(Hair Tips)മുടിയുടെ സൗന്ദര്യം അതിന്റെ ഉള്ളളവില് തന്നെയാണ്. ഉള്ളളവ് കുറവാണെങ്കില് എത്ര നീളമുണ്ടായാലും മുടി ഭംഗിയായി തോന്നില്ല. നല്ല കട്ടിയുള്ള മുടിയിഴകളാണ് എല്ലായ്പ്പോഴും അതിന്റെ സൗന്ദര്യം നിര്ണയിക്കുന്നത് എന്ന് ഉറപ്പിച്ച് പറയാം. കൗമാര പ്രായത്തില് മിക്കവരുടെയും മുടിയ്ക്ക് നല്ല രീതിയില് ഉള്ളളവുണ്ടാകാറുണ്ട്.
സാധാരണയായി ദിവസവും 80 മുതല് 100 മുടിയിഴകള് വരെ കൊഴിഞ്ഞു പോകാം. എന്നാല് കൊഴിഞ്ഞു പോകുന്നതിന് ആനുപാതികമായി പുതിയ മുടിയിഴകള് വളരുന്നു എന്നതിനാല് ഇത് ഉള്ളളവിനെ കാര്യമായി ബാധിയ്ക്കുകയില്ല. ഇങ്ങനെ ആനുപാതികമായി പുതിയ ഇഴകള് വളരാത്ത അവസ്ഥയുണ്ടാകുമ്പോഴാണ് മുടി പ്രകടമായ രീതിയില് കുറയുന്നത്.
ശിരോചര്മത്തിലെ ഫോളിക്കിളുകള്ക്ക് സംഭവിയ്ക്കുന്ന മാറ്റങ്ങളാണ് മുടിയുടെ അളവ് കുറയുന്നത്. ഇതിന്റെ ഫലമായി, രോമകൂപങ്ങള് ചുരുങ്ങുകയും അതുവഴി കട്ടിയും കനവും കുറഞ്ഞ പുതിയ മുടി വളരുകയും ചെയ്യുന്നു. പുതുതായി രൂപപ്പെടുന്ന ഓരോ ഇഴകളും നേര്ത്ത് വരുന്നത് മുടിയുള അളവ് കുറയ്ക്കും.
-പതിവായി മസാജ് ചെയ്യാം:
തലയോട്ടിയില് പതിവായി മസാജ് ചെയ്യുന്നത് രക്തചംക്രമണം വര്ദ്ധിപ്പിക്കാനും മുടിയുടെ പോഷണങ്ങളെ പോഷിപ്പിക്കാനും സഹായിക്കും.
ശരിയായ മസാജ് രീതി: നിങ്ങള് ഉപയോഗിക്കുന്ന കുറച്ച് ഹെയര് ഓയില് ചെറുതായി ചൂടാക്കുക, ആ ഇളം ചൂടോട് കൂടി തന്നെ ഇത് തലയോട്ടിയിലേക്ക് തേച്ചു പിടിപ്പിക്കണം. ഇങ്ങനെ ചെയ്യുന്നത് എണ്ണ നല്ല രീതിയില് തലയോട്ടിയിലേയ്ക്ക് ആഗിരണം ചെയ്യാന് സഹായിക്കും. തലമുടി ഭാഗങ്ങളായി വേര്തിരിച്ച് വിരല്ത്തുമ്പുകള് ഉപയോഗിച്ച് വേണം മസാജ് ചെയ്യാന്. മുടിയിഴകളുടെ അഗ്രഭാഗത്തും നന്നായി എണ്ണ തേച്ച് പിടിപ്പിയ്ക്കണം. ഇങ്ങനെ 15 മിനിറ്റ് ചെയ്യുക.
രണ്ട് മണിക്കൂര് കഴിഞ്ഞ് സൗമ്യമായ ഷാംപൂ ഉപയോഗിച്ച് കഴുകി കളയാം. അല്ലെങ്കില് ഒരു രാത്രി മുഴുവന് തലയില് എണ്ണ നിലനിര്ത്തി കഴുകി കളയുന്നതും ഗുണം ചെയ്യും.
