സ്വകാര്യ മുതലാളിമാരോട് മത്സരിച്ച് കിട്ടുമെങ്കിൽ എടുത്തോയെന്ന് കേന്ദ്രം; KPPL ലേലത്തെ കുറിച്ച് മുഖ്യമന്ത്രി

പൊതുമേഖലാ സ്ഥാപനമായ കേരള പേപ്പർ പ്രൊഡക്ട് ലിമിറ്റഡ് കേരളം നടത്താമെന്ന് പറഞ്ഞിട്ടും കേന്ദ്രം നിരസിച്ചു എന്ന് മുഖ്യമന്ത്രി പിണറായി വിജയൻ.KPPL ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം.

KPPL ലേല വേളയിൽ കേന്ദ്രം സ്വീകരിച്ച നിലപാടിനെക്കുറിച്ച് മുഖ്യമന്ത്രി പറയുന്നത് ഇങ്ങനെ,
ഞങ്ങൾ നടത്തികൊള്ളാമെന്ന് പറഞ്ഞിട്ടും ലേലത്തിൽ പങ്കെടുത്ത് മറ്റ് സ്വകാര്യ മുതലാളിമാരോട് മത്സരിച്ച് കിട്ടുമെങ്കിൽ എടുത്തോ എന്ന നിലപാടാണ് കേന്ദ്രത്തിൽ നിന്നുണ്ടായത്.എന്നാൽ കേരളത്തിന് KPPL എന്ന സ്ഥാപനം അങ്ങേയറ്റം വിലമതിക്കുന്ന ഒന്നായിരുന്നു. അതിനാൽ കേന്ദ്രത്തിന് നിർബന്ധബുദ്ധി പോലെ തന്നെ അത് സംസ്ഥാനത്ത് നിർത്തിയേ മതിയാകൂ എന്ന നിലയിൽ കേരളവും നീങ്ങിയതെന്നും മുഖ്യമന്ത്രി പറഞ്ഞു.

അതേസമയം, പൊതുമേഖലാ വ്യവസായങ്ങളുടെ സംരക്ഷണത്തിൽ മാതൃകയായി കേരള സർക്കാർ. കേരള പേപ്പർ പ്രൊഡക്ട് ലിമിറ്റഡ് മുഖ്യമന്ത്രി പിണറായി വിജയൻ നാടിനു സമർപ്പിച്ചു. കേന്ദ്രസർക്കാർ അടച്ചു പൂട്ടിയ ഹിന്ദുസ്ഥാൻ ന്യൂസ് പ്രിൻറ് ലിമിറ്റഡ് ഏറ്റെടുത്താണ് സംസ്ഥാന സർക്കാർ കെ പി പി എൽ സ്ഥാപിച്ചിരിക്കുന്നത്.

വ്യവസായരംഗത്ത് കേരളത്തിൻറെ ബദൽ എന്ത് എന്ന ചോദ്യത്തിനുള്ള ഉത്തരമാണ് കേരള പേപ്പർ പ്രോഡക്റ്റ് ലിമിറ്റഡ്. മൂന്നുവർഷം മുമ്പ് കേന്ദ്രസർക്കാർ അടച്ചുപൂട്ടി സ്ഥാപനമാണ് കെ പി പി ൽ എന്ന പേരിൽ ഇന്ന് പ്രവർത്തനം ആരംഭിച്ചിരിക്കുന്നത്. എച്ച് എൻ എൽ ലേലത്തിലൂടെ ആണ് സംസ്ഥാന സർക്കാർ ഏറ്റെടുത്തത്.കമ്പനിയുടെ പ്രവർത്തന ഉദ്ഘാടനം മുഖ്യമന്ത്രി പിണറായി വിജയൻ നിർവഹിച്ചു.

കേരളം കേന്ദ്രത്തിന് നൽകുന്ന ബദലാണ് ലാഭകരമായ പോതുമേഖല സ്ഥാപനമെന്ന് വ്യവസായ മന്ത്രി പി രാജീവ് പറഞ്ഞു.മന്ത്രി പി രാജീവ് അധ്യക്ഷത വഹിച്ച ചടങ്ങിൽ സഹകരണ വകുപ്പ് മന്ത്രി വി.എൻ വാസവൻ
മുഖ്യപ്രഭാഷണം നടത്തി.മുൻ മുഖ്യമന്ത്രി ഉമ്മൻചാണ്ടി ആശംസ അറിയിച്ചു

നാലുവർഷത്തിനുള്ളിൽ 3000 കോടി വിറ്റുവരവുള്ള കമ്പനിയാക്കി മാറ്റുകയാണ് ലക്ഷ്യം.ആദ്യഘട്ടത്തില് ന്യൂസ് പ്രിന്റ് അടക്കമുള്ള വിവിധ കടലാസുകളും രണ്ടാം ഘട്ടത്തിൽ വിവിധ ഉല്പന്നങ്ങളുമാകും കമ്പനിയിൽ നിർമ്മിക്കുക.