Tea: ചായ കുടിച്ച് തടി കുറയ്ക്കാം

തടി എന്നത് ഇന്നത്തെ കാലത്തെ പ്രധാനപ്പെട്ട ആരോഗ്യ പ്രശ്നങ്ങളില്‍ ഒന്നാണെന്ന് പറഞ്ഞാലും തെറ്റില്ല. ആണ്‍ പെണ്‍ ഭേദമന്യേ, പ്രായഭേദമന്യേ പൊണ്ണത്തടിയിലേയ്ക്ക് നീങ്ങുന്നവര്‍ കുറച്ചൊന്നുമില്ല. തടി പലരും സൗന്ദര്യ പ്രശ്നമായി കണക്കാക്കുമ്പോഴും ഇത് ആരോഗ്യ പ്രശ്നമാണെന്നതാണ് കൂടുതല്‍ പ്രധാനം. തടി പല അസുഖങ്ങളിലേയ്ക്കും വഴി തെളിയ്ക്കുന്ന ഒന്നാണ്. തടി കുറച്ചാല്‍ തന്നെ പകുതി അസുഖങ്ങള്‍ നീങ്ങി നില്‍ക്കും. എന്നാല്‍ തടി കുറയ്ക്കാന്‍ വേണ്ടി അനാരോഗ്യകരമായ വഴികള്‍ സ്വീകരിയ്ക്കുന്നത് നന്നല്ല. തടി കുറയ്ക്കാന്‍ സഹായിക്കുന്ന വഴികള്‍ പലതുമുണ്ട്.

ചായ

ചായ(Tea) എന്നത് നമുക്ക് പലര്‍ക്കുമുള്ള നിത്യശീലമാണ്. ഇത് കുടിച്ചില്ലെങ്കില്‍ തലവേദന വരുന്നവരും ഉറക്കം വരുന്നവും ഒരു ദിവസം തന്നെ പോയി എന്ന തോന്നലുള്ളവരും ഊര്‍ജം ലഭിയ്ക്കാത്തവുമെല്ലാം ധാരാളമുണ്ട്. എന്നാല്‍ ചായ കാപ്പി ശീലങ്ങള്‍ അത്ര നല്ലതല്ലെന്നും പറയാം. എന്നാല്‍ ചില പ്രത്യേക രീതിയില്‍, ചില പ്രത്യേക ചായ കുടിയ്ക്കുന്നത് ആരോഗ്യപരമായ പല ഗുണങ്ങളും നല്‍കുന്നുണ്ട്. ഉദാഹരണത്തിന് ഹെര്‍ബല്‍ ടീ. തടി കുറയ്ക്കാനും പ്രത്യേക രീതിയിലെ ചായ, ചായകുടി ഗുണം നല്‍കുന്നുണ്ട്. ചായ കുടിയ്ക്കുമ്പോള്‍ തടി കൂടും, ആരോഗ്യം പോകും എന്നൊക്കെ ചിന്തയുണ്ടെങ്കിലും ചായ ഒഴിവാക്കാന്‍ സാധിയ്ക്കാത്ത ചിലരുണ്ട്. ഇത്തരക്കാര്‍ക്ക് ആരോഗ്യം നന്നാക്കാന്‍ സഹായിക്കുന്ന, തടി കുറയ്ക്കാന്‍ സഹായിക്കുന്ന പ്രത്യേക ചായ തയ്യാറാക്കി കുടിയ്ക്കാം.

നാരങ്ങ

ലെമണ്‍-ജിഞ്ചര്‍ ടീ(Lemon-ginger tea) ആണ് തടി കുറയ്ക്കാന്‍ സഹായിക്കുന്ന പ്രത്യേക ചായക്കൂട്ട്. പേര് സൂചിപ്പിയ്ക്കുന്നതു പോലെ തന്നെ ചായയില്‍ നാരങ്ങാനീരും ഇഞ്ചിയും ചേര്‍ത്ത് തയ്യാറാക്കുന്ന ഒന്നാണ് ഈ പ്രത്യേക ചായ. നാരങ്ങയും ഇഞ്ചിയും തടി കുറയ്ക്കാന്‍ സഹായിക്കുന്ന പ്രധാനപ്പെട്ട കൂട്ടുകളാണ്. നാരങ്ങ വൈറ്റമിന്‍ സി സമ്പുഷ്ടമാണ്. ആന്റി ഓക്സിഡന്റകളാല്‍ സമ്പുഷ്ടമായതാണ് ഇത്. ഉപാപചയ പ്രക്രിയ ശക്തിപ്പെടുത്താന്‍ സഹായിക്കുന്ന ഒന്നാണ് ചെറുനാരങ്ങ. ധാരാളം വൈറ്റമിനുകളും പോഷകങ്ങളും അടങ്ങിയ ഇത് പല ആരോഗ്യ ഗുണങ്ങളും നല്‍കുന്നു. ചര്‍മത്തിനും മുടിയ്ക്കുമെല്ലാം ഏറെ നല്ലതാണ് ചെറുനാരങ്ങ.

