ഇന്ത്യയിലെ ഏറ്റവും വലിയ സമ്മാനത്തുകയുള്ള ബാലസാഹിത്യപുരസ്‌കാരമായ പരാഗ് ബിഗ് ലിറ്റില്‍ ബുക്ക് പ്രൈസ് പ്രശസ്ത ബാലസാഹിത്യകാരനായ പ്രൊഫ.എസ്.ശിവദാസിന് . അഞ്ചുലക്ഷം രൂപയാണ് സമ്മാനത്തുക. ഓരോ വര്‍ഷവും ഓരോ ഭാരതീയ ഭാഷകള്‍ക്കാണ് അവാര്‍ഡ്. ഇത്തവണ മലയാളത്തിനായിരുന്നു സമ്മാനം.
439 എന്‍ട്രികളില്‍ നിന്നും അവസാന റൗണ്ടിലെത്തിയത് പ്രൊഫ.ശിവദാസിന് പുറമെ സിപ്പി പള്ളിപ്പുറം, ഡോ.കെ.ശ്രീകുമാര്‍ ,പള്ളിയറ ശ്രീധരന്‍ എന്നിവരായിരുന്നു. രചനകളിലെ വൈവിധ്യവും പുതുമയും ശാസ്ത്രീയ വീക്ഷണവും അന്താരാഷ്ട്ര പ്രസക്തിയുമാണ് പ്രൊഫ.ശിവദാസിനെ അവാര്‍ഡിനര്‍ഹനാക്കിയതെന്ന് ജൂറി വിലയിരുത്തി.
ഇരുനൂറിലേറെ കൃതികളുടെ കര്‍ത്താവാണ് പ്രൊഫ.ശിവദാസ് .കോട്ടയം സ്വദേശിയായ അദ്ദേഹം അദ്ധ്യാപകന്‍, ശാസ്ത്രസാഹിത്യ പ്രചാരകന്‍ , പത്രാധിപര്‍, പേരന്റിങ് വിദഗ്ദ്ധന്‍ എന്നീ നിലകളില്‍ പ്രശസ്തനാണ്. ഡിസംബര്‍ പത്തിന് വൈകിട്ട് നാലിന് തൃശൂര്‍ കേരള സാഹിത്യ അക്കാദമി ഹാളില്‍ വെച്ച് അക്കാദമി പ്രസിഡന്റ് വൈശാഖന്‍ പുരസ്‌കാരം നല്‍കും.മികച്ച ഇല്ലസ്‌ട്രേട്ടര്‍ക്കുള്ള അവാര്‍ഡ് ഡല്‍ഹി സ്വദേശി ദീപബല്‍സവറിനാണ് .
പ്രൊഫ.ശിവദാസിന് കേരള ശാസ്ത്ര സാങ്കേതിക പരിസ്ഥിതി സമിതിയുടെ എമിററ്റസ് ഫെല്ലോഷിപ്പ്, സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ടിന്റെ സമഗ്ര സംഭാവനാ പുരസ്‌കാരം, കേന്ദ്ര-കേരള സാഹിത്യ അക്കാദമികളുടെ അവാര്‍ഡുകള്‍, എന്‍.സി.ഇ.ആര്‍.ടി അവാര്‍ഡ് , എന്‍.സി.എസ്.ടി.സി.അവാര്‍ഡ്, ഭീമാ അവാര്‍ഡ് ,കൈരളി ചില്‍റണ്‍സ് ബുക്ക് ട്രസ്റ്റ് അവാര്‍ഡ് എന്നിവയുള്‍പ്പെടെ നിരവധി അവാര്‍ഡുകള്‍ ലഭിച്ചിട്ടുണ്ട്.
ഭാര്യ സുമ ശിവദാസ് വിരമിച്ച പ്രഥമാദ്ധ്യാപികയും പാചകവിദഗ്ദ്ധയും എഴുത്തുകാരിയുമാണ്. അപു, ദിപു എന്നിവര്‍ മക്കള്‍. ‘ മലയാള ഭാഷയ്ക്കും ശാസ്ത്രസാഹിത്യ പ്രസ്ഥാനത്തിനും കിട്ടിയ അംഗീകാരമായി ഈ അവാര്‍ഡിനെ കണക്കാക്കുന്നു’ വെന്ന് പ്രൊഫ.ശിവദാസ് പറഞ്ഞു.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
