പുതുവർഷാഘോഷത്തിൻ്റെ മറവിലുള്ള മയക്കുമരുന്ന് കടത്ത് തടയാനൊരുങ്ങി എക്സൈസും കസ്റ്റംസും. ഹോട്ടലുകളിലും റിസോർട്ടുകളിലും പരിശോധനകൾ തുടരുകയാണ്.അതേസമയം യൂറോപ്പിൽ നിന്ന് കൊച്ചിയിലേയ്ക്ക് സിന്തറ്റിക്ക് ലഹരിമരുന്ന് കടത്തിയ യുവാക്കളെ കണ്ടെത്തുന്നതിനായി തിരച്ചിൽ ഊർജ്ജിതമാക്കി.
കഴിഞ്ഞ ദിവസങ്ങളിൽ കസ്റ്റംസ് നടത്തിയ പരിശോധനയിൽ വിദേശത്തു നിന്നും കൊച്ചിയിലേയ്ക്ക് ലക്ഷങ്ങൾ വിലയുള്ള സിന്തറ്റിക്ക് ലഹരി മരുന്നുകൾ കടത്തിയ തായി കണ്ടെത്തിയിരുന്നു.ന്യൂ ഇയർ പാർട്ടി ലക്ഷ്യമാക്കിയാണ് സ്പെയിനിൽ നിന്നുൾപ്പടെ മയക്കുമരുന്ന് എത്തിച്ചതെന്നും കണ്ടെത്തിയിരുന്നു.
പാലാരിവട്ടം തമ്മനം സ്വദേശികളായ യുവാക്കളാണ് സിന്തറ്റിക്ക് ലഹരിമരുന്ന് കടത്തിന് പിന്നിൽ പ്രവർത്തിച്ചതെന്നും കസ്റ്റംസിന് വ്യക്തമായിരുന്നു.
ഇവരുടെ വീടുകളിൽ നടത്തിയ പരിശോധനയിൽ ചരസ് അടക്കമുള്ള ലഹരി മരുന്നുകൾ പിടിച്ചെടുത്തിരുന്നു.എന്നാൽ യുവാക്കൾ ഒളിവിലാണ്. ഇവരെ കണ്ടെത്തുന്നതിനായി തിരച്ചിൽ ഊർജിതമാക്കിയിട്ടുണ്ട്. മാസങ്ങൾക്കു മുൻപ് ഇസ്രയേലി ഡി ജെ സജാങ്കെയെ കൊച്ചിയിലെത്തിച്ചത് ഈ യുവാക്കളാണ്.
ഡി ജെ പാർട്ടിയുടെ മറവിൽ മയക്കുമരുന്ന് ഉപയോഗിക്കുന്നത് തടയാൻ എക്സൈസും കർശന നടപടികൾ സ്വീകരിച്ചു വരുന്നുണ്ട്. സംശയമുള്ള ഹോട്ടലുകളിലും റിസോർട്ടുകളിലും സംയുക്തമായി പരിശോധനകൾ തുടർന്നു വരികയാണ്. അതിർത്തികളിലും എക്സൈസ് പരിശോധന ശക്തമാക്കിയിട്ടുണ്ട്. അതേ സമയം വിമാനത്താവളങ്ങളും തുറമുഖവും കേന്ദ്രീകരിച്ച് കസ്റ്റംസും നിരീക്ഷണം കർശനമാക്കിയിട്ടുണ്ട്.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
