സംഘടനാപാടവം, ആശയദൃഢത, സൗമ്യമായ ഇടപെടൽ, അതായിരുന്നു കോടിയേരിയുടെ മുഖമുദ്ര. കേരള രാഷ്ട്രീയത്തിൻ്റെ വലിയ നഷ്ടമാണ് കോടിയേരി ബാലകൃഷ്ണണൻ്റെ വിയോഗത്തിലൂടെ ഉണ്ടായിരിക്കുന്നത്.
തലശേരി കോടിയേരിയില് സ്കൂള് അധ്യാപകനായിരുന്ന പരേതനായ കുഞ്ഞുണ്ണിക്കുറുപ്പിന്റെയും നാരായണിയമ്മയുടെയും മകനായി 1953 നവംബര് 16ന് ജനനം. ഹൈസ്കൂള് വിദ്യാഭ്യാസത്തിനുശേഷം മാഹി മഹാത്മാഗാന്ധി കോളേജില് പ്രീഡിഗ്രിക്ക് ചേര്ന്നു. കോളേജ് യൂണിയന് ചെയര്മാനായിരുന്നു.
തുടര്ന്ന് തിരുവനന്തപുരം യൂണിവേഴ്സിറ്റി കോളേജില് ബിരുദവിദ്യാര്ഥിയായി. യൂണിവേഴ്സിറ്റി കോളേജ് വിദ്യാര്ഥിയായിരിക്കെ 1973ല് എസ്എഫ്ഐ സംസ്ഥാന സെക്രട്ടറിയായി. 1979 വരെ ആ സ്ഥാനത്ത് തുടര്ന്നു.
1971ലെ തലശേരി കലാപകാലത്ത് സമാധാനം പുനഃസ്ഥാപിക്കാനുള്ള പ്രവര്ത്തനങ്ങളില് സജീവമായി. സിപിഐ എം ബ്രാഞ്ച് സെക്രട്ടറി, ലോക്കല് സെക്രട്ടറി എന്നീ നിലകളില് പ്രവര്ത്തിച്ച കോടിയേരി 198082ല് ഡിവൈഎഫ്ഐ കണ്ണൂര് ജില്ലാ സെക്രട്ടറിയായിരുന്നു.199095ല് സിപിഐ എം കണ്ണൂര് ജില്ലാ സെക്രട്ടറിയായി.
1988ലെ ആലപ്പുഴ സമ്മേളനത്തില് സംസ്ഥാന കമ്മിറ്റി അംഗമായി. 1995ല് സംസ്ഥാന സെക്രട്ടറിയറ്റ് അംഗമായ കോടിയേരി 2002ല് ഹൈദരാബാദ് പാര്ടി കോണ്ഗ്രസില് കേന്ദ്ര കമ്മിറ്റിയിലെത്തി. 2008ലെ പാര്ടി കോണ്ഗ്രസില് പിബി അംഗമായി.
അടിയന്തരാവസ്ഥയില് അറസ്റ്റിലായ കോടിയേരി, ലോക്കപ്പില് ക്രൂരമര്ദനത്തിന് ഇരയായി. മിസ പ്രകാരം കണ്ണൂര് സെന്ട്രല് ജയിലില് അടയ്ക്കപ്പെട്ടു. കര്ഷകരുടെ ആവശ്യങ്ങളുന്നയിച്ച് നടത്തിയ റെയില്വേ സമരത്തില് പൊലീസിന്റെ ഭീകരമര്ദനമേറ്റു. 1982ല് തലശേരിയില്നിന്നാണ് ആദ്യമായി നിയമസഭാംഗമായത്. 1987, 2001, 2006, 2011ലും തലശേരിയെ പ്രതിനിധാനംചെയ്തു.
2006ല് ആഭ്യന്തര, ടൂറിസം മന്ത്രിയായിരുന്നു. ജനമൈത്രി പൊലീസ് പദ്ധതി അക്കാലത്താണ് നടപ്പാക്കിയത്. 2001, 2011 പ്രതിപക്ഷ ഉപനേതാവായിരുന്നു. പാര്ലമെന്ററി രംഗത്തും ഭരണാധികാരി എന്ന നിലയിലും കഴിവുതെളിയിച്ച കോടിയേരി പാര്ടി സെക്രട്ടറി എന്ന നിലയില് അത്യുജ്വല പ്രവര്ത്തനം കാഴ്ചവച്ചു.
പാര്ടിയെ ഒറ്റക്കെട്ടായി മുന്നോട്ടു കൊ ണ്ടുപോകുന്നതിലും ശത്രുവര്ഗത്തിന്റെ കടന്നാക്രമണങ്ങളെ ചെറുത്തുതോല്പ്പിക്കുന്നതിലും വലതുപക്ഷ മാധ്യമങ്ങളുടെ നുണപ്രചാരണങ്ങള് തുറന്നുകാട്ടുന്നതിലും കരുത്ത് പ്രകടിപ്പിച്ചു. പ്രിയ സഖാവേ… വിട…..
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here