ജീവിതത്തിൽ ഒരു തവണയെങ്കിലും സ്കിപ്പിംഗ് ചെയ്യാത്തവർ ഉണ്ടാകുമോ? വ്യായമമായിട്ടല്ലെങ്കിലും സ്കൂൾ കാലഘട്ടത്തിൽ ആസ്വദിച്ച് ചെയ്ത ഒരിനമാകും സ്കിപ്പിങ്ങ്. എത്ര തവണ വേണമെങ്കിലും ഇടവേളയില്ലാതെ ആവേശത്തോടെ ചാടിയിട്ടുണ്ടാകും, ഒടുവിൽ കിതപ്പ് ഉയരുമ്പോൾ മാത്രം പിൻവാങ്ങിയ കാലം ഓർക്കുന്നുണ്ടോ?
ശരീരത്തിനും മനസിനും ഭാരമില്ലാതെ ആകാശം മുട്ടെ പറന്നിരുന്ന ആ സ്കൂൾ കുട്ടിയുടെ ആവേശം ഒന്ന് തിരികെ വിളിച്ചാലോ? വെറും ഗെയിം മാത്രമല്ല സ്കിപ്പിംഗ്, മികച്ചൊരു കാർഡിയോ എക്സർസൈസ് ആണിത്. ശരീരം മുഴുവൻ ആക്റ്റിവ് ആയി നിലനിർത്താൻ ഇത് സഹായിക്കും. സ്കിപ്പിംഗ് ചെയ്താൽ ലഭിക്കുന്ന 10 ഗുണങ്ങൾ അറിഞ്ഞിരിക്കാം.
ഹൃദയാരോഗ്യം കാക്കും
ഹൃദയത്തിൻറെ പ്രവർത്തനങ്ങളെ സുഗമമാക്കാൻ സഹായിക്കുന്ന ഏറ്റവും മികച്ച കാർഡിയോ എക്സർസൈസ് ആണ് സ്കിപ്പിംഗ്. ഹൃദയത്തെ കരുത്തുള്ളതാക്കാനും അതുവഴി ഹൃദ്രോഗം, സ്ട്രോക്ക് എന്നിവയ്ക്കുള്ള സാധ്യതകൾ ഒഴിവാക്കാനും സ്കിപ്പിംഗ് വളരെയധികം പ്രയോജനം ചെയ്യും.
ബാലൻസ് മെച്ചപ്പെടുത്തും
ശരീരത്തിൻറെ ബാലൻസ് മെച്ചപ്പെടുത്താൻ ഇത് സഹായിക്കും. അല്പം ശ്രദ്ധയോടെയും എകാഗ്രതയുള്ള മനസോടെയും മാത്രമേ സ്കിപ്പിംഗ് കൃത്യമായി ചെയ്യാൻ സാധിക്കൂ. പതിവായി ചെയ്യുമ്പോൾ ശരീരത്തിൻറെ ബാലൻസ് മെച്ചപ്പെടുത്തുകയും നിത്യജീവിതത്തിൽ നിങ്ങൾ ചെയ്യുന്ന എല്ലാ കായിക പ്രവർത്തനങ്ങളിലും സഹായിക്കുകയും ചെയ്യും.
കരുത്ത് വർധിപ്പിക്കും
ശരീരത്തിൻറെ കരുത്ത് വർധിപ്പിക്കാൻ സഹായിക്കുന്ന ഒന്നാണ് സ്കിപ്പിംഗ്. പതിവായി 15 മിനിറ്റെങ്കിലും സ്കിപ്പിംഗ് ചെയ്യുന്നവരുടെ പേശികൾ ദൃഡമാകുകയും കൂടുതൽ കരുത്ത് ലഭിക്കുകയും ചെയ്യും. ഇതിനൊപ്പം തന്നെ അകാരണമായ ക്ഷീണവും അലസതയും അനുഭവിക്കുന്നവരിൽ കൂടുതൽ ഊർജ്ജം നൽകാനും ഇത് സഹായിക്കും.