-എസ്സന്ഷ്യല് ഒയിലുകള് ഉപയോഗിക്കാം:
മുടി സംരക്ഷണത്തില് അവശ്യ എണ്ണകള്ക്ക് വളരെയധികം പ്രാധാന്യമുണ്ട്. മുടിയുടെ അളവ് വര്ദ്ധിപ്പിക്കാന് സഹായിക്കുന്ന ചില അവശ്യ എണ്ണകള് ഇവയാണ്:
റോസ്മേരി എസ്സന്ഷ്യല് ഓയില്: ഹോര്മോണ് അസന്തുലിതാവസ്ഥ മൂലമുണ്ടാകുന്ന മുടികൊഴിച്ചില് നിയന്ത്രിക്കുന്നതിന് റോസ്മേരി എസ്സന്ഷ്യല് ഓയില് വളരെ പ്രയോജനകരമാണ്.
ടീ ട്രീ ഓയില്: മുടിയുടെ ആരോഗ്യ ഗുണങ്ങള് വര്ധിപ്പിയ്ക്കുന്നതില് ഏറെ മുന്പിലാണ് ടീ ട്രീ ഓയില്. ടീ ട്രീ എന്ന പ്രത്യേക തരം ചെടിയില് നിന്നാണ് ഇത് തയ്യാറാക്കുന്നത്. ഇത് സ്ഥിരമായി ഉപയോഗിക്കുന്ന എണ്ണയില് കലര്ത്തി ഉപയോഗിക്കുന്നത് ശിരോചര്മത്തിന്റെ ആരോഗ്യം മെച്ചപ്പെടുത്തും. ആരോഗ്യമുള്ള ശിരോചര്മത്തില് നിന്ന് മാത്രമേ ആരോഗ്യമുള്ള മുടിയിഴകള് കിളിര്ത്തു വരൂ.
ലാവെന്ഡര് എസ്സന്ഷ്യല് ഓയില്:
ലിനൈല് അസറ്റേറ്റ്, ലിനൂള് തുടങ്ങിയ സംയുക്തങ്ങള് അടങ്ങിയതാണ് ലാവെന്ഡര് എസ്സന്ഷ്യല് ഓയില്. ഇവ തലയോട്ടിയിലെ രോമകൂപങ്ങളെ ഉത്തേജിപ്പിക്കുകയും ആഴത്തില് പോഷിപ്പിക്കുകയും ചെയ്യും. ഈ എസ്സന്ഷ്യല് ഓയില് മുടിയിഴകളുടെ വേരുകള് ബലപ്പെടുത്താന് സഹായിക്കും.
എസ്സന്ഷ്യല് ഓയില് ഒരിക്കലും തലയോട്ടിയില് നേരിട്ട് പ്രയോഗിക്കരുത് എന്നത് ശ്രദ്ധിക്കേണ്ടതാണ്. ഇത്തരം എസ്സന്ഷ്യല് ഓയിലുകള് നേര്പ്പിക്കാന് ആവണക്കെണ്ണ അല്ലെങ്കില് വെളിച്ചെണ്ണ എന്നീ സാധാരണ എണ്ണകള് ഉപയോഗിക്കാം.
എസ്സന്ഷ്യല് ഓയില് ഏതാനും തുള്ളി എടുത്ത ശേഷം അടിസ്ഥാന എണ്ണയിലേക്ക് കലര്ത്തി തലയോട്ടിയില് മസാജ് ചെയ്യാം. ശേഷം രണ്ട് മണിക്കൂര് കഴിഞ്ഞ് സള്ഫേറ്റ് രഹിത ഷാംപൂ ഉപയോഗിച്ച് കഴുകുക.
-നെല്ലിക്ക ഹെയര് മാസ്ക്:
ആയുര്വേദ വിധി പ്രകാരം, ശിരോ ചര്മത്തിലെ രോമകൂപങ്ങളില് അമിതമായ ചൂട് പുറപ്പെടുവിയ്ക്കുന്നത് മുടി വളര്ച്ചയെ ദോഷകരമായി ബാധിയ്ക്കും. അതിനാല് തലയോട്ടിയിലെ ചൂട് ശമിപ്പിയ്ക്കെണ്ടാത് അത്യാവശ്യമാണ്. ഇത്തരത്തില് തലയോട്ടിയിലെ ചൂട് കുറച്ച് മുടിവളര്ച്ച കൂട്ടാനും മുടിയുടെ തിളക്കം വര്ധിപ്പിയ്ക്കുന്നതിനും ഏറെ ഉപകാരപ്രദമായ ഒന്നാണ് നെല്ലിയ്ക്ക. മുടിയിഴകളെ പോഷിപ്പിയ്ക്കുന്ന ഈ ഹെയര് മാസ്ക് തയ്യാറാക്കാനായി നെല്ലിയ്ക്കാ പൊടിയും തൈരും വെള്ളവുമാണ് ആവശ്യം.
