നടന്‍ ജോജു ജോര്‍ജിന്‍റെ കാര്‍ തകര്‍ത്ത കേസില്‍ ഒരാള്‍ കൂടി അറസ്റ്റില്‍. യൂത്ത്കോണ്‍ഗ്രസ് നേതാവ് ഷെരീഫാണ് അറസ്റ്റിലായത്. കേസില്‍ രണ്ടാമത്തെ അറസ്റ്റാണിത്. നേരത്തെ ഐഎൻടിയുസി നേതാവായ പി ജി ജോസഫ് അറസ്റ്റിലായിരുന്നു.
നടന്‍ ജോജു ജോര്‍ജിന്‍റെ കാര്‍ തകര്‍ത്ത കേസില്‍ യൂത്ത് കോണ്‍ഗ്രസ് നേതാവ് ഷെരീഫിനെ വെള്ളിയാ‍ഴ്ച്ച രാത്രിയാണ് പൊലീസ് പിടികൂടിയത്. സമരവുമായി ബന്ധപ്പെട്ട ദൃശ്യങ്ങളില്‍ ഷെരീഫിന്‍റെ സാന്നിധ്യം പൊലീസ് തിരിച്ചറിഞ്ഞിരുന്നു. ഇതോടെ രാത്രി ഷെരീഫിനെ വീട്ടിലെത്തി പിടികൂടുകയായിരുന്നു.
കേസില്‍ രണ്ടാമത്തെ അറസ്റ്റാണ് ഷെരീഫിന്‍റെത്. നേരത്തെ ഐഎന്‍ടിയുസി നേതാവ് പിജി ജോസഫ് അറസ്റ്റിലായതിനു പിന്നാലെ കേസില്‍ കോണ്‍ഗ്രസ് ഒത്തു തീര്‍പ്പു ശ്രമത്തിന് നീക്കം നടത്തിയിരുന്നു. എന്നാല്‍ ജോസഫിന്‍റെ ജാമ്യാപേക്ഷ തള്ളിയതോടെ കോണ്‍ഗ്രസിന്‍റെ ഒത്തു തീര്‍പ്പു സാധ്യതയും മങ്ങി.
കേസില്‍ കക്ഷി ചേരാന്‍ നടന്‍ ജോജു ജോര്‍ജ് അപേക്ഷ നല്‍കിയതോടെയാണ് ഒത്തു തീര്‍പ്പ് സാധ്യത മങ്ങിയത്. നിലവില്‍ മുന്‍ മേയര്‍ ടോണി ചമ്മണി, യൂത്ത് കോണ്‍ഗ്രസ് സംസ്ഥാന സെക്രട്ടറിമാരായ പിവൈ ഷാജഹാന്‍, മനു ജേക്കബ്, തമ്മനം മണ്ഡലം പ്രസിഡന്‍റ് ജര്‍ജസ്, സൗത്ത് മുന്‍ മണ്ഡലം പ്രസിഡന്‍റ് അരുണ്‍ വര്‍ഗീസ് എന്നിവരാണ് കേസില്‍ അറസ്റ്റിലാവാനുള്ള മറ്റു പ്രതികള്‍. ഇവരുടെ അറസ്റ്റും വൈകാതെ രേഖപ്പെടുത്താനുള്ള ശ്രമത്തിലാണ് പൊലീസ്.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
