ഡൽഹിയുടെ ശ്രേയസായി മുൻ ക്യാപ്റ്റൻ ശ്രേയസ് അയ്യർ. മുംബൈ ഇന്ത്യൻസിൻറെ തീപാറും ബൗളിംഗിനെ സധൈര്യം നേരിട്ട ശ്രേയസ് ഡൽഹിയെ വിജയതീരത്തെത്തിച്ചു. പുറത്താകാതെ 33 റൺസെടുത്ത ശ്രേയസിൻറെ മികവിൽ ഡൽഹി ക്യാപിറ്റൽസ് മുംബൈയെ നാലുവിക്കറ്റിന് പരാജയപ്പെടുത്തി. മുംബൈയുടെ 130 റൺസ് വിജയലക്ഷ്യം അഞ്ച് പന്ത് ബാക്കിനിൽക്കെയാണ് ഡൽഹി മറികടന്നത്.
ചെറു സ്കോർ പിന്തുടർന്ന ഡൽഹി തകർച്ചയോടെയാണ് തുടങ്ങിയത്. 30 റൺസ് എടുക്കുന്നതിനിടെ ഓപ്പണർമാർ ഉൾപ്പെടെ മൂന്നു വിക്കറ്റാണ് നഷ്ടമായത്. പിന്നാലെ പന്തും (26) അക്സർ പട്ടേലും (9) ഷിമ്രോൺ ഹെറ്റ്മിയറും (15) വേഗം പുറത്തായതോടെ ഡൽഹി പരുങ്ങി.
ശ്രേയസിന് കൂട്ടായി അശ്വിൻ (20) ക്രീസിൽ നിലയുറപ്പിച്ചതോടെ കളി ഡൽഹി പതുക്കെ തിരികെപ്പിടിച്ചു. കൂറ്റൻ അടികൾക്ക് മുതിരാതെ ഇരുവരും ചേർന്ന് ഡൽഹിയെ വിജയത്തിലേക്ക് നയിച്ചു. ഏഴാം വിക്കറ്റ് കൂട്ടുകെട്ടിൽ ഇരുവരും ചേർന്ന് 39 റൺസാണ് അടിച്ചെടുത്തത്.
നേരത്തെ ആവേശ് ഖാൻറെ ബൗളിംഗിനു മുന്നിൽ പതറിയ മുംബൈ സൂര്യകുമാർ യാദവിൻറെ (33) മികവിലാണ് ഭേദപ്പെട്ട സ്കോർ സ്വന്തമാക്കിയത്. ക്യാപ്റ്റൻ രോഹിത് ശർമ (7) ഉൾപ്പെടെ മറ്റാരും മുംബൈ നിരയിൽ തിളങ്ങിയില്ല. നാല് ഓറിൽ 15 റൺസ് മാത്രം വിട്ടുനൽകി മൂന്നു വിക്കറ്റ് വീഴ്ത്തിയ ആവേശ് ഖാനായിരുന്നു ഡൽഹിയുടെ ആവേശം.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here