തയ്യാറാക്കേണ്ട വിധം:
സ്റ്റെപ്പ് 1: ഒരു പാത്രത്തില് നെല്ലിയ്ക്കാ പൊടിയും തൈരും വെള്ളവും നന്നായി കലര്ത്തി പേസ്റ്റ് രൂപത്തിലേയ്ക്ക് മാറ്റുക.
സ്റ്റെപ്പ് 2: തലമുടി പല ഭാഗങ്ങളായി വേര്തിരിച്ച്, തയ്യാറാക്കി വെച്ച പേസ്റ്റ് മുടിയിലും തലയോട്ടിയിലും പുരട്ടുക. മുടിയിഴകളുടെ വേരുകള് മുതല് അറ്റം വരെ ഇത് നന്നായി പുരട്ടി വെയ്ക്കാം.
സ്റ്റെപ്പ് 3: മാസ്ക് വളരെ വേഗം വരണ്ടു പോകാതിരിക്കാന് ഷവര് ക്യാപ് ഉപയോഗിക്കാം. 30 മിനിറ്റ് നേരം ഈ മാസ്ക് തലയില് നിലനിര്ത്തണം.
സ്റ്റെപ്പ് 4: 30 മിനിറ്റ് കഴിഞ്ഞാല്, ഇളം ചൂടുള്ള വെള്ളവും സള്ഫേറ്റ് രഹിത ഷാമ്പൂവും ഉപയോഗിച്ച് മുടി നന്നായി കഴുകുക.
ഔഷധ സസ്യങ്ങള് ഉപയോഗിക്കൂ:
തലയോട്ടിക്ക് നിരവധി ഗുണങ്ങള് നല്കുന്നതും എന്നാല് പാര്ശ്വ ഫലങ്ങളില്ലാതെ സൗ മ്യമായ പരിചരണം നല്കുന്ന വിവിധ ഔഷധ സസ്യങ്ങള് നമുക്ക് ചുറ്റുമുണ്ട്.
ഭ്രിംഗരാജ് / കയ്യോന്നി: മുടി വളര്ച്ച മെച്ചപ്പെടുത്താന് കാലങ്ങളായി ഉപയോഗിക്കുന്ന ഔഷധ സസ്യമാണ് കയ്യോന്നി അല്ലെങ്കില് ഭ്രിംഗരാജ്. ഇതിന്റെ നീരുപയോഗിച്ച് എണ്ണ തയ്യാറാക്കാം. അത് സാധ്യമല്ലെങ്കില് വിപണിയില് വിവിധ ബ്രാന്ഡുകളില് കയ്യോന്നി ചേര്ത്ത എണ്ണ ലഭ്യമാണ്. കയ്യോന്നി അരച്ച് പിഴിഞ്ഞെടുത്ത നീരോ കയ്യോന്നി ഇലകള് നന്നായി ഉണക്കി പൊടിച്ചത് എണ്ണയില് ചേര്ത്തോ ഇത് തയ്യാറാക്കാം. ആഴ്ചയില് മൂന്നു തവണ ഇത് ഉപയോഗിക്കാം.
ഉലുവ: ചര്മ സൗന്ദര്യം, മുടി സംരക്ഷണം, രോഗപ്രതിരോധ ശേഷി, ആരോഗ്യം..അങ്ങനെ നീണ്ട നിറ തന്നെയുണ്ട് ഉലുവയുടെ ഗുണങ്ങള്. വിറ്റാമിന് സി, വിറ്റാമിന് കെ, വിറ്റാമിന് എ, ഇരുമ്പ്, കാല്സ്യം, പൊട്ടാസ്യം, ഫോളിക് ആസിഡ് എന്നിവയാല് സമ്പന്നമാണ് ഉലുവ. ഉലുവയിലെ ഉയര്ന്ന നിക്കോട്ടിനിക്, പ്രോട്ടീന് എന്നിവ താരന് ഇല്ലാതാക്കുന്നതിനുള്ള മികച്ച പരിഹാരം കൂടിയാണ്.