അമിത വ്യായാമം ആരോഗ്യത്തിന് ദോഷം
ഏകാഗ്രത കൂട്ടും
മറ്റെന്തെങ്കിലും ഓർത്തുകൊണ്ട് അലസമായി സ്കിപ്പിംഗ് ചെയ്യാൻ ശ്രമിച്ചാൽ ഉറപ്പായും അടിതെറ്റി വീഴും. ഇല്ലെങ്കിൽ സ്കിപ്പിംഗ് റോപ്പ് കാലിൽ തടഞ്ഞു പല തവണ നിങ്ങൾ വീഴാൻ ആയുകയും ചെയ്യും. അതിനാൽ തന്നെ പൂർണമായി ഏകാഗ്രത നൽകി മാത്രമേ സ്കിപ്പിംഗ് ചെയ്യാൻ സാധിക്കൂ. ഇതൊരു ശീലമാകുന്നതോടെ നിങ്ങളുടെ ഏകാഗ്രത വർദ്ധിക്കുകയും അതോടൊപ്പം ബുദ്ധി നിലവാരം മികച്ചതാകുകയും ചെയ്യുമെന്ന് പല പഠനങ്ങളും തെളിയിച്ചിട്ടുണ്ട്.
മാനസികാരോഗ്യം വർധിപ്പിക്കും
സ്കിപ്പിംഗ് റോപ്പും മാനസികാരോഗ്യവും തമ്മിലെന്ത് എന്ന് ചിന്തിക്കുന്നുണ്ടോ? ബന്ധമുണ്ട്. സ്കിപ്പിംഗ് ചെയ്യുന്നത് മാനസിക സമ്മർദ്ദവും അനാവശ്യ ചിന്തകളും ഒഴിവാക്കാൻ വളരെയധികം സഹായിക്കും. ഇവ രണ്ടുമില്ലെങ്കിൽ പിന്നെ മനസ് ആരോഗ്യത്തോടെ തന്നെയിരിക്കില്ലേ, മാത്രമല്ല, സ്കിപ്പിംഗ് ചെയ്യുന്നത് മസ്തിഷ്കം ഉൾപ്പെടെയുള്ള ശരീരത്തിലെ എല്ലാ ഭാഗത്തും രക്തയോട്ടം വർധിപ്പിക്കാൻ സഹായിക്കും. ഇത് മാനസിക സന്തോഷം നൽകുന്ന ഹോർമോൺ ആയ എൻഡോർഫിൻ ഉദ്പാദനം വർധിപ്പിക്കാൻ സഹായിക്കുകയും ചെയ്യും.
എല്ലുകളെ ബലപ്പെടുത്തും
എല്ലുകളുടെ ബലം വർധിപ്പിക്കാനും ബോൺ ഡെൻസിറ്റി മെച്ചപ്പെടുത്താനും മികച്ച വഴിയാണ് സ്കിപ്പിംഗ്. അതിനാൽ പതിവായി സ്കിപ്പിംഗ് ചെയ്യുന്നവരിൽ എല്ലുകളെ ബാധിക്കുന്ന പ്രശ്നങ്ങൾ വളരെ കുറവായിരിക്കും. മാത്രമല്ല, ഓസ്റ്റിയോപെറോസിസ് പോലുള്ള എല്ലുകളെ ബാധിക്കുന്ന രോഗങ്ങൾ രൂപപ്പെടുന്നത് ഒഴിവാക്കാൻ സ്കിപ്പിംഗ് വളരെയധികം പ്രയോജനം ചെയ്യും.
