ഭയത്തിന്റെ മൂടുപടവുമായെത്തി പ്രേക്ഷകരില് ആകാംക്ഷ ഉളവാക്കിയ മമ്മൂട്ടി ചിത്രം(Mammootty movie) റോഷാക്കിന്റെ(Rorschach) സെക്കന്റ് ലുക്ക് പോസ്റ്റര് പുറത്തിറങ്ങി. ആദ്യ പോസ്റ്റര് പോലെ തന്നെ ഉദ്വേഗം ജനിപ്പിക്കുന്ന ഒന്നാണ് രണ്ടാമത്തെ പോസ്റ്ററും. തന്റെ ആദ്യചിത്രമായ കെട്ട്യോളാണ് എന്റെ മാലാഖ വമ്പന് വിജയമാക്കി തീര്ത്ത നിസാം ബഷീര് ഒരുക്കുന്ന മമ്മൂട്ടിയുടെ ത്രില്ലര് ചിത്രം റോഷാക്കിന്റെ നിര്മാണം നിര്വഹിച്ചിരിക്കുന്നത് മമ്മൂട്ടി കമ്പനി തന്നെയാണ്. മമ്മൂക്കയെ നായകനാക്കി ലിജോ ജോസ് പെല്ലിശ്ശേരി ഒരുക്കുന്ന നന്പകല് നേരത്ത് മയക്കം എന്ന ചിത്രവും നിര്മ്മിക്കുന്നത് മമ്മൂട്ടി കമ്പനി തന്നെയാണ്. വേഫെറര് ഫിലിംസാണ് ചിത്രം തീയറ്ററുകളില് എത്തിക്കുന്നത്.
കൊച്ചിയിലും ദുബായിലുമായിട്ടാണ് ചിത്രത്തിന്റെ ഷൂട്ടിംഗ് പൂര്ത്തീകരിച്ചത്. മമ്മൂട്ടിയെ കൂടാതെ ഷറഫുദ്ധീന്, ജഗദീഷ്, ഗ്രേസ് ആന്റണി, ബിന്ദു പണിക്കര്, സഞ്ജു ശിവറാം, കോട്ടയം നസീര്, ബാബു അന്നൂര്, മണി ഷൊര്ണ്ണൂര് തുടങ്ങിയവരും ചിത്രത്തില് അഭിനയിക്കുന്നുണ്ട്. അഡ്വേഞ്ചേഴ്സ് ഓഫ് ഓമനക്കുട്ടന്, ഇബ്ലീസ് എന്നീ ചിത്രങ്ങള്ക്ക് തിരക്കഥ ഒരുക്കിയ സമീര് അബ്ദുളാണ് തിരക്കഥ ഒരുക്കിയിരിക്കുന്നത്.
പ്രൊഡക്ഷന് ഡിസൈനര് – ബാദുഷ, ചിത്രസംയോജനം – കിരണ് ദാസ്, സംഗീതം – മിഥുന് മുകുന്ദന്, കലാസംവിധാനം – ഷാജി നടുവില്, പ്രൊഡക്ഷന് കണ്ട്രോളര് – പ്രശാന്ത് നാരായണന്, ചമയം – റോണക്സ് സേവ്യര് & എസ്സ് ജോര്ജ്, വസ്ത്രാലങ്കാരം – സമീറ സനീഷ് എന്നിവരാണ് അണിയറപ്രവര്ത്തകര്. പ്രതീഷ് ശേഖറാണ് പി ആര് ഒ., ഡിജിറ്റല് മാര്ക്കറ്റിംഗ് – അനൂപ് സുന്ദരന്, വിഷ്ണു സുഗതന്.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here