ട്രെയിനുകൾ വൈകിയാൽ യാത്രക്കാർക്ക് റെയിൽവേ നഷ്ടപരിഹാരം നൽകണമെന്ന് സുപ്രീംകോടതി

ട്രെയിനുകൾ അകാരണമായി വൈകി ഓടിയാൽ യാത്രക്കാർക്ക് റെയിൽവേ നഷ്ടപരിഹാരം നൽകണമെന്ന് സുപ്രീംകോടതി. 2016 ൽ കുടുംബത്തോടൊപ്പം ജമ്മുവിലേക്ക് യാത്ര ചെയ്യുമ്പോൾ ട്രെയിൻ നാല് മണിക്കൂർ വൈകിയതിനെ തുടർന്ന് നഷ്ടം നേരിട്ട യാത്രക്കാരന് ന​ഷ്‍ട​പ​രിഹാ​രം നൽ​ക​ണ​മെ​ന്ന ദേ​ശീ​യ ഉ​പ​ഭോ​ക്തൃ ത​ർ​ക്ക​പ​രി​ഹാ​ര ക​മ്മീ​ഷ​ൻറെ ഉ​ത്ത​ര​വ് ശ​രി​വ​ച്ചാ​ണ് സു​പ്രീം​കോ​ട​തി​യു​ടെ സു​പ്ര​ധാ​ന വി​ധി.

ജില്ലാ ഉപഭോക്തൃ ഫോറം റെയിൽവേയുടെ സേവനത്തിലെ പോരായ്മയായി ഇതിനെ ചൂണ്ടിക്കാട്ടി. അസംതൃപ്തനായ യാത്രക്കാരന് 25,000 രൂ​പ ന​ഷ്ട​പ​രി​ഹാ​ര​മാ​യും 5000 രൂ​പ വീ​തം ഇ​വ​ർ നേ​രി​ട്ട മാനസി​ക ക്ലേ​ശ​ത്തി​ന് പ​രി​ഹാ​ര​മാ​യും അ​തി​ന് പു​റ​മേ വ്യ​വ​ഹാ​ര ചെ​ല​വും ഒ​രു മാ​സ​ത്തിനുള്ളിൽ ന​ൽ​ക​ണ​മെ​ന്നായിരുന്നു ത​ർ​ക്ക​പ​രി​ഹാ​ര സ​മിതി നോർത്ത് വെസ്റ്റേൺ റെയിൽവേയോട് നിർദേശിച്ചത്.ഈ നടപടിക്കെതിരെയാണ് റെയിൽവേ സുപ്രീംകോടതിയിൽ എത്തിയതും തിരിച്ചടി നേരിട്ടതും.

ട്രെ​യി​ൻ വൈ​കി ഓ​ടു​ന്ന​ത് റെ​യി​ൽ​വേ​യു​ടെ സേവ​ന​ത്തി​ൽ ഉ​ണ്ടാ​കു​ന്ന വീഴ്‍ച അല്ലെന്നായിരുന്നു കേ​സ് സു​പ്രീം​കോ​ട​തി​യി​ൽ എ​ത്തി​യ​പ്പോ​ൾ അ​ഡീ​ഷ​ണ​ൽ സോ​ളി​സി​റ്റ​ർ ജ​ന​റ​ലിൻറെ വാദം. പക്ഷേ, നഷ്‍ടപ​രി​ഹാ​രം ന​ൽ​ക​ണ​മെ​ന്ന ദേ​ശീ​യ ഉ​പ​ഭോ​ക്തൃ ത​ർ​ക്ക​പ​രി​ഹാ​ര സ​മി​തി​യു​ടെ ഉ​ത്ത​ര​വി​ൽ കോ​ട​തി​യു​ടെ ഇ​ട​പെ​ട​ൽ വേണ്ടെ​ന്നും സുപ്രീംകോടതി വ്യ​ക്ത​മാ​ക്കി.

സ്വ​കാ​ര്യ ഗ​താ​ഗ​ത മേ​ഖ​ല​യി​ൽ ഉ​ൾ​പ്പ​ടെ ഉ​ത്ത​ര​വാ​ദി​ത്ത​വും മ​ത്സ​ര​വു​മു​ള്ള ഇ​ക്കാ​ല​ത്ത് പൊ​തു​ഗ​താ​ഗ​ത മേ​ഖ​ല കൂ​ടു​ത​ൽ കാ​ര്യ​ക്ഷ​മ​ത​യോ​ടെ പ്ര​വ​ർ​ത്തി​ക്ക​ണ​മെന്നും സുപ്രീംകോടതി നിർദേശിച്ചു. രാ​ജ്യ​ത്ത് ഒ​രു യാ​ത്ര​ക്കാ​ര​നും റെ​യി​ൽ​വേ ഉ​ൾ​പ്പ​ടെ അ​ധി​കൃ​ത​രു​ടെയും ഭരണകൂടത്തിൻറെയും കാ​രു​ണ്യ​ത്തി​ന് വേ​ണ്ടി കാ​ത്തു​നി​ൽ​ക്കേ​ണ്ട ദു​ര​വ​സ്ഥ ഉ​ണ്ടാ​ക​രു​തെ​ന്നും വ്യ​ക്ത​മാ​ക്കി.

കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും  ലഭ്യമാണ്.  വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.