രാജ്യത്ത് ഏറ്റവും കൂടുതൽ ആളുകൾ ആകാംക്ഷയോടെ കാത്തിരിക്കുന്ന ചിത്രമാണ് ‘കെജിഎഫ് 2’. പല തവണയായി ചിത്രത്തിന്റെ റിലീസ് തീയതി മാറ്റിയിരുന്നു. നിലവിലെ അറിയിപ്പുകൾ പ്രകാരം ചിത്രം ഏപ്രിൽ 14 നാണ് തീയേറ്ററുകളിലെത്തുക. ഇപ്പോഴിതാ ചിത്രത്തിലെ തൂഫാൻ എന്ന ഗാനത്തിന്റെ ലിറിക്കൽ വീഡിയോ പുറത്തുവിട്ടിരിക്കുകയാണ് അണിയറപ്രവർത്തകർ. മണിക്കൂറുകൾക്കകം തന്നെ ഗാനം ഹിറ്റ് ലിസ്റ്റിൽ ഇടം നേടിക്കഴിഞ്ഞു.
കന്നഡ, തെലുങ്ക്, തമിഴ്, മലയാളം, ഹിന്ദി ഭാഷകളിലാണ് ചിത്രമെത്തുക. തൂഫാൻ എന്ന ഗാനത്തിന്റെ അഞ്ച് ഭാഷാപതിപ്പുകളും പുറത്തുവിട്ടിട്ടുണ്ട്. റോക്കി ഭായി ആയെത്തിയ യാഷിനും നിരവധി ആരാധകരാണ് ചിത്രം നേടിക്കൊടുത്തത്. പ്രശാന്ത് നീൽ സംവിധാനം ചെയ്ത ചിത്രത്തിന്റെ ആദ്യ പതിപ്പ് ഇറങ്ങിയത് 2018 ലായിരുന്നു. ചിത്രത്തിൽ അധീര എന്ന കഥാപാത്രമായെത്തുന്നത് സഞ്ജയ് ദത്താണ്. ശ്രീനിധി ഷെട്ടി, രവീണ ടണ്ഡൻ, പ്രകാശ് രാജ്, അച്യുത് കുമാർ, അയ്യപ്പ പി ശർമ തുടങ്ങി നിരവധി താരങ്ങളാണ് അണിനിരക്കുന്നത്.
ഹൊംബാളെ ഫിലിംസിന്റെ ബാനറിൽ വിജയ് കിരഗണ്ഡൂർ ആണ് ചിത്രം നിർമ്മിക്കുന്നത്. ഭുവൻ ഗൗഡ ആണ് ഛായാഗ്രഹണം നിർവഹിക്കുന്നത്. ഈ മാസം 27 ന് ചിത്രത്തിന്റെ ട്രെയ്‌ലർ പുറത്തിറങ്ങും. കെജിഎഫ് 2 വിന്റേതായി മുൻപ് പുറത്തിറങ്ങിയ ടീസറും പോസ്റ്ററുകളുമെല്ലാം വൻ ഹിറ്റായിരുന്നു. കേരളത്തിൽ ചിത്രത്തിന്റെ വിതരണാവകാശം സ്വന്തമാക്കിയിരിക്കുന്നത് പൃഥ്വിരാജ് പ്രൊഡക്ഷൻസാണ്.
എക്കാലത്തേയും ബ്ലോക്ക്ബസ്റ്റർ ചിത്രങ്ങളിലൊന്നാണ് ‘കെജിഎഫ് 1’. ഏകദേശം 250 കോടി രൂപ ചിത്രം നേടിയെന്നാണ് കണക്കുകൾ. രണ്ടാഴ്ച കൊണ്ട് ചിത്രം 100 കോടി ക്ലബ്ബിലെത്തി. ‘ബാഹുബലി’ക്ക് ശേഷം ഈ നേട്ടം കൈവരിക്കുന്ന രണ്ടാമത്തെ ചിത്രമാണ് ‘കെജിഎഫ്’.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
