സ്വര്ണക്കടത്ത് കേസില് തൃക്കാക്കര മുനിസിപ്പല് വൈസ് ചെയര്മാനും ലീഗ് നേതാവുമായ എ എ ഇബ്രാഹിംകുട്ടിയെ കസ്റ്റംസ് ചോദ്യംചെയ്യുന്നു. കൊച്ചി കസ്റ്റംസ് ഓഫീസിലാണ് ചോദ്യംചെയ്യല്. നോട്ടീസ് നല്കിയാണ് എ എ ഇബ്രാഹിംകുട്ടിയെ വിളിച്ചുവരുത്തിയത്. ഇബ്രാഹിംകുട്ടിയുടെ മകന് ഷാബിന്, നിര്മാതാവ് സിറാജുദ്ദീനും ഒളിവിലാണ്. ഷാബിന്റെ പാസ്പോര്ട്ട് കസ്റ്റംസ് കണ്ടുകെട്ടി.
ഇറച്ചി മുറിക്കുന്ന യന്ത്രത്തില് ഒളിപ്പിച്ച് സ്വര്ണ്ണം കടത്താന് ശ്രമിച്ച സംഭവത്തില് ഇന്നലെ ഇബ്രാഹിംകുട്ടിയുടെ വീട്ടില് കസ്റ്റംസ് റെയ്ഡ് നടത്തിയിരുന്നു. കസ്റ്റംസ് ഒരു ലാപ്ടോപ്പും ഏതാനും ചില രേഖകളും വീട്ടില് നിന്നും കസ്റ്റഡിയിലടുത്തു. കൊച്ചിയില് നിന്നുള്ള കസ്റ്റംസ് പ്രിവന്റീവ് വിഭാഗമാണ് നഗരസഭ വൈസ് ചെയര്മാന് ഇബ്രാഹിംകുട്ടിയുടെ വീട്ടില് പരിശോധന നടത്തിയത്. ഇദ്ദേഹത്തിന്റെ മകന് ഷാബിന് സ്വര്ണ്ണക്കടത്തുമായി ബന്ധമുണ്ടെന്നാണ് എക്സൈസ് കരുതുന്നത്. ഇയാളും കുടുംബവും ഇപ്പോള് ഒളിവിലാണ്.
ഇബ്രാഹിം കുട്ടിയുടെ മകന് കേസില് പ്രതിയാവുമെന്നാണ് സൂചന. ഷാബിനെ ചോദ്യം ചെയ്താല് മാത്രമെ കൂടുതല് പറയാനാകൂ എന്ന് കസ്റ്റംസ് പറഞ്ഞു. ഷാബിന്റെ ഡ്രൈവറുടെ കളമശ്ശേരിലുള്ള വസതിയിലും കസ്റ്റംസ് റെയ്ഡ് നടത്തി. ഇബ്രാഹിം കുട്ടി ലീഗിന്റെ നിയോജക മണ്ഡലം, ജില്ലാ നേതാവാണ്. കഴിഞ്ഞ ദിവസം നെടുമ്പാശ്ശേരി വിമാനത്താവളത്തിലായിരുന്നു സ്വര്ണ്ണം പിടികൂടിയത്. ദുബായില് നിന്നെത്തിയ കാര്ഗോയിലാണ് സ്വര്ണ്ണം ഒളിപ്പിച്ച യന്ത്രമുണ്ടായിരുന്നത്. സിറാജുദ്ദീന് എന്നയാളാണ് സ്വര്ണ്ണം അയച്ചതെന്ന് കസ്റ്റംസിന് വിവരം ലഭിച്ചിരുന്നു. കാര്ഗോ കൈപ്പറ്റാന് വന്നയാളെ എക്സൈസ് കസ്റ്റഡിയിലെടുത്തിരുന്നു. ഇയാളില് നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് പരിശോധന നടന്നത്.
തൃക്കാക്കര തുരുത്തേല് എന്റര്പ്രൈസസ് എന്ന സ്ഥാപനത്തിന്റെ പേരിലായിരുന്നു യന്ത്രം എത്തിയത്. ഈ സ്ഥാപനത്തിന്റെ പാര്ട്ട്നര് ആണ് ഷാബിന്. യന്ത്രം തുറക്കാന് സാധിക്കാത്തതിനാല് കട്ടര് ഉപയോഗിച്ച് മുറിച്ചായിരുന്നു സ്വര്ണ്ണം പുറത്തെടുത്തത്. രണ്ടേകാല് കിലോയോളം വരുന്ന ചെറുതും വലുതുമായ നാല് സ്വര്ണ്ണക്കട്ടികള് ആണ് യന്ത്രത്തില് നിന്ന് ലഭിച്ചത്. ഇന്ത്യയില് സുലഭമായി ലഭിക്കുന്ന യന്ത്രമായിരുന്നിട്ടും ഇറക്കുമതി ചെയ്തത് എന്തിനെന്ന സംശയം തോന്നിയതിനെ തുടര്ന്നായിരുന്നു കസ്റ്റംസ് കാര്ഗോ വിശദമായി പരിശോധിച്ചത്.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here