മോന്സന് മാവുങ്കലിന്റെ പുരാവസ്തു തട്ടിപ്പ് കേസുകള് അന്വേഷിക്കാന് പ്രത്യേക സംഘത്തെ ചുമതല ഏല്പ്പിച്ചു. ക്രൈം ബ്രാഞ്ച് തിരുവനന്തപുരം റേഞ്ച് ഐ.ജി. സ്പര്ജന് കുമാറിന്റെ നേതൃത്വത്തിലാണ് പ്രത്യേക അന്വേഷണ സംഘം രൂപീകരിച്ചത്. അന്വേഷണത്തിന് ക്രൈം ബ്രാഞ്ച് മേധാവി എസ്. ശ്രീജിത്ത് മേല്നോട്ടം വഹിക്കും. ഡി.ജി.പി അനില് കാന്താണ് പുതിയ അന്വേഷണസംഘം രൂപീകരിക്കാന് ഉത്തരവിട്ടത്.
ക്രൈം ബ്രാഞ്ച് എറണാകുളം എസ്.പി എം.ജെ. സോജന്, കോഴിക്കോട് വിജിലന്സ് എസ്.പി പി.സി. സജീവന്, ഗുരുവായൂര് ഡി.വൈ.എസ്.പി കെ.ജി. സുരേഷ്, പത്തനംതിട്ട സി – ബ്രാഞ്ച് ഡി.വൈ.എസ്.പി ജെ. ഉമേഷ് കുമാര്, മുളന്തുരുത്തി ഇന്സ്പെക്ടര് പി.എസ്. ഷിജു, വടക്കേക്കര ഇന്സ്പെക്ടര് എം.കെ. മുരളി, എളമക്കര സബ് ഇന്സ്പെക്ടര് രാമു, തൊടുപുഴ സബ് ഇന്സ്പെക്ടര് ബൈജു പി. ബാബു എന്നിവരാണ് അന്വേഷണ സംഘത്തിലെ അംഗങ്ങള്.
പുരാവസ്തു വില്പ്പനയുടെ ഭാഗമായി തനിക്ക് രണ്ട് ലക്ഷത്തി അറുപതിനായിരം കോടി രൂപ രാജകുടുംബത്തില് നിന്നടക്കം എത്തിയെന്ന് വിശ്വസിപ്പിച്ച് വിവിധ ആളുകളില് നിന്ന് കോടികള് കടം വാങ്ങിയായിരുന്നു മോന്സന്റെ തട്ടിപ്പ്.
തനിക്ക് കോസ്മറ്റോളജിയില് ഡോക്ടറേറ്റ് ഉണ്ടെന്നും ഇയാള് അവകാശപ്പെട്ടിരുന്നു. പുരാവസ്തുക്കള് വിറ്റതിന് കുവൈത്തിലെയും ദുബായിലെയും രാജ കുടുംബാംഗങ്ങള് അടക്കമുള്ളവര് വിദേശത്തു നിന്നും തനിക്ക് പണമയച്ചിരുന്നെന്നും എന്നാല് സാങ്കേതിക പ്രശ്നങ്ങള് കാരണം പണം പിന്വലിക്കാന് സാധിക്കുന്നില്ലെന്നും പറഞ്ഞായിരുന്നു മോന്സണ് ആളുകളില് നിന്ന് കോടികള് കടം വാങ്ങിയത്.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here