ഓണ ലഹരിയിൽ സംസ്ഥാന തലസ്ഥാനം. സംസ്ഥാന സർക്കാരിന്റെ ഓണം വാരാഘോഷ പരിപാടികൾക്ക് ഇന്ന് തുടക്കമാകും.വൈകീട്ട് മുഖ്യമന്ത്രി പിണറായി വിജയൻ ആഘോഷ പരിപാടികൾക്ക് ഔദ്യോഗിക തുടക്കം കുറിക്കും. ഏറെ പുതുമകളോടെയാണ് ഒരിടവേളക്ക് ശേഷം ടൂറിസം വകുപ്പ് ഓണാഘോഷ പരിപാടികൾ സജ്ജമാക്കിയിരിക്കുന്നത്.
ഇന്ന് മുതൽ സെപ്റ്റംബർ12 വരെ തലസ്ഥാനം അക്ഷരാർത്ഥത്തിൽ ഉത്സവ ലഹരിയിലാകും. ആഘോഷത്തിന്റെ വരവറിയിച്ചുകൊണ്ട് കഴിഞ്ഞദിവസം അനന്തപുരിയിൽ പുലികളി ഉൾപ്പെടെ അരങ്ങേറിയത് ഏവരുടെയും ശ്രദ്ധയാകർഷിച്ചു.
വൈകീട്ട് ആറിന് തിരുവനന്തപുരം കനകകുന്നിൽ കലാമണ്ഡലം ശിവദാസും സംഘവും അവതരിപ്പിക്കുന്ന ഇലഞ്ഞിത്ത മേളത്തെ തുടർന്ന് മുഖ്യമന്ത്രി പിണറായി വിജയൻ സർക്കാരിന്റെ ഓണം വാരാഘോഷ പരിപാടികളുടെ ഉദ്ഘാടനം നിർവ്വഹിക്കും.
ദേശീയ പുരസ്കാര ജേതാവ് അപർണ്ണാ ബാലമുരളി, സിനിമാ താരം ദുൽഖർ സൽമാൻ എന്നിവർ ചടങ്ങിൽ മുഖ്യാതിഥികളാവും. തുടർന്ന് കൈരളി ടി വി യുടെ ആഭിമുഖ്യത്തിൽ വിജയ് യേശുദാസ് ,റിമി ടോമി എന്നിവർ നയിക്കുന്ന മെഗാ ഗാനമേള അരങ്ങേറും. 32 വേദികളിലായാണ് ഇത്തവണ ഓണാഘോഷ പരിപാടികൾ അരങ്ങേറുന്നത്.
കേരളത്തിന്റെ തനത് കലാരൂപങ്ങൾക്കൊപ്പം അധുനിക കലകളും സംഗീത ദൃശ്യ വിരുന്നും ആയോധന പ്രകടനവുമെല്ലാം ഇത്തവണ ഓണം വാരാഘോഷത്തിന്റെ മാറ്റ് കൂട്ടും. സെപ്തംബർ 12 ന് വൈകിട്ട് ആഞ്ച് മണിക്ക് വെള്ളയമ്പലം മുതൽ കിഴക്കെക്കോട്ട വരെയുള്ള വർണ്ണാഭമായ ഘോഷയാത്രയോടെ ഈ വർഷത്തെ ഓണം വരാഘോഷത്തിന് സമാപനമാവും.
കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും ലഭ്യമാണ്. വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
