അറസ്റ്റിലായ പോപ്പുലര് ഫ്രണ്ട് പ്രവര്ത്തകരെ നാളെ ഡല്ഹിയില് എന്ഐഎ കോടതിയില് ഹാജരാക്കും.ഇതുവരെ ലഭിച്ച തെളിവുകള് അന്വേഷണ ഏജന്സി കോടതിയെ സമര്പ്പിക്കും. എന്ഐഎ ആസ്ഥാനത്തു അറസ്റ്റിലായവരുടെ ചോദ്യം ചെയ്യല് തുടരുകയാണ്.
പ്രധാനമന്ത്രിയെ വധിക്കാന് പോപ്പുലര് ഫ്രണ്ട് ശ്രമിച്ചുവെന്ന ആരോപണം ഇഡി ഉന്നയിച്ചിരുന്നു. കേരളത്തില് നിന്നും അറസ്റ്റ് ചെയ്ത ഷഫീഖ് പിയുടെ റിമാന്ഡിലാണ് ഇക്കാര്യം പറയുന്നത്. ബിഹാറില് വെച്ച് പ്രധാനമന്ത്രി നരേന്ദ്ര മോദിയെ വധിക്കാന് ഗൂഢാലോചന നടത്തിയെന്ന് റിമാന്ഡ് റിപ്പോര്ട്ടില് പറയുന്നു. കൂടാതെ യുപിയിലെ നേതാക്കളെ വധിക്കാന് പദ്ധയിയിട്ടിരുന്നെന്നും ഇഡി ആരോപിച്ചിരുന്നു. ഈ സാഹചര്യത്തില് ചോദ്യം ചെയ്യാനടക്കം കൂടുതല് സമയം എന്ഐഎ ആവശ്യപ്പെടനാണ് സാധ്യത.
പോപ്പുലര് ഫ്രണ്ട് പ്രവര്ത്തകര്ക്കെതിരെ എന്ഐഎ അഞ്ച് കേസുകളാണ് രജിസ്റ്റര് ചെയ്തത്. വ്യാഴാഴ്ച രാജ്യ വ്യാപകമായി നടത്തിയ റെയ്ഡിന് പിന്നാലെ 106 പേരാണ് അറസ്റ്റിലായത്. പോപ്പുലര് ഫ്രണ്ടിന്റെ 93 കേന്ദ്രങ്ങളിലാണ് റെയ്ഡ് നടന്നത്. ഡല്ഹിയില് രജിസ്റ്റര് ചെയ്ത കേസിലാണ് പിഎഫ്ഐ ദേശീയ പ്രസിഡന്റ് ഒഎംഎ സലാം, ദേശീയ സെക്രട്ടറി നസറുദ്ദീന് എളമരം, മുഹമ്മദ് ബഷീര്, കെ പി ജസീര്, കെ പി ഷഫീര്, പി അബൂബക്കര്, ഇ എം അബ്ദുള് റഹ്മാന്, പി കോയ എന്നിവര് അറസ്റ്റിലായത്. കരമന അഷ്റഫ് മൗലവി, സാദിഖ് അഹമ്മദ്, ഷിഹാസ്, അന്സാരി, എം എം മുജീബ് എന്നിവര് കേരളത്തിലെടുത്ത കേസിലാണ് അറസ്റ്റിലായത്.
കേരളത്തില് നിന്ന് 22 പേര് മഹാരാഷ്ട്രയിലും കര്ണാടകത്തിലും (20 വീതം), തമിഴ്നാട് (10), അസം (9), ഉത്തര്പ്രദേശ് (8), ആന്ധ്രാപ്രദേശ് (5), മധ്യപ്രദേശ് (4) എന്നിവിടങ്ങളില് നിന്നാണ് ഏറ്റവും കൂടുതല് അറസ്റ്റുണ്ടായത്. പുതുച്ചേരിയും ഡല്ഹിയും (3 വീതം), രാജസ്ഥാന് (2) പിഎഫ്ഐ പ്രവര്ത്തകരാണ് അറസ്റ്റിലായത്.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here