ചോര കണ്ടാല്‍ ബോധം കേട്ട് വീഴുന്നവരെപ്പറ്റി നമ്മള്‍ കേട്ടിട്ടുണ്ട്. രോഗിയുടെ ചികിത്സയില്‍ മരുന്നിന് ഉള്ളതിനെക്കാള്‍ കൂടുതല്‍ പങ്ക് ഡോക്ടര്‍മാര്‍ക്കുമുണ്ട്. സ്‌നേഹത്തോടെ രോഗികളോട് സംസാരിച്ച് അവര്‍ക്ക് ആത്മവിശ്വാസം നല്‍കുമ്പോള്‍ തന്നെ രോഗത്തില്‍ ചെറിയ ഒരു ആശ്വാസം അവര്‍ക്ക് ലഭിച്ചേക്കും.
രോഗികളുടെ പേടി മാറ്റുന്നതില്‍ ഡോക്ടര്‍മാര്‍ക്ക് ഉള്ള പങ്ക് വളരെ വലുതാണ്. അതിന്റെ ഉദ്ദാഹരണമാണ് കഴിഞ്ഞ കുറച്ച് ദിവസമായി സോഷ്യല്‍ മീഡിയയില്‍ വൈറലായി കൊണ്ടിരിക്കുന്ന ഒരു ഓപ്പറേഷന്‍ തിയറ്ററിലെ രംഗം. തിയറ്ററിലെ കിടക്കയില്‍ കിടക്കുന്ന രോഗിയും ഡോക്ടറും കൂടി ആലപിക്കുന്ന ഒരു ഗാനമാണ് സോഷ്യല്‍ മീഡിയയില്‍ വൈറലായി കൊണ്ടിരിക്കുന്നത് വീഡിയോയിലുള്ളത്.
ഓപ്പറേഷനായി എത്തിയ പതിനാല് വയസുകാരിയുടെ ടെന്‍ഷന്‍ മാറ്റാന്‍ ഡോക്ടര്‍ ചെയ്തത സൂത്രപ്പണിയായിരുന്നു ഇത്. കോഴിക്കോട് ഫറോക്ക് താലൂക്ക് ആശുപത്രിയിലെ ഓര്‍ത്തോപീഡിക്ക് സര്‍ജന്‍ മുഹമ്മദ് റയീസ് പാലക്കലാണ് ഓപ്പറേഷന്‍ തിയറ്ററിലെ ഭീകരാന്തരീക്ഷം മാറ്റാന്‍ ആ കൊച്ച് മിടുക്കിയ്‌ക്കൊപ്പം പാട്ട് പാടിയത്.
ഓപ്പറേഷന്‍ ടേബിളില്‍ കിടന്ന കുട്ടിയോട് ടെന്‍ഷന്‍ ഉണ്ടോ എന്നാണ് ആദ്യം ഡോക്ടര്‍ ചോദിച്ചത്. അപ്പോള്‍ ഇല്ലെന്ന് പറഞ്ഞ പെണ്‍കുട്ടിയോട് എന്നാല്‍ ഒരു പാട്ട് പാടാമോ എന്ന് ചോദിച്ചതും, ദാ വരുന്നു നല്ല അടിപൊളി പാട്ട്. പേടിയൊന്നുമില്ലാതെ ആ മിടുക്കി പാടി തുടങ്ങിയതോടെ ഡോക്ടറിനും ആവേശമായി. അവള്‍ക്കൊപ്പം ഡോക്ടറും പാടാന്‍ തുടങ്ങിയതോടെ ഓപ്പറേഷന്‍ തിയറ്റര്‍ ഒരു സംഗീത വേദിയായി മാറുകയായിരുന്നു. ഏറെ കൂളായി പാട്ട് പാടിയ ആ പതിനാലുക്കാരി ഡോക്ടര്‍ക്കും ഓപ്പറേഷന്‍ തിയറ്ററിലെ മറ്റ് ജീവനക്കാര്‍ക്കും കൂടിയാണ് ധൈര്യം പകര്‍ന്ന് നല്‍കിയത്.
ഡോക്ടറുടെ സഹപ്രവര്‍ത്തകര്‍ പകര്‍ത്തിയ വീഡിയോയാണ് സോഷ്യല്‍ മീഡിയയില്‍ നിമിഷ നേരം കൊണ്ട് വൈറലായത്. നിരവധി പേരാണ് വീഡിയോ സോഷ്യല്‍ മീഡിയയിലൂടെ പങ്കുവെച്ചത്. വീഡിയോയ്ക്ക് താഴെ ഡോക്ടര്‍ക്ക് അഭിനന്ദനപ്രവാഹമാണ്.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
