാര്ഥിനി കൂട്ടബലാത്സംഗത്തിനിരയായത്. ഒപ്പമുണ്ടായിരുന്ന സുഹൃത്തിനെ ആക്രമിച്ചശേഷമാണ് പ്രതികള് പെണ്കുട്ടിയെ ബലാത്സംഗം ചെയ്തത്. ഗുരുതരമായി പരിക്കേറ്റ പെണ്കുട്ടി ഇപ്പോഴും ആശുപത്രിയില് ചികിത്സയിലാണ്.
അതിനിടെ, കേസിലെ പ്രതികളെ തേടി കേരളത്തിലേക്കടക്കം അന്വേഷണം വ്യാപിപ്പിച്ചതായി ചില പോലീസ് ഉദ്യോഗസ്ഥര് നേരത്തെ സൂചന നല്കിയിരുന്നു. പ്രതികളുടെ മൊബൈല് ടവര് ലൊക്കേഷന്റെ അടിസ്ഥാനത്തിലാണ് പോലീസ് കേന്ദ്രങ്ങള് ഇത്തരം സൂചനകള് നല്കിയത്. പ്രതികള് എന്ജിനീയറിങ് വിദ്യാര്ഥികളാണെന്ന സൂചനകളും പുറത്തുവന്നിരുന്നു. എന്നാല് ഇതിനുപിന്നാലെയാണ് അഞ്ച് പ്രതികളെയും തമിഴ്നാട്ടില്നിന്ന് പിടികൂടിയതായി ഉന്നത പോലീസ് ഉദ്യോഗസ്ഥര് സ്ഥിരീകരിച്ചത്.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here