കൊച്ചിയിൽ ബി.പി.സി.എൽ വിപുലീകരണത്തിന്റെ ഭാഗമായി നിർദേശിക്കപ്പെട്ട പോളിയോൾ പദ്ധതി നിർത്തലാക്കാനുള്ള നീക്കം ഉപേക്ഷിക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയൻ പ്രധാനമന്ത്രി നരേന്ദ്ര മോഡിക്ക് കത്തയച്ചു. പദ്ധതിക്ക് വേഗത്തിൽ അംഗീകാരം നൽകാൻ ബി.പി.സി.എൽ അധികാരികളോട് നിർദേശിക്കണമെന്നും മുഖ്യമന്ത്രി പറഞ്ഞു.
“മെയ്ക്ക് ഇൻ ഇന്ത്യ” പദ്ധതിക്ക് കീഴിൽ വിഭാവനം ചെയ്ത കൊച്ചിയിലെ അഭിമാനകരമായ ഈ പദ്ധതിക്ക് 2020 ജനുവരി 27-ന് പ്രധാനമന്ത്രി തന്നെയാണ് തറക്കല്ലിട്ടത്.
കേന്ദ്ര സർക്കാരിന്റെ മുൻകൈയിൽ കൊച്ചി ഫാക്ട് അമ്പലമുഗളിൽ 481 ഏക്കർ സ്ഥലത്ത് 977 കോടി രൂപ ചെലവിൽ പെട്രോ കെമിക്കൽ പാർക്ക് സ്ഥാപിക്കുന്നതിന് സംസ്ഥാന സർക്കാര്‍ ക്രിയാത്മകമായ നടപടികൾ സ്വീകരിച്ചു. 9,500 കോടി രൂപയുടെ നിക്ഷേപം ആകര്‍ഷിക്കുന്നതും 10,000 പേർക്ക് തൊഴിൽ സൃഷ്ടിക്കുന്നതുമായ പദ്ധതിയാണിത്.
പദ്ധതിക്കായി സംസ്ഥാന സർക്കാർ ഇതിനകം 170 ഏക്കർ ഭൂമി കമ്പനിക്ക് അനുവദിച്ചു. പെട്രോ കെമിക്കൽ പാർക്കിലെ അടിസ്ഥാന സൗകര്യ വികസന പ്രവർത്തനങ്ങൾക്ക് 200 കോടി രൂപ ചെലവാക്കുകയും ചെയ്തു.
ഭൂമി, അടിസ്ഥാന സൗകര്യ വികസനം, മറ്റ് പ്രവർത്തനങ്ങൾ എന്നിവയുടെ കാര്യത്തിൽ സംസ്ഥാനം ഇതിനകം ഗണ്യമായ നിക്ഷേപം നടത്തിയതിനാൽ, നിർദ്ദിഷ്ട പോളിയോൾ പദ്ധതി നിർത്തലാക്കുന്നത് കേരളത്തിന് കനത്ത പ്രത്യാഘാതങ്ങൾ ഉണ്ടാക്കുമെന്നും മുഖ്യമന്ത്രി കത്തിൽ ചൂണ്ടിക്കാട്ടി.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