ചർമത്തിൻറെ തിളക്കം വർധിപ്പിക്കും
സ്കിപ്പിംഗ് ചർമത്തിൻറെ തിളക്കം വർധിപ്പിക്കാൻ സഹായിക്കുമെന്ന് പറഞ്ഞാൽ നിങ്ങൾ വിശ്വസിക്കുമോ? സത്യമാണ്, മനസ് മുതൽ ശരീരത്തിൻറെ എല്ലാ ഭാഗങ്ങളിലും ആരോഗ്യകരമായ മാറ്റം കൊണ്ടുവരുന്നതാണ് സ്കിപ്പിംഗ്. ശരീരത്തിൽ രക്തയോട്ടം വർധിപ്പിക്കുന്നതിനാലും അൽപനേരം സ്കിപ്പിംഗ് ചെയ്യുന്നതോടെ തന്നെ നന്നായി വിയർക്കുന്നതിനാലും ചർമ സൗന്ദര്യം മെച്ചപ്പെടുത്താനുള്ള മികച്ച വഴി കൂടിയായി ഇതിനെ കണക്കാക്കാം. ചർമ സുഷിരങ്ങളിലെ അഴുക്ക് പൂർണമായി നീക്കം ചെയ്യാൻ സ്കിപ്പിംഗ് സഹായകമാണ്.
അമിതവണ്ണം ഇല്ലാതാക്കും
അമിത വണ്ണം എരിച്ചുകളയാൻ ആഗ്രഹിക്കുന്നുണ്ടെങ്കിൽ നിങ്ങൾ തീർച്ചയായും സ്കിപ്പിംഗ് തിരഞ്ഞെടുക്കണം. തുടർച്ചയായ രണ്ടാഴ്ച കൊണ്ട് തന്നെ അനാവശ്യ കൊഴുപ്പ് ശരീരത്തിൽ നിന്ന് ഇല്ലാതാകുന്നത് നിങ്ങൾക്ക് കാണാൻ കഴിയും. കുറഞ്ഞ സമയംകൊണ്ട് കൂടുതൽ നേട്ടമുണ്ടാക്കാൻ കഴിയുമെന്നതാണ് ഈ വ്യായാമത്തിൻറെ പ്രത്യേകത.
ദിവസവും വെറും 30 മിനിറ്റ് വ്യായാമത്തിനായി മാറ്റി വെക്കാം; ഈ വ്യായാമങ്ങൾ ചെയ്തോളൂ
മുഖത്തിൻറെ വണ്ണം കുറയ്ക്കാൻ
പ്രായക്കൂടുതൽ തോന്നിപ്പിക്കുന്നതിനുള്ള പ്രധാന കാരണമാണ് മുഖത്തെ വണ്ണം കൂടുന്നത്. കവിളുകളും താടിയുടെ ഭാഗവുമെല്ലാം കൊഴുപ്പടിഞ്ഞ് തൂങ്ങിയാൽ സൗന്ദര്യം ഇല്ലാതാക്കാൻ ഇതുമതി. എന്നാൽ സ്കിപ്പിംഗ് ചെയ്തുകൊണ്ട് നിങ്ങൾക്ക് ഈ പ്രശ്നം മറികടക്കാം. മുഖം ഉൾപ്പെടെയുള്ള ശരീരഭാഗങ്ങൾ നന്നായി ഇളകുമെന്നതിനാൽ ഡബിൾ ചിൻ ഉൾപ്പെടെയുള്ള പ്രശ്നങ്ങൾ ഇല്ലാതാക്കാൻ സ്കിപ്പിംഗ് സഹായിക്കും. എന്നാൽ കുറച്ചു നാളെങ്കിലും ഇത് തുടർച്ചയായി ചെയ്യണം. അങ്ങനെയെങ്കിൽ വലിയ വ്യത്യാസം തന്നെ നിങ്ങൾക്ക് കാണാൻ കഴിയും.