ത്രിഫലയും ബ്രഹ്മിയും
ത്രിഫല: മുടി സംരക്ഷണ കാര്യത്തില് ഏറെ സഹായിക്കുന്ന ഒന്നാണ് ത്രിഫല. ശക്തമായ ആന്റി ബാക്ടീരിയല്, ആന്റിഫംഗല് ഗുണങ്ങള് അടങ്ങിയതിനാല് ഇത് തലയോട്ടിയുടെ ആരോഗ്യം മെച്ചപ്പെടുത്തും. ഫോളിക്കിളുകള് കരുത്തുറ്റതാക്കി മുടിയുടെ ഉള്ളളവ് വര്ധിപ്പിയ്ക്കാനും ത്രിഫല സഹായിക്കും.
ബ്രഹ്മി: തലയോട്ടിയില് സാധാരണ കണ്ടുവരുന്ന പ്രശ്നങ്ങളാണ് വരള്ച്ച, ചൊറിച്ചില്, മുടിയുടെ അറ്റം പിളരല് എന്നിവ. ഇവ മുടികൊഴിച്ചിലിനു കാരണമാകുകയും ഇഴകളുടെ കട്ടി കുറയ്ക്കാന് കാരണമാകുകയും ചെയ്യും. ഇത്തരം പ്രശ്നങ്ങളെ വേരോടെ പിഴുതെറിയാന് ബ്രാഹ്മിയ്ക്ക് കഴിയും. ബ്രഹ്മി പ്രധാന ചേരുവയായി ഉള്പ്പെടുത്തിയ ഹെയര് ഓയിലുകള് ഉപയോഗിക്കാം. തലയ്ക്ക് തണുപ്പ് നല്കാനും മാനസിക സമ്മര്ദ്ദം കുറയ്ക്കാനും ബ്രഹ്മി ഉപയോഗിച്ച് തയ്യാറാക്കുന്ന എണ്ണകള് ഉപയോഗപ്രദമാണ്.
സമീകൃതാഹാരം പ്രധാനം:
മിനുസമാര്ന്ന ചര്മത്തിനും മുടിക്കും പ്രധാനമായും വേണ്ട ഒന്നാണ് സമീകൃതാഹാരം. പുറമേ ഉപയോഗിക്കുന്ന എണ്ണകളും മറ്റും കൃത്യമായ ഫലം നല്കണമെങ്കില് കഴിയ്ക്കുന്ന ഭക്ഷണം പോഷക സമ്പുഷ്ടമാകണം. മുടിയുടെ ഉള്ളളവ് നിലനിര്ത്താന് ആവശ്യമായ കെരാറ്റിന് നിലനിര്ത്താന് നല്ല ഭക്ഷണം കഴിക്കേണ്ടത് അത്യാവശ്യമാണ്. മുടിയിഴകളുടെ ആരോഗ്യം മെച്ചപ്പെടുത്തുന്ന ആന്റിഓക്സിഡന്റുകള്, അമിനോ ആസിഡുകള്, ബയോട്ടിന്, ഫോളിക് ആസിഡ്, വിറ്റാമിന് സി, വിറ്റാമിന് ഇ, വിറ്റാമിന് എ, വിറ്റാമിന് ഡി, സെലിനിയം, നിയാസിന്, ഇരുമ്പ്, സിങ്ക്, ഫാറ്റി ആസിഡുകള് തുടങ്ങിയ പോഷകങ്ങള് ഉറപ്പിയ്ക്കാന് സമീകൃതാഹാരം ശീലമാക്കണം. മാംസം, ഇലക്കറികള്, സിട്രസ് പഴങ്ങള്, പരിപ്പ്, ധാന്യങ്ങള്, കാരറ്റ്, തൈര് പോലുള്ള പ്രോബയോട്ടിക്സ് എന്നിവ ഉള്പ്പെടുത്തി സമീകൃതാഹാരം കഴിയ്ക്കുക. ഇവ മുടിയുടെ ഉള്ളളവ് നിലനിര്ത്തുന്നതിന് അനിവാര്യമാണ്.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here