അതിദാരിദ്ര്യ നിർമാർജനം നടപ്പാക്കിയ രാജ്യത്തെ ആദ്യസംസ്ഥാനമായി കേരളത്തെ മാറ്റുമെന്ന്‌ തദ്ദേശ സ്വയംഭരണമന്ത്രി എം വി ഗോവിന്ദൻ മാസ്റ്റർ(mv govindan master) പറഞ്ഞു. ആലുവ(aluva) നഗരസഭാ ശതാബ്ദിയാഘോഷത്തോടനുബന്ധിച്ച് നഗരസഭാ അധ്യക്ഷരുടെ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
നീതി ആയോഗ് പട്ടികയിൽ ദാരിദ്ര്യം ഏറ്റവും കുറവുള്ള സംസ്ഥാനമാണ് കേരളം. അതിദാരിദ്ര്യം അനുഭവിക്കുന്നവരെ കണ്ടെത്തി അവരുടെ ജീവിതനിലവാരം ഉയർത്താനാകണം.
പ്രായമായവർക്ക്‌ സംരക്ഷണം, തൊഴിൽ ആവശ്യമുള്ളവർക്ക് തൊഴിൽ, അസുഖ ബാധിതർക്ക് ചികിത്സ, ഭക്ഷണം എന്നിവ വിവിധ വകുപ്പുകളുടെ സഹകരണത്തോടെ ഒരുക്കണം. കക്ഷിരാഷ്ട്രീയ ഭേദമന്യേ കൂട്ടായ പ്രവർത്തനത്തിലൂടെയേ ഇത് സാധ്യമാകൂ.
തൊഴിലില്ലായ്മ തുടച്ചുനീക്കുകയെന്ന ലക്ഷ്യത്തോടെ ഒരുവർഷം 20 ലക്ഷം ആളുകൾക്ക് തൊഴിൽ നൽകും. കൂട്ടായ പ്രവർത്തനങ്ങളിലൂടെ ലോകത്തിലെ വികസിത നാടുകൾക്കൊപ്പം എത്താൻ കേരളത്തിന് സാധിക്കുമെന്നും മന്ത്രി പറഞ്ഞു.
ചടങ്ങിൽ ചേംബർ ഓഫ് മുനിസിപ്പൽ ചെയർമാൻ കേരള അധ്യക്ഷൻ എം കൃഷ്ണദാസ് അധ്യക്ഷനായി. ബെന്നി ബഹനാൻ എംപി, ജെബി മേത്തർ എംപി, അൻവർ സാദത്ത് എംഎൽഎ, പഞ്ചായത്ത് ഡെപ്യൂട്ടി ഡയറക്ടർ കെ ജെ ജോയി, ആലുവ നഗരസഭാ സെക്രട്ടറി ജെ മുഹമ്മദ് ഷാഫി, വിവിധ നഗരസഭാ അധ്യക്ഷർ തുടങ്ങിയവർ സംസാരിച്ചു.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