കുടവയർ ഒതുക്കാം
ഏത് തരത്തിലുള്ള വ്യായാമം ചെയ്താലും കൂടെ വലിയ നിയന്ത്രണത്തിലുള്ള ഡയറ്റ് കൂടിയുണ്ടെങ്കിൽ മാത്രമേ കുടവയർ നന്നായി ഒതുക്കാൻ കഴിയൂ. എന്നാൽ സ്കിപ്പിംഗ് റോപ്പ് ഇക്കാര്യത്തിൽ വലിയ മാജിക് തന്നെയാണ്. കാരണം, ഡയറ്റ് എന്ത് തന്നെയായാലും കുടവയർ ഒതുക്കി നിങ്ങളുടെ ശരീരത്തിൻറെ പൂർണമായ ഭംഗി തിരിച്ചു നൽകാൻ ഇത് സഹായിക്കും. കുടവയർ കുറച്ച് വയറിലെ പേശികളെ ബലപ്പെടുത്താൻ ഇത് സഹായിക്കും. ദിവസവും 30 മിനിറ്റ് നേരം സ്കിപ്പിംഗ് ചെയ്യാൻ മാറ്റി വെക്കുകയാണെങ്കിൽ 200 – 300 വരെ കലോറി കുറയ്ക്കാൻ സഹായകമാകും. എന്നാൽ തുടക്കക്കാർ ഒരിക്കലും 30 മിനിറ്റ് സ്കിപ്പിംഗ് ചെയ്യാൻ ശ്രമിക്കരുത്. 5 മിനിറ്റിൽ തുടങ്ങി ദിവസങ്ങൾ കൊണ്ട് മാത്രം വേണം സമയം ദീർഘിപ്പിക്കാൻ. ഇല്ലെങ്കിൽ ശരീരവേദന മാത്രമാകും ഫലം.
സ്കിപ്പിംഗ് എക്സർസൈസ് ചെയ്യുമ്പോൾ ഇവ മറക്കരുത്
ശരീരത്തിലെ ഓരോ ഭാഗത്തിനും പരിഗണന നൽകുന്ന വ്യായാമ രീതിയാണ് സ്കിപ്പിംഗ്. സ്റ്റാമിന വർധിപ്പിക്കാനും അനാവശ്യ കൊഴുപ്പ് അലിയിച്ചു കലയാനുമെല്ലാം ഇത് വളരെയധികം സഹായിക്കും. വളരെ പെട്ടെന്ന് വിയർത്ത് ശരീരത്തിലെ അനാവശ്യകൊഴുപ്പിനെ നീക്കം ചെയ്യാൻ സഹായിക്കുമെന്നതിനാൽ ഇത് ഏറെ സ്വീകാര്യവുമാണ്. പുറത്തിറങ്ങി വർക്ക് ഔട്ട്‌ ചെയ്യുമ്പോൾ വൈറസ് ബാധയെ പേടിക്കേണ്ട ഈ സമയത്ത് വീട്ടിൽ തന്നെയിരുന്നു ചെയ്യാവുന്ന കാര്യക്ഷമമായ വ്യായാമ രീതിയാണ് സ്കിപ്പിംഗ്.
സ്കിപ്പിംഗ് ചെയ്യുമ്പോൾ ശ്രദ്ധിക്കാൻ
ഏതൊരു വ്യായാമം ചെയ്യുന്നതിന് മുൻപും ശരീരം അല്പം വാം അപ്പ്‌ ചെയ്യേണ്ടത് നിർബന്ധമാണ്‌. സ്കിപ്പിംഗ് ചെയ്യുന്നതിന് മുൻപും ഇത് നിർബന്ധമാണ്‌. കാരണം ശരീരം കൃത്യമായ രീതിയിൽ നിർത്തി ശ്രദ്ധയോടെ വേണം സ്കിപ്പിംഗ് ചെയ്യാൻ.
വാം അപ്പിന് ശേഷം രണ്ടു കാലുകളും ചേർത്ത് വെച്ച് പതുക്കെ ചാടാൻ തുടങ്ങാം. റോപ് കാലിൽ തടയാതിരിക്കാൻ പ്രത്യേകം ശ്രദ്ധിക്കണം. ആദ്യം വളരെ കുറഞ്ഞ വേഗതയിൽ ചെയ്ത് തുടങ്ങി ആത്മവിശ്വാസം ലഭിക്കുന്നതിന് അനുസരിച്ചു കൂടുതൽ വേഗത്തിൽ ചെയ്ത് തുടങ്ങാം.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