ഇഞ്ചി

ഇഞ്ചിയും കൊഴുപ്പ് കത്തിച്ചു കളയാന്‍ സഹായിക്കുന്ന ഒന്നാണ്. ഇതിലെ ജിഞ്ചറോള്‍ എന്ന ഘടകമാണ് ഗുണം നല്‍കുന്നത്. ആന്റി ഇന്‍ഫ്ളമേറ്ററി, ഗ്യാസ്ട്രിക് ഗുണങ്ങള്‍ അടങ്ങിയതാണ് ഇത്. അതായത് ശരീരത്തിലെ വീക്കം തടയാനും ഗ്യാസ് പ്രശ്നങ്ങള്‍ക്കും നല്ല മരുന്നാണ്. ചൂടു വര്‍ദ്ധിപ്പിച്ച് ഉപാപചയ പ്രക്രിയ ശക്തിപ്പെടുത്തുന്ന ഒന്നാണ് ഇഞ്ചി. ഇതിന്റെ തെര്‍മോജെനിക് ഗുണമാണ് ഈ സവിശേഷത നല്‍കുന്നത്. അതായത് ചൂടു വര്‍ദ്ധിപ്പിയ്ക്കുന്നത്. ഇതിലൂടെ കൊഴുപ്പ് പെട്ടെന്ന് കത്തിപ്പോകുന്നു. ദഹന പ്രശ്നങ്ങള്‍ അകറ്റാന്‍ സഹായിക്കുന്നതും തടി കുറയ്ക്കാന്‍ സഹായിക്കുന്ന ഒന്നാണ്. ഒരു പിടി ആരോഗ്യ ഗുണങ്ങള്‍ അടങ്ങിയ ഒന്നാണിത്.

ലെമണ്‍-ജിഞ്ചര്‍ ടീ

ലെമണ്‍-ജിഞ്ചര്‍ ടീ ഉണ്ടാക്കാന്‍ രണ്ട് ടീസ്പൂണ്‍ നാരങ്ങാനീര്, അര കപ്പ് അരിഞ്ഞ ഇഞ്ചി എന്നിവ വേണം. മധുരം വേണമെന്നുള്ളവര്‍ക്ക് ചെറുതേന്‍ ഒരു ടീസ്പൂണ്‍ ഇതില്‍ ചേര്‍ക്കാം. ഇവയെല്ലാം കൂട്ടിക്കലര്‍ത്തി രാത്രി ഫ്രിഡ്ജില്‍ വയ്ക്കുക. പിറ്റേന്ന് ഒരു കട്ടിയുള്ള മിശ്രിതം ലഭിയ്ക്കും. ഇതില്‍ നിന്നും ഒരു ടീസ്പൂണ്‍ എടുത്ത് ഒരു കപ്പ് ചായയില്‍ ചേര്‍ത്ത് കുടിയ്ക്കാം. ചായ വേണ്ടെന്നുള്ളവര്‍ക്ക് ഇത് ചൂടുവെള്ളത്തില്‍ കലര്‍ത്തി കുടിയ്ക്കാം. ഇതാണ് ഏറെ ആരോഗ്യകരം. ഇതല്ലെങ്കില്‍ കട്ടന്‍ ചായയില്‍ ചേര്‍ക്കാം. പാല്‍ ചേര്‍ത്ത ചായയെങ്കിലും ഈ കൂട്ട് ചേര്‍ത്താല്‍ ആരോഗ്യകരമാകും.

കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും  ലഭ്യമാണ്.  വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.

whatsapp

കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക

Click Here