കുനൂരില് വ്യോമസേനാ ഹെലികോപ്റ്റര് അപകടത്തില് അന്തരിച്ച സംയുക്ത സൈനിക മേധാവി ജനറല് ബിപിന് റാവത്ത് അടക്കമുള്ളവര്ക്ക് അന്തിമോപചാരം അര്പ്പിച്ച് രാജ്യം.
ഊട്ടി വെല്ലിങ്ടണ് മദ്രാസ് റെജിമെന്റ് സെന്ററില് ജനറല് ബിപിന് റാവത്ത്, ഭാര്യ മധുമിത, 11 സൈനികര് എന്നിവരുടെ മൃതദേഹം രാവിലെ 11ഓടെ പൊതുദര്ശനത്തിനായി എത്തിച്ചു. വെല്ലിങ്ടണിലെ സൈനിക ആശുപത്രിയില്നിന്ന് മൃതദേഹങ്ങള് സൈനികവ്യൂഹത്തിന്റെ അകമ്പടിയോടെയാണ് മദ്രാസ് റെജിമെന്റ് സെന്ററിലേക്ക് എത്തിച്ചത്.
ബ്രിഗേഡിയര് എല് എസ് ലിഡ്ഡര്, ലെഫ്. കേണല് ഹര്ജീന്ദര് സിങ്, എന് കെ ഗുര്സേവക് സിങ്, എന് കെ ജിതേന്ദ്രകുമാര്, ലാന്സ് നായിക് വിവേക് കുമാര്, ലാന്സ് നായിക് ബി സായ് തേജ, ഹവീല്ദാര് സത്പാല്, ജൂനിയര് വാറന്റ് ഓഫീസര് മലയാളിയായ എ പ്രദീപ് എന്നിവരാണ് ഇന്നലെ അപകടത്തില് അന്തരിച്ചത്.ക്യാപ്റ്റന് വരുണ്സിങ്. മാത്രമാണ് അപകടത്തില്നിന്ന് രക്ഷപ്പെട്ടത്.
അതേസമയം ഇന്ത്യയുടെ സംയുക്ത സൈനിക മേധാവി ജനറല് ബിപിന് റാവത്ത് ഉള്പ്പെടെ 13 പേര് ഹെലികോപ്റ്റര് അപകടത്തില് മരിച്ച സംഭവത്തില് അനുശോചനമറിയിച്ച് ലോകരാജ്യങ്ങള്. സംഭവത്തില് യുഎസും ബ്രിട്ടനും ഫ്രാന്സും യൂറോപ്യന് യൂണിയനും ചൈനയും റഷ്യയും അടക്കമുള്ള രാജ്യങ്ങള് അനുശോചനമറിയിച്ചു
യുഎസ്-ഇന്ത്യ പ്രതിരോധ പങ്കാളിത്തത്തില് മായാത്ത മുദ്ര പതിപ്പിച്ചയാളാണ് ജനറല് ബിപിന് റാവത്ത് എന്ന് യുഎസ് പ്രതിരോധ സെക്രട്ടറി ലോയിഡ് ജെ ഓസ്റ്റിന് ട്വീറ്റ് ചെയ്തു.
ബ്രിട്ടീഷ് സായുധ സേനയെ പ്രതിനിധീകരിച്ച് ജനറല് ബിപിന് റാവത്തിന്റെ മരണത്തില് അഗാധമായ ദുഖം രേഖപ്പെടുത്തുന്നുവെന്ന് യുകെ ചീഫ് ഓഫ് ഡിഫന്സ് സ്റ്റാഫ് പ്രതികരിച്ചു. ബ്രിട്ടീഷ് ഹൈക്കമ്മീഷണര് അലക്സ് എല്ലിസും ജനറല് റാവത്തിന്റെ വിയോഗത്തില് അനുശോചനം രേഖപ്പെടുത്തി.
ഹെലികോപ്റ്റര് അപകടം അത്യന്തം വേദനാജനകമാണെന്നും അപകടത്തില്പ്പെട്ടവരുടെ കുടുംബങ്ങളെ അനുശോചനം അറിയിക്കുന്നതായും ഭൂട്ടാന് പ്രധാമന്ത്രിയും നേപ്പാള് പ്രധാനമന്ത്രിയും പറഞ്ഞു. ഇന്ത്യയിലെ റഷ്യന് പ്രതിനിധി നിക്കോളായ് കുദാഷേവും ഇസ്രയേല് മുന് പ്രധാനമന്ത്രി ബെന്യമിന് നെതന്യാഹുവും പാക് മുന് മേജര് ആദില് രാജയും ജനറല് ബിപിന് റാവത്തിന്റെ മരണത്തില് അനുശോചിച്ചു.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